Adama leh Evi te chuan fate an han nei a, tichuan leiah hian mihring an lo pung ta hle a. Hun a lo kal zêl chuan, vântirhkoh ṭhenkhat chuan Setana helna chu an zâwm ve ta a.

Mihring fanute nupuia an neih theih nân vântirhkoh sualte chu mihring taksa puin leiah an rawn chhuk a. Mi kawlhsen leh chak tak, mihringte aia thiltithei zâwk fapate an rawn nei a ni.

Khawvêl chu mi suaksual hlîrin an lo khat ta a. Bible chuan: “Leiah hian mihring sualzia chu nasa tak a ni . . . an rilru suangtuahzia rêng rêng chu sual hlîr a ni fo mai,” tiin a sawi.

Nova chu mi ṭha a ni a. Jehova’n a hnênah tuilêt nasa tak hmanga mi suaksualte A tihboral vek tûr thu a hrilh a.

Pathian chuan Nova chu lawng lian tak tuk a, a chhûngte leh ramsa chi tinrêngte hruai lût tûrin a hrilh bawk.

Nova chuan mite chu lo thleng tûr Tuilêt chungchâng a vaukhân a, mahse an ngaithla duh lo. Ṭhenkhatin an nuihzat a; ṭhenkhatin an haw thung a.

Lawng a tuk zawh chuan Nova chuan ramsate chu a chhûngah a hruai lût a ni.