Pathianin ṭhian atân a duh che a ni. Lei leh vâna Mi ropuiber ṭhian nih theih chu i inring ngai em? Hma sânga mi, Abrahama chu Pathian ṭhiana vuah a ni a. (Jakoba 2:23) Bible-a târ lan mi dangte pawh Pathian ṭhian an ni a, anni chuan malsâwmna tam tak an dawng a ni. Tûn laiah pawh, khawvêl hmun hrang hranga mite chu Pathian ṭhian an lo ni a. Nang ngei pawh Pathian ṭhian i ni thei a ni.

Pathian ṭhian nih chu mihring tupawh ṭhian nih aiin a ṭha zâwk a. Pathian chuan a ṭhian rinawmte chu a tibeidawng ngai lo. (Sâm 18:25) Pathian ṭhian nih chu hausak aiin a ṭha zâwk a ni. Mi hausa chu a thih hnuah, a sum leh pai mi dangin an neih sak ṭhîn a. Mahse, Pathian ṭhiante chuan tuma lâk bo theih loh ro hlu an nei a ni.​—⁠Matthaia 6:19.

Mi ṭhenkhat chuan Pathian chungchâng i zirna chu tihtâwp an tum mai thei. I ṭhiante leh i chhûngkaw zînga mite ngei pawhin chutiang chuan an ti mai thei a ni. (Matthaia 10:​36, 37) Mi dangte’n an nuihsawh che emaw, an tihṭhaih che emaw chuan, ‘Tunge tih lâwm ka duh​—⁠mihring nge Pathian? tiin inzâwt rawh. Hetiang hian ngaihtuah teh: Tuemawin chaw ei lo tûrin hrilh che sela, a thu chu i âwih ang em? I âwih lo rêng rêng ang! Nun nân chaw i mamawh si a. Mahse, Pathian chuan chatuana nung tûrin a siam thei che asin! Chuvângin, Pathian ṭhian nih theih dân i zirna chu tuman tâwptîr che suh se.​—⁠Johana 17:⁠3.