Inṭhianna hi hmangaihnaa innghat a ni. Jehova chanchin i zir tam poh leh amah i hmangaihna chu a zual sauh vang. Pathian i hmangaihna a ṭhan rualin, a rawngbâwl i châkna pawh a ṭhang zêl ang. Chu chuan Isua Krista zirtîr ni ve tûrin a chêttîr ang che. (Matthaia 28:19) Jehova Thuhretute chhûngkaw hlim taka tel vein, chatuan atân Pathian ṭhian i ni thei a ni. Eng nge i tih ngai ta?

A dânte zâwmin Pathian i hmangaihzia i lantîr tûr a ni. “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va.”​—⁠1 Johana 5:⁠3.

I thu zirte nunpui rawh. He mi chungchâng tifiahtu tehkhin thu pakhat Isua’n a sawi a. Mi fing chuan lungpui chungah in a sa a. Mi â erawh chuan ṭiauvut chungah in a sa a ni. Thlipui a lo tlehin, lungpui chunga in sak chu a chim lo va; ṭiauvut chunga sak erawh chu a chim a, a sawp nasa hle a ni. Isua chuan a zirtîrna hriaa zâwmtute chu mi fing, lungpui chunga in sa ang an ni a ti a. Mahse, a zirtîrna ngaithlaa zâwm lotute chu mi â, ṭiauvut chunga in sa ang an ni a ti thung. A tu zâwk nge an i duh?​—⁠Matthaia 7:​24-27.

 Inpumpêkna. A awmzia chu Jehova hnênah ṭawngṭaiin chatuana a duhzâwng tih i duh thu i hrilh tihna a ni. Pathian duhzâwng tihna chuan Isua Krista hnungzui i nihzia a lantîr a ni.​—⁠Matthaia 11:29.

Baptisma. “Ama hming lam chungin baptisma chang la, i sualte tlêngfai ta che.”​—⁠Tirhkohte 22:16.

Pathian rawngbâwlnaah inhmang tlat rawh. “In tih apiang chu mihring tân anga ti lovin, Lalpa tân anga ti zâwkin, châk takin ti rawh u.”​—⁠Kolossa 3:​23, 24.