Setana leh a ramhuaiho chuan Pathian rawng i bâwl chu an duh lo va. A theih phawt chuan mi zawng zawng chu Pathian aṭanga lâk hran an duh a ni. Engtin nge lâk hran an tum? An tum dân kawng khat chu sakhaw dik lo hmangin a ni. (2 Korinth 11:​13-15) Bible thutak zirtîr lo sakhua chu sakhaw dik lo a ni. Sakhaw dik lo chu pawisa lem ang a ni a​—⁠en maia a tak ang tak, hlutna nei si lo a ni. Chu chuan buaina tam tak a siam thei che.

Sakhaw dik lo chuan thutak Pathian, Jehova chu a tilâwm thei ngai dâwn lo. Isua leia a awm lai khân, amah tihhlum tum sakhaw pâwl pakhat a awm a. An ngaihah chuan an Pathian biak dân chu a dik a ni. “Pa pakhat chauh kan nei, Pathian chu,” an ti a. Chu chu Isua’n a pawm em? Pawm lo! “Nangin zawng in pa diabola hnêna chhuak in ni,” tiin a hrilh zâwk a ni. (Johana 8:​41, 44) Tûn laiah pawh mi tam tak chu Pathian biaah an inngai a; mahse, an biak taka chu Setana leh a ramhuaihote an ni tlat!​—⁠1 Korinth 10:20.

Thing ṭha lovin rah chhia a chhuah ang bawkin, sakhaw dik lo chuan thil sual titu a rah chhuak a. Mite’n thil sual an tih avângin,  khawvêl hi buainain a khat a. Nungchang bawlhhlawhna te, insualna te, rûkrûkna te, inrahbehna te, tualthah te, leh pâwngsual te a awm a ni. Hêng thil sual ti tam takte hian sakhaw vawn lai an nei a; mahse, an sakhuana chuan thil ṭha ti tûrin a chêttîr tlat lo. An thil sual tih an bânsan a nih loh chuan, Pathian ṭhian an ni thei lo vang.​—⁠Matthaia 7:​17, 18.

Sakhaw dik lo chuan milem hnêna ṭawngṭai tûrin mite a zirtîr a. Pathian erawh chuan milem hnêna ṭawngṭai lo tûrin min hrilh a ni. Chu chu a âwm a ni. Tuemaw chuan nangmah be ngai si lovin, i thlalâk chauh be ṭhîn sela i duh ang em? Chu mi chu i ṭhian dik tak a ni thei ang em? Ni thei lo vang. Jehova chuan mite chu nunna nei lo milim emaw, milem emawte be lo va, amah be zâwk tûrin a duh a ni.​—⁠Exodus 20:​4, 5.

Sakhaw dik lo chuan indo laia mi dang thah chu a pawi lo tih a zirtîr a. Isua chuan Pathian ṭhiante zîngah hmangaihna a awm dâwn tih a sawi a. Mi kan hmangaihte chu thah kan duh lo rêng rêng ang. (Johana 13:35) Mi sualte tak ngial pawh kan tân thah a thiang lo. A hmêlmate’n man an tum pawh khân, Isua chuan amah humhim nâna a zirtîrte’n an dolêt pawh a phal lo a ni.​—⁠Matthaia 26:​51, 52.

Sakhaw dik lo chuan mi sual chu hremhmun meidîlah an tla ang tih a zirtîr a. Mahse, Bible chuan sual man chu thihna a ni tih a zirtîr thung. (Rom 6:23) Jehova chu hmangaihna Pathian a ni a. Hmangaihna Pathian chuan mite chu chatuanin a nghaisa ang em? Nghaisa lo rêng rêng ang! Paradis-ah chuan, sakhaw pakhat chauh a awm ang; Jehova pawmzâwng sakhua chu. (Thu Puan 15:⁠4) Setana dâwt thua innghat sakhua zawng zawng chu a boral vek ang.