Thihna chu nunna nên a inep chiah a. Thih chu tui taka muthilh bawrh bawrh ang a ni. (Johana 11:11-​14) Mitthite chuan koh an hre thei lo va, an hmu thei lo va, engmah an ngaihtuah thei lo va, an ṭawng thei hek lo. (Thuhriltu 9:​5, 10) Sakhaw dik lo chuan mitthite chu an thlahtute nêna awmho tûra thlarau khawvêla kal niin a zirtîr a. Chu chu Bible zirtîr dân a ni lo.

Mitthite chuan min ṭanpui thei lo va, min tina thei hek lo. Mitthite tilâwm tûra rin, serh leh sângte leh inthawinate chu a hluar hle a. Chu chuan Setana dâwt thu pakhat a nih avângin, Pathian a tilâwm lo va. Mitthite lah a tilâwm thei hek lo, nunna an neih tawh loh avângin. Mitthite chu kan hlau emaw, chibai kan bûk emaw tûr a ni lo. Pathian chauh chibai kan bûk tûr a ni.​—⁠Matthaia 4:10.

Mitthite chu an lo nung leh ang. Lei paradis-ah Jehova chuan mitthite chu a la kaitho vang. Chu hun chu a lo la thleng rih lo. (Johana 5:​28, 29; Tirhkohte 24:15) Muhîl lai i kaihthawh theih ang chiahin, Pathian chuan mitthite chu a kaitho thei a ni.​—⁠Marka 5:​22, 23, 41, 42.

Kan thi tak tak lo tih ngaih dân chu Diabol-Setana thehdarh dâwt thu a ni. Setana leh a ramhuaihote chuan mitthite thlarau chu a nung a, natna leh buaina dangte an chawk chhuak tih ngaih dân mite an neihtîr a ni. Setana chuan mite chu mumang leh inlârnate hmangin a bum a. Jehova chuan mitthi biak tumtute chu a dem a ni.​—⁠Deuteronomy 18:​10-12.