Setana chuan thil sual ti tûrin mite a thlêm ṭhîn a. Pathian ṭhian nih duh chuan, Jehova huatte chu a huat ve a ngai a ni. (Sâm 97:10) Hetah hian Pathian ṭhiante pumpelh thil ṭhenkhat a awm:

Mipat Hmeichhiatna Lama Sual. “I uirê tûr a ni lo.” (Exodus 20:14) Inneih hmaa mipat hmeichhiatna hman chu a dik lo bawk.​—⁠1 Korinth 6:18.

Zu Ruihna. “Zu ruih hmangte . . . [chuan] Pathian ram an luah lo vang.”​—⁠1 Korinth 6:10.

Tualthahna, Nau Tihtlâkna. “Tual i that tûr a ni lo.”​—⁠Exodus 20:⁠13.

Rûkrûk. “I ru tûr a ni lo.”​—⁠Exodus 20:15.

Daw Heh. Jehova chuan “lei daw thei te” chu a hua.​—⁠Thufingte 6:17.

 Tharum Thawhna leh Insûm Lova Thinurna. Jehova chuan “nunrâwnna ngaina[te] . . . chu a haw ṭhîn.” (Sâm 11:⁠5) ‘Tisa thiltihte [zîngah] thinurna [a tel].’​—⁠Galatia 5:​19, 20.

Pawisa Khelhna. ‘Mi duhâmte pâwl suh u.’​—⁠1 Korinth 5:11.

Hnam leh Chi Inhuatna. “In hmêlmate chu hmangaih ula, a tiduhdahtu che u chu ṭawngṭaisak rawh u.”​—⁠Matthaia 5:​43, 44.

Pathian thu min hrilhte chu kan ṭhatna tûr a ni. Thilsual tih pumpelh reng chu a awlsam lo va. Jehova leh a Thuhretute ṭanpuinain, Pathian tilâwm lo thiltihte chu i pumpelh thei a ni.​—⁠Isaia 48:17; Philippi 4:13; Hebrai 10:​24, 25.