1, 2. Tute tân nge baptisma channa chu hun hlimawm tak a nih?

KUM tam tak chhûng Jehova rawng lo bâwl tawh i nih chuan, kan inkhâwmpuia baptisma channa thusawite chu vawi tam tak i lo ngaihthlâk tawh ngei a rinawm a. Mahse, chutiang hunah vawi eng zât pawh tel tawh mah la, tûn thleng hian inkhâwmpui neihnaa a hma lam tlara ṭhute baptisma chang tûra an ding chhuak i hmuh apiangin i rilru a khawih reng ngei ang. Chutah tak chuan mipuite chu an phûr hle a, kut ben ri nasa tak chuan a zui ta ṭhîn a ni. Jehova lama ṭang chûng mi duhawm takte i thlîr chuan hlimna mittui a tling hial pawh a ni thei. Chutiang hunah chuan kan va hlim ṭhîn tak êm!

² Tualchhûngah baptisma chan hun chu kum khatah vawi tam kan tawng lo pawh a ni thei a; mahse, vântirhkohte erawh chuan vawi tam tak an thlîr thei a ni. Chawlhkâr tinin khawvêl puma mi a sâng têlin mita hmuh theih Jehova inawpna pâwl an rawn belhchhah an hmuh huna ‘vâna mite lâwm’ dân tûr chu i mitthla thei em? (Luka 15:7, 10) Vântirhkohte chuan he pun chhohna hmuh hi an phûrpui ang tih rinhlelh rual a ni lo!—Hagaia 2:7.

3. Engvângin nge Setana chu ‘sakeibaknei rûm ṭhîn anga’ a phi ruai a, eng nge tih a duh?

³ Mahse, chumi nêna inkalh takin baptisma channa thinrim taka lo thlîrtu thlarau thil siamte an awm a. Setana  leh ramhuaite tân chuan mi a sâng telte’n he khawvêl bawlhhlawh tak an hnâwl hmuh chu a thinurthlâk hle a ni. Tihah chuan, mihring tumah hian hmangaihna dik avângin Jehova rawng an bâwl lo va, fiahna nasa tak kârah tumah an rinawm reng lo vang tiin a lo uanpui tawh si a. (Joba 2:4, 5 chhiar rawh.) Jehova hnêna inpumpêk an awm apiangin, Setana chu dawthei a nihzia a lang a ni. Kum khat chhûnga chawlhkâr tin mai hian Setana chuan vawi sâng tam tak a hmaia ben a tuar ang mai a ni. “Sakeibaknei rûm ṭhîn angin a ei theih tûr zawngin a phi ruai ṭhîn” pawh hi a mak lo ve! (1 Petera 5:8) He “sakeibaknei” hian thlarau lama min ei a châk hle a, Pathian nêna kan inlaichînna tihchhiat, a nih loh leh chhut chah hial a duh a ni.—Sâm 7:1, 2; 2 Timothea 3:12.

4, 5. (a) Jehova’n eng kawng pawimawh tak pahnihin nge Setana thununna a khuahkhirh? (b) Kristian dik chuan eng nge a rin tlat theih?

 ⁴ Hmêlma kawlh tak hmachhawn mah ila, hlauh lutuk chhan tûr kan nei lo. Engvângin nge? Jehova chuan chu “sakeibaknei rûm ṭhîn” thununna chu kawng pawimawh tak pahniha a khuahkhirh vâng a ni. Eng kawngtein nge? A hmasain, Jehova chuan Kristian dik “mipui tam tak” chu lo thleng tûr “hrehawm nasa tak” ata an dam khawchhuak dâwn tih a sawi lâwk a. (Thu Puan 7:9, 14) Pathian hrilh lâwkna chu a hlawhchham ngai lo. Chuvângin, Setana pawhin Pathian mite chu a pâwl angin a tichhe vek thei lo tih a hre ngei ang le.

⁵ A khuahkhirhna pahnihna chu hmân laia Pathian mi rinawmte zînga pakhat thusawi aṭangin a lang a. Zâwlnei Azaria chuan Lal Asa hnênah: “A lama in ṭan chhûng zawng LALPA chu in lamah a ṭang a,” tiin a sawi. (2 Chronicles 15:2; 1 Korinth 10:13 chhiar rawh.) Hun kal tawh chanchin chhinchhiah tam tak chuan, Setana’n Pathian chhiahhlawh amah hnaihtute chu a ei thei lo tih a târ lang. (Hebrai 11:4-40) Tûn laiah, Pathian hnaih tlattu Kristian chuan Diabola a do theiin, a hneh thei bawk. A nihna takah chuan, Pathian Thuin: “Diabola dodâl rawh u, tichuan a tlân bosan ang che u,” tih min tiam a ni.—Jakoba 4:7.

6. Engtin nge Setana chuan Kristian mi mal tinte chu a beih?

⁶ Entîr nei indonaah Setana chuan hnehna a chang thei lo; mahse, kan invên ṭhat loh chuan min ei thei a ni. Setana chuan Jehova nêna kan inzawmna nghet lo tûra a tih theih chuan min ei thei tih a hria a. Chu chu engtin nge tihpuitlin a tum? Nasa tak, a mi mal tak, leh vervêk taka min beihna hmangin a ni. Setana min beih dân bulpuite chu ilo sawiho vang u.

7. Engvângin nge Setana chuan Jehova mite chu nasa taka a beih?

⁷ Nasa taka beihna. Tirhkoh Johana chuan: “Khawvêl  pumhlûm hi mi sual thu thuin a awm,” tiin a sawi a. (1 Johana 5:19) He thu-ah hian Kristian dik zawng zawngte tân vaukhânna a tel. Setana chuan Pathian ngaihsak lo khawvêl mi zawng zawng a pum hmawm tawh avângin, tûnah chuan a la hmawm theih loh Jehova mite chu nasa takin a bei tawh a ni. (Mika 4:1; Johana 15:19; Thu Puan 12:12, 17) Hun tlêm tê chauh a nei tih a inhriat avângin a thinur hle a. Chuvângin, a nêksâwr nasa lehzual a. Tûn lai hian, Pathian Jehova nêna kan inlaichînna tihchhiat tuma a beihna hnuhnûng ber leh râwng ber chu kan hmachhawn mêk a ni.

8. Tirhkoh Paula’n thlarau suaksualhote kan ‘buan’ tih a sawi khân eng a tihna nge?

⁸ A mi mal taka inbuanna. Tirhkoh Paula chuan a Kristian unaute chu: “Kan buante hi . . . vân hmunahte thlarau sualho awmte an ni,” tiin a hrilh a. (Ephesi 6:12) Engvângin nge Paula chuan ‘buan’ tih ṭawngkam a hman? Chu chuan kuta inbeihna a kawh vâng a ni. Paula chuan chu thu mal chu hmangin, a mi mal takin thlarau suaksualte kan buan ṭheuh tih a sawi uar a ni. Thlarau suaksualho rinna a hluarna ramah kan awm emaw, awm lo emaw pawh ni se, Jehova hnêna kan inpumpêk hian, inbuanna hmun anga sawi theihah hian kan pên lût a ni tih kan theihnghilh ngai tûr a ni lo. Kristian tinte chu a lo berah pawh an inpumpêk aṭangin, chu inbuannaah chuan loh theih lohvin an tel a ni. Paula’n Ephesi khuaa Kristiante chuan ‘do zo’ tûr leh ‘ding’ tûra fuih nawn fo an ngai tih a hria pawh hi a mak lo ve!—Ephesi 6:11, 13-15.

9. (a) Engvângin nge Setana leh a ramhuaite chuan ‘ngamthlêmna’ chi hrang hrang an hman? (b) Engvângin nge Setana chuan kan ngaihtuahnate chu tihchhiat a tum a, chu chu engtin nge kan do theih? ( Phêk 192-193-naa bâwm chu en rawh.) (c) Eng ngamthlêmna nge kan sawiho vang?

⁹ Ruahmanna vervêk takte. Paula chuan Kristiante chu Setana “ngamthlêmnate” do tûrin a fuih a. (Ephesi 6:11) Tah hian pakhat aia tam sawina a hmang tih chhinchhiah ang che. Thlarau suaksualho chuan chhan ṭha tak neiin ruahmanna  vervêk pakhat chauh hmang lovin, chi hrang hrang an hmang a. Ringtu ṭhenkhat chu thlêmna pakhata an dinngheh laiin hun rei tak a liam hnuah thlêmna dang avângin an tlu a ni. Chuvângin, Diabola leh a ramhuaite chuan min bih chiang ṭheuhvin, kan chak lohna lai ber chu an zawng a. Tichuan, thlarau lama chak lohna kan neih apiang chu an hmang ṭangkai ta ṭhîn a ni. Mahse, Bible-a târ lan a nih avângin, Diabola thil tih dân tam tak kan hre thei a, a lâwmawm hle. (2 Korinth 2:11) He lehkhabu tîr lamah khân, hausak âtchilh te, ṭhian sual kawmna te, leh nungchang bawlhhlawhna ang chi Setana ruahmanna siamte chu kan sawiho tawh a. Tûnah chuan Setana ngamthlêmna dang pakhat—dawithiamna—chu i lo sawiho vang u.

10. (a) Dawithiamna chu eng nge ni? (b) Engtin nge Jehova’n dawithiamna chu a thlîr a, engtin nge i thlîr?

¹⁰ Dawithiamna, a nih loh leh ramhuai zâwlna chuan mi chu thlarau suaksualte nên tlang taka inzawmna a neihtîr a. Aien thiamna te, dawi hmanna te, mi dawi te, leh mitthi biak pawhnate chu dawithiamna zînga mi a ni. Chiang taka kan hriat tawh angin, Jehova tân dawithiamna chu thil “tenawm” tak a ni. (Deuteronomy 18:10-12; Thu Puan 21:8) Keini pawh ‘sual lam haw’ tûr kan nih avângin, thlarau suaksualte nêna inkûngkaihna neih chu kan tân pawm theih a ni lo. (Rom 12:9) Chu chu kan Pa vâna mi, Jehova phatsanna thiltih tenawm tak a va ni dâwn êm!

11. Setana’n dawithiamna lama min inhnamhnawihtîr theih chuan engvângin nge chu chu a tân hnehna ropui tak a nih ang? Entîrna pe rawh.

¹¹ Mahse, dawithiamnaa inhman hi Jehova laka rinawm lohna sual lian tak a nih avângin, Setana chuan kan zînga ṭhenkhat chu chuta inhnamhnawihtîr a tum tlat a. Setana’n ramhuai nêna inkûngkaihna nei tûra Kristian pakhat a hmin theih apiangin, hnehna ropui tak a chang a ni. Engvângin nge? He khaikhinna hi han ngaihtuah teh:  Sipai pakhat chuan an pâwl phatsanin, an hmêlma pâwl zâwm ta se, a va zawm tâk sipai hotu chu a lâwm hle ngei ang. A phatsan tâk sipai hotu deusawh nân, chu sipai chu hnehna lâwmman ropui tak anga pho chhuakin kawng a zawhpui hial mai thei a ni. Chutiang bawkin, Kristian chu dawithiamna lama a inhnamhnawih chuan, Jehova chu duh rêng vâng leh hre reng chunga phatsanin, Setana thu hnuaiah a indah a ni. Setana tân chu phatsantu chu indonaa lâwmman ang maia pho chhuaka kawng zawhpui a nawm dân tûr chu han mitthla teh! Kan zîngah hian Diabola hnêna chutiang hnehna pe duh kan awm ang em? Awm hauh lo vang! Phatsantu kan ni si lo va.

12. Setana chuan dawithiamna kan thlîr dân thunun nân eng tih dân nge a hman?

¹² Dawithiamna kan huat chhûng chuan, chumi hmangin Setana’n min ngam lo vang. Chuvângin, kan ngaihtuahna a thlâk danglam a ngai tih a hria a ni. Engtin nge? “Thil ṭha lo chu thil ṭha tia, thil ṭha chu thil ṭha lo” ti tûr khawpa kan rilru tihbuai dân kawng a dap a ni. (Isaia 5:20) Chutianga ti tûrin, Setana chuan hmân aṭanga a lo hman tawh, tih dân hlawhtling tak zînga pakhat—rinhlelhna awmtîrtu zawhna—chu a hmang a ni.

13. Engtin nge Setana chuan rinhlelhna awmtîrtu zawhnate a hman?

¹³ Hun kal tawha chu tih dân a hman dân chu chhinchhiah ang che. Eden huanah khân, Evi hnênah: “Pathianin, ‘Huana thing rah rêng rêng hi in ei tûr a ni lo,’ a ti elo maw?” tiin a zâwt a. Joba hun lai khân, vântirhkohte vâna an inkhâwmnaah Setana chuan: “Joba chuan vâng awm lovin a ṭih em ni?” tiin zawhna a siam a ni. Tin, Isua’n leia rawng a bâwl ṭantirh khân Setana’n a hnênah: “Pathian Fapa i nih chuan hêng lung hi chhanga chang tûrin thu pe rawh,” tia sawiin a cho bawk. Han mitthla teh—Isua chungchângah chuan a hma chawlhkâr ruka Jehova thusawi ngei:  “Hei hi ka Fapa duh tak, ka lawm êm êma chu a ni,” tih chu nuih sawh nân a hmang ngam a ni.—Genesis 3:1; Joba 1:9; Matthaia 3:17; 4:3.

14. (a) Setana chuan dawithiamna chungchânga rinhlelhna siam nân eng ang ngamthlêmna nge a hman? (b) Eng nge kan ngaihtuah ang?

¹⁴ Tûn laiah pawh dawithiamna chu thil sual tak a ni tih chungchângah rinhlelhna siam nân chutiang tih dân bawk chu a hmang a. Lungchhiatthlâk takin, ringtu ṭhenkhatte rilruah rinhlelhna a tuh hlawhtling a ni. Anni chuan dawithiamna lam thil ṭhenkhat chu thil sual lutuk niin an ngai lo ṭan a. (2 Korinth 11:3) Engtin nge chûng mite chu an ngaihtuahna siam ṭha tûra kan ṭanpui theih? Setana ngamthlêmnate chuan min thunun lo tûrin eng nge kan tih theih? A chhân nân, Setana’n hriat vak lohva dawithiamna hmanga a tihbawlhhlawh kan nuna thil pahnih i lo sawiho vang u. Chûngte chu intihhlimna leh damdawi lama inenkawlna hi a ni.

15. (a) Engtin nge Khawthlang Lam ram tam takte chuan dawithiamna chu an ngaih? (b) Engtin nge khawvêlin dawithiamna a thlîr dân chuan Kristian ṭhenkhat chu a nghawng?

¹⁵ A bîk takin, Khawthlang Lam ramte chuan thlarau khawvêl lam thil te, dawi te, leh dawithiamna lam thil dangte chu an ngai holam telh telh a. Film-te, lehkhabute, TV program-te, leh computer games-ahte chuan ramhuai nêna inkûngkaihna thiltihte chu nuam tak, finthlâk tak, leh hlauhawm lo tak anga lantîrna a tam tawlh tawlh bawk. Thlarau khawvêl lam thil târ lanna film leh lehkhabu ṭhenkhat chu a lâr êm avângin, chutiang thil ngainatute chuan pâwl an din hial a ni. Ramhuaite chu thlarau khawvêl lam thil a hlauhawmnate holam taka lantîrna kawngah an hlawhtling tih a chiang hle. Dawithiamna lam holam taka ngaihna chuan Kristiante chungah nghawng a nei em? Ṭhenkhatte ngaihtuahna chu a nghawng a ni. Engtin nge?  Thil nih phung pakhat târ lang ta ila, Kristian pakhat chuan ramhuai lam thil hlîr târ lanna film a en hnuah, “A film chu ka en a; mahse, dawithiamna lam thil ka ti ve hlei nêm,” tiin a sawi a ni. Engvângin nge chutiang ngaihtuahna chu a hlauhawm?

16. Engvângin nge thlarau khawvêl lam hlîr târ lanna intihhlimna thlan chu a hlauhawm?

¹⁶ Dawithiamna lam thilte tih leh en chu inang lo mah se, thlarau khawvêl lam thilte en chu a hlauhawm lo tihna a ni rêng rêng lo. Engvângin nge? Hei hi han ngaihtuah teh: Pathian Thu chuan Setana leh a ramhuaite’n kan ngaihtuahna an hre thei lo tih a târ lang a. * Chuvângin, a hmaa kan sawi tawh angin thlarau suaksualte chuan kan ngaihtuahna leh thlarau lama kan chak lohna laite an hriat theih nân, kan intihhlimna thlan pawh tiamin, kan thiltihte chu an enthla reng a ni. Kristianin a awm dân aṭangin thlarau zâwlna te, mitdawivaih te, ramhuai man thiltihte, a nih loh leh chutiang thil telna film emaw, lehkhabu emawte a duhzia a lan chhuahtîr chuan, ramhuaite hnênah a chak lohna lai a hriattîr tihna a nih chu! Chutih hunah, ramhuaite chuan chu Kristianin a târ lan a chak lohna lai chu hmang ṭangkaiin, an buanthlûk thlengin an bei zual sauh thei a ni. A nihna takah chuan, thlarau khawvêl lam thil chawi lârtu intihhlimnate hriat châkna neitu chu a tâwpah dawithiamna lamah a inhmang ṭhîn a ni.—Galatia 6:7 chhiar rawh.

17. Setana chuan dam lote thlêm nân eng tih dân verther tak nge a hman mai theih?

¹⁷ Setana chuan intihhlimna lama kan duhzâwng mai ni lovin, damdawia inenkawl kan mamawhna pawh hman ṭangkai a tum a ni. Engtin nge? Kristian pakhat chu chi hrang hranga enkawl a nih hnuah pawh a hrisêlnain chhiat lam a pan  zêl avângin a lunghnual hle mai thei a. (Marka 5:25, 26) Chu chuan Setana leh a ramhuaite hnênah hun remchâng ṭha tak a pe thei a ni. Ramhuaite chuan a dinhmun avânga lunghnualtu dam lo chu “mitdawivaih thil,” a nih loh leh dawithiamna lam nêna inkûngkaih inenkawlna thlang tûrin an thlêm pawh a ni thei. (Isaia 1:13, NW) Chûng ramhuaite ngamthlêmna chu a hlawhtling a nih chuan, dam lo chuan Pathian nêna an inlaichînna chu an tichhe thei a ni. Eng kawngin nge?

18. Kristian chuan eng ang inenkawlnate nge a hnâwl ang a, engvângin nge?

¹⁸ Jehova chuan “mitdawivaih thil” hmangtu Israelte chu: “In kut in phar hunah pawh in lakah ka mit ka hup tawh ang a: a ni, vawi tam tak in ṭawngṭai hunah pawh ka ngaithla tawh lo vang,” tiin a vaukhân a. (Isaia 1:15) Kan ṭawngṭaina leh Jehova ṭanpuina kan dawnna tûr dâl theitu apiang pumpelh chu kan duh a—kan dam loh hunah chutiang thil pumpelh chu kan duh lehzual a ni. (Sâm 41:3) Chuvângin, inenkawlna ṭhenkhat chu dawithiamna thil nên a inkûngkaih tih a lan chuan Kristian dik chuan a hnâwl tûr a ni. (Matthaia 6:13) Chutiang chuan, Jehova ṭanpuina a dawng zêl thei ang.—Phêk 194-naa “ Dawithiamna A Ni Tak Tak Em?” tih bâwm chu en rawh.

19. (a) Diabola chuan a thiltihtheihna chungchângah mi tam takte chu engtin nge a bum? (b) Kristiante’n eng thawnthute nge an sawi loh vang?

¹⁹ Khawthlang Lam rama mi tam takte chuan Setana  thiltihtheihna hlauhawmna chu an ngaih holam hle laiin, khawvêl hmun dangah erawh chuan an la thutak hle thung a. Chûngah chuan Diabola chuan a thiltihtheihna neih aia nasa zâwk daih neia ring tûrin mite a bum a ni. Mi ṭhenkhat chu thlarau suaksualte hlau rêng rêngin an nungin, an ei a, hna an thawkin, zân an mu bawk. Ramhuaite thiltihtheihzia thawnthu hriat tûr a tam hle a. Chutiang thawnthute chu phûr taka sawi a ni ṭhîn a; mite chuan ngaihthlâk nuam an ti hle ṭhîn. Chutiang thawnthute chu kan sawi darh tûr a ni em? Ni lo, Pathian betu dikte chuan chhan pawimawh pahnih avângin an sawi darh lo a ni.

20. Engtin nge mi chuan tum loh deuhvin Setana ngaih dân a thehdarh theih?

²⁰ A hmasain, miin ramhuaite thiltih chanchin a sawi hian, Setana tâna ṭha tûr a thawhsak tihna a ni. Engtin nge a nih theih? Pathian Lehkha Thu chuan Setana’n thiltihtheihna a nei tih a sawi laiin, “dâwt thilmak tinrêng” leh “bumna tinrêng” a hman thu a sawi bawk. (2 Thessalonika  2:9, 10) Setana chu mi bum thiam tak a nih avângin, dawithiamna lama rilru âwntute thunun dân leh thil dik lote âwihtîr dân chu a hria a ni. Chutiang mite chuan thil engemaw chu hmu leh hria angin an inngai tlat a, an thiltawn chu thudik angin an sawi chhâwng ṭhîn. A hnuah, an thil sawi chu an sawichhâwn ngun êm avângin an sawi pung telh telh ṭhîn a. Kristianin chutiang thawnthu a theh darh a nih chuan, Diabola, “dâwt pa” duhzâwng a ti tihna a ni ang a. Setana ngaih dân a thehdarh a ni ang.—Johana 8:44; 2 Timothea 2:16.

21. Eng chanchin nge sawi kan duh ber?

²¹ Pahnihnaah, Kristian chuan hun kal tawhah thlarau sualte nêna inhmachhawnna a lo nei tak tak pawh ni se, a Kristian unaute hnênah chutiang chanchin chu a hrilh chhâwng leh ṭhîn tûr a ni lo. Engvângin nge? ‘Isua, kan rinna siamtu leh tifamkimtu lam chu en tlat’ tûra fuih kan nih vâng a ni. (Hebrai 12:1, 2) Ni e, Setana ni lovin, Krista chu kan en tlat tûr a ni. Isua chuan leia a awm laiin, Setana thil tih theih leh theih lohte chungchâng tam tak sawi tûr a hre chung pawhin, a zirtîrte hnênah thlarau sualte thawnthu a sawi lo chu a chhinchhiah tlâk hle. Chu ai chuan, Lalram thuchah chauh chu a sawi reng zâwk a ni. Chuvângin, Isua leh a tirhkohte entawnin, “Pathian thiltih ropuite” sawi bera neih chu kan duh a ni.—Tirhkohte 2:11; Luka 8:1; Rom 1:11, 12.

22. Engtin nge ‘vâna mite lâwmna’ kan awmtîr theih?

²² Dik takin, Setana chuan Jehova nêna kan inlaichînna tihchhiat nân dawithiamna pawh tiamin ngamthlêmna chi hrang hrang a hmang ngei mai. Mahse, thil suaksualte chu hua a, thil ṭhate vuan tlatin, Setana’n dawithiamna rêng rêng hnâwl kan tumna a tihchhiat chu i phal lo vang u. (Ephesi 4:27 chhiar rawh.) Diabola a awm tawh loh thlenga ‘a ngamthlêmnate kan do’ zêl chuan, “vâna mi an lâwm” dân tûr chu han mitthla teh!—Ephesi 6:11; Luka 15:7.