1, 2. Eng zawhna nge kan sawiho vang a, engvângin nge?

NUPUI pasal nei tawh i ni em? I nih chuan, in inneihnaah hlimna i hmu em? Nge ni a, harsatna lian tak tak i nei zâwk? I kawppui nên chuan in inhlat tial tial em? Innei reng tho siin, hlim lo takin i awm em? I awm a nih chuan, in inngainatna a daih tâk avângin i lungngai ngei ang. Kristian i nih angin, in inneihnain i hmangaih tak Pathian Jehova a chawimawi chu i duh ngei ang. Chuvângin, tûna i dinhmun chu i lungkham ber leh lungngaihna thlentu ber a ni ang. Chutiang a nih pawhin, i dinhmun chu beisei bo angah ngai suh ang che.

² Tûn laia Kristian nupa ṭha takte chu tûn hma chuan inlaichînna nghet nei lova khawsa dûn mai maite an ni a. Mahse, an inlaichînna tihngheh theih dân kawng an hmu a ni. Nang pawhin in inneihnaah lungawina nasa zâwk i hmu thei. Engtin nge?

3, 4. Engvângin nge nupate’n Pathian hnaih an tum hian, anmahni pawh an inhnaih ang? Entîrna pe rawh.

³ I kawppui nêna Pathian hnaih in tum tlat chuan, in pahnihin in inhnaih lehzual ang. Engvângin nge? Tehkhin thu pakhat hi han ngaihtuah teh: Tlâng pakhat a bul ṭhut zau tak, a chhîp lam zuih chho tial tial chu mitthla ang che. Mipa chu hmâr lam tlâng bul ṭhuta a din laiin, hmeichhia erawh chu chhim lam tlâng bul ṭhutah chuan a ding a. An  pahnihin tlângah chuan an lâwn chho ṭan a. Tlâng bul ṭhut hnaiha an awm lai chuan, an inhlat hle a. Mahse, an han lâwn chho zêl a, tlâng chhîp an hnaih chuan an inhnaih tial tial a ni. He tehkhin thua zir tûr ṭha tak hi i hmu thiam em?

⁴ Jehova rawngbâwl nâna ṭan in lâkna chu tlânga lâwn tûra ṭan in lâkna nên khaikhin theih a ni a. Jehova i hmangaih avângin, tlânga lâwn tûrin theih tâwp i chhuah ṭan dêr tawh a tih theih a ni. Mahse, i kawppui nên in inhlat viau a nih chuan, chu tlâng pang lehlam ve ve aṭanga lâwn tum ang in ni ang. Mahse, in han lâwn chhoh zêl chuan, eng thil nge thleng ang? Atîrah chuan in inkâr chu a zau hle pawh a ni thei a. Mahse, Pathian hnaih tûra in thawhrim poh leh—tlânga in lâwnsân poh leh—i kawppui nên chuan in inhnaih tial tial dâwn a ni. Dik tak chuan, Pathian hnaih  lehzual chu i kawppui hnaih lehzual theih dân ber a ni. Mahse, chu chu engtin nge i tih theih ang?

5. (a) Jehova leh kawppuite hnaih theih dân kawng khat chu eng nge ni? (b) Engtin nge Jehova chuan inneihna a thlîr?

⁵ Tlânga lâwn anga sawi theih, Pathian in hnaih theih dân kawng pawimawh tak pakhat chu i kawppui nêna inneihna chungchânga Bible fuihna thute zawm hi a ni a. (Sâm 25:4; Isaia 48:17, 18) Chuvângin, tirhkoh Paula fuihna chiang tak hi han ngaihtuah teh. Ani chuan: “Mi zawng zawng zîngah inneih hi chawimawiin awm sela,” tiin a sawi a ni. (Hebrai 13:4) Chumi awmzia chu eng nge ni? ‘Chawimawi’ tih thu mal hian thil engemaw ngaihsân leh ngaihhlutna a kâwk a. Chutiang tak chuan Jehova’n inneihna chu thil hlu tak angin a thlîr a ni.

6. Inneihna chungchânga Paula thusawi thu hnu leh thu hmate hian eng nge a târ lan a, engvângin nge chu chu rilrua vawn reng a pawimawh?

⁶ Pathian chhiahhlawh i nih angin, i kawppui nên chuan inneihna chu a hluin, a thianghlim tih in hre tawh a. Inneihna bul ṭantu chu amah Jehova ngei hi a ni. (Matthaia 19:4-6 chhiar rawh.) Mahse, inneihnaah harsatna i tâwk mêk a nih chuan, inneih chu chawimawiin a awm tûr a ni, tih hriatna ringawt chuan i kawppui nêna inhmangaih tak leh zah taka incheibâwl tawn tûrin a chêttîr thei lo che u pawh a ni thei. A nih chuan, chutianga ti tûrin engin nge chêttîr ang che u? Paula’n chawimawina lantîr chungchâng a sawi dân hi ngun takin lo chhinchhiah rawh. Ani chuan, ‘inneih hi chawimawi a ni’ a ti lo va; ‘inneih hi chawimawiin awm rawh se’ a ti zâwk a ni. Paula chuan a ngaih dân a sawi mai a ni lo, fuihna a pe a ni. *  Chumi hriat rengna chuan i kawppui zahna lantîr leh tûrin a chêttîr lehzual thei che a ni. Engvângin nge?

7. (a) Eng Bible thupêk nge kan hlen chhuah a, engvângin nge? (b) Thu âwihna chuan eng rah ṭha nge a chhuah?

⁷ Zirtîr siam tûr emaw, inkhâwm tûr emawa fuihna ang chi Bible-a thupêk dangte i thlîr dân chu han ngaihtuah lawk teh. (Matthaia 28:19; Hebrai 10:24, 25) Chûng thupêkte hlen chhuah chu harsat châng a awm ngei ang. Thu i hrilhte chuan an lo chhâng lêt ṭha lo che pawh a ni thei a, i hnathawh chuan a tihchauh lutuk che avângin inkhâwma tel i harsat pawh a ni thei bawk. Chuti chung pawhin, Lalram thuchah chu i hril zawm zêlin, i inkhâwm zêl bawk a ni. Tumahin, Setana ngei pawhin an dang thei lo che! Engvângin nge? Thinlung taka Jehova i hmangaihna chuan a thupêkte zâwm tûra a chêttîr vâng che a ni. (1 Johana 5:3) Chu chuan eng rah ṭha nge a chhuah? Thu hrilh rawngbâwlna leh inkhâwmnaa tel chu Pathian duhzâwng a ni tih i hria a, chu chuan chhûngrila thlamuanna leh hlimna a pe che a. Chûng chuan i chakna a tithar leh a ni. (Nehemia 8:10) Hetah hian zir tûr eng nge awm?

8, 9. (a) Inneihna chawimawi tûra fuihna zâwm tûrin engin nge min chêttîr thei a, engvângin nge? (b) Tûnah eng thil pahnih nge kan ngaihtuah ang?

⁸ Pathian i hmangaihna thûk tak chuan harsatna kârah pawh thu hril tûr leh inkhâwm tûra thupêk zâwm tûrin a chêttîr che ang bawk hian, Jehova i hmangaihna chuan harsa lutuk anga a lan hunah pawh Bible fuihna, ‘inneih hi chawimawiin awm rawh se,’ tih hi zâwm tûrin a chêttîr thei che a ni. (Hebrai 13:4; Sâm 18:29; Thuhriltu 5:4) Chu bâkah, thu hrilhna leh inkhâwma tel tûra i thawhrimna chu Pathianin nasa taka mal a sâwm ang bawkin, in inneihna chawimawia awm tûra i thawhrimna chu Jehova’n a hriain, mal a sâwm ang.—1 Thessalonika 1:2, 3; Hebrai 6:10.

⁹ Chuti a nih chuan, engtin nge in inneihna chu chawimawia  i awmtîr theih ang? Inneih ruahmanna tichhe thei nungchangte chu i pumpelh a ngai a. Chu bâkah, in inneihna tinghet thei thilte i tih a ngai bawk a ni.

10, 11. (a) Eng ang nungchangin nge inneihna chu chawimawi lo? (b) Kan kawppuite hnênah eng zawhna nge kan zawh ang?

¹⁰ Kristian nupui pakhat chuan: “Tuar chhuak thei tûra chakna dîlin Jehova hnênah ka ṭawngṭai a,” a ti a. Eng thil nge a tawrh chhuah ngai chu? “Ka pasal chuan ṭawngkam na taktein min ân khum ṭhîn a. Hmuh theihin hliam lo mah ila, ‘Phurrit i ni,’ tih leh ‘Hlutna rêng i nei lo,’ tih ang chi ṭawngkam na taka min ṭawng khumnate chuan ka thinlungah ser lian tak a siam a ni,” tiin a sawi. He Kristian nupui hian thil ngaihmawh awm tak—nupa inkâra ṭawngkam na tak hmanna—chu a sawi chhuak a ni.

¹¹ Kristian chhûngkuaa nupate chuan theihnghilh mai theih loh tûr ṭawngkam na tak tak hmanga rilru natna an inthlen ṭhîn hi chu a va pawi tak êm! Ṭawngkam na tak hmanna chuan inneihna a chawimawi lo tih a chiang hle. Hemi chungchângah hian in inneihna chu eng nge a an? Hriat theih dân kawng khat chu i kawppui hnênah inngaitlâwm taka: “Ka ṭawngkam hman hian engtin nge a nghawng che?” tia zawh hi a ni a. I kawppui chuan i ṭawngkamin a rilru a tina fo nia a hriat chuan, dinhmun a ṭhat zâwk theih nân i insiam ṭha tûr a ni.—Galatia 5:15; Ephesi 4:31 chhiar rawh.

12. Engtin nge sakhaw biakna chu Pathianin a pawm loh theih?

¹² I kawppui chunga i ṭawngkam hman chuan Jehova nêna in inlaichînnaah nghawng a nei tih hre reng ang che. Bible chuan: “Tupawh sakhaw ngaihsak nia inringa a lei vêng ṭha si lo va, mahni thinlung inbum zâwk chu, chu mi sakhaw biak dân chu engmah a ni lo ve,” tiin a sawi. (Jakoba 1:26) I ṭawngkam hman chu Pathian i biakna ata lâk  hran theih a ni lo. Bible chuan miin Pathian rawng a bâwl chhûng chuan a in chhûngkhura thilthlengin pawimawhna a nei lo tih ngaih dân chu a pawm lo a ni. Khawngaihin, mahni inbum suh ang che. Thil pawimawh tak a ni si a. (1 Petera 3:7 chhiar rawh.) Thiamna leh ṭhahnemngaihna i nei pawh a ni thei; mahse, i kawppui chu ṭawngkam na tak taka ṭawng khum a, i tihnat luih chuan inneih ruahmanna i chawimawi lo tihna a ni a, i sakhaw biakna chu Pathianin a pawm lo thei a ni.

13. Engtin nge mi chuan a kawppui rilru chu a tihnat theih?

¹³ Nupui pasal neite chu a pehhêl zâwnga rilru natna inthlen lo tûrin an fîmkhur a ngai bawk. Entîrna pahnih hi han ngaihtuah teh: Pasal tel lova fate enkawltu nu pakhat chuan nupui nei unaupa pakhat chu thurâwn dîlin a phone ziah a, rei tak tak an inbe ṭhîn a ni; unaupa tlangvâl chuan pasal nei unaunu chu chawlhkâr tin thu hrilh rawngbâwlnaah hun tam tak a hmanpui ṭhîn bawk a. Hêng entîrna pahniha nupui pasal neite hian thiltum ṭha an nei pawh a ni thei; mahse, an thiltih chuan engtin nge an kawppuite chu a nghawng theih? Chutiang dinhmun tawngtu nupui chuan: “Ka pasalin kohhrana unaunu pakhat tân hun tam tak pein, a ngaihsak hle tih ka hriat chuan ka rilru a na hle a. Chu chuan pawimawh lo zâwk nia inhriatna min neihtîr a ni,” tiin a sawi.

14. (a) Genesis 2:24-ah inneihnaa eng mawhphurhna nge târ lan a nih? (b) Eng nge kan inzawh ang?

¹⁴ He unaunu leh chutiang dinhmuna ding nupui pasal nei mi dangte pawhin rilru natna an nei chu hriatthiamawm tak a ni. An kawppuite chuan nupui pasalte tâna Pathian kaihhruaina bul ber: “Mipain a nu leh a pa a kalsan ang a, a nupui a vuan ang,” tih chu an ngaihthah a ni. (Genesis 2:24) Nupui pasal neite chuan an nu leh pate chu an la zah reng tho va; mahse, Pathian ruahmannaah chuan an ngaihsak ber tûr chu an kawppuite hi a ni a.  Chutiang bawkin, Kristiante chuan an unaute chu hmangaih hle mah se, an mawhphurhna ber chu an kawppuite ngaihsak hi a ni. Chuvângin, Kristian nupui pasal neite chuan unau dangte, a bîk takin an mipat hmeichhiatpui ni lote nên hun tam tak an hman dun emaw, an innêl lutuk emaw hian chu chuan an inneihnaah inrem lohna a awmtîr thei a. Chu chu in nupa inkâra inrem lohna awmtîrtu  a ni thei ang em? Heti hian inzâwt rawh, ‘Ka kawppuiin a dawn tûr hun te, ngaihsakna te, leh hmangaihnate chu ka pe tak zet em?’ tiin.

15. Matthaia 5:28 nêna inmilin, engvângin nge nupui pasal nei Kristiante chuan an mipat hmeichhiatpui ni lo tuemaw chu mawi lo khawpa ngaihsakna an pumpelh ang?

¹⁵ Chu bâkah, an mipat hmeichhiatpui ni lote mawi lo khawpa ngaihsaktu Kristian nupui pasal nei tawhte chu âtthlâk takin dinhmun hlauhawmah an indah a ni. Nupui pasal nei lai Kristian ṭhenkhat chuan an nêl lutukte nêna inngaihzâwnna rilru an nei chho chu a lungchhiatthlâk hle. (Matthaia 5:28) Chutianga inngainatna chuan inneihna chawimawi lohna nasa zâwk a thlen thei a ni. Hemi chungchânga tirhkoh Paula thusawi hi han ngaihtuah teh.

16. Inneihna chungchângah Paula’n eng thupêk nge a pêk?

¹⁶ Paula chuan “inneih hi chawimawiin awm sela,” tia a fuih hnuah: “Khum pawh tihbawlhhlawh lohvin awm rawh se; inngaite leh uirête chu Pathianin a ngaihtuah dâwn si a,” tiin vaukhânna a pêk belh a ni. (Hebrai 13:4) Ani chuan “khum” tih thu mal chu mipat hmeichhiatna chungchâng sawi nân a hmang a. Chutiang inlaichînna chu nupa inkâr chauhva neih a nih chuan ‘a bawlhhlawh lo,’ a nih loh leh a thianghlim a ni. Chuvângin, Kristiante chuan: “I tleirâwl laia nupuiah chuan hlim rawh,” tih thlarauva thâwk khum thu chu an zâwm a ni.—Thufingte 5:18.

17. (a) Engvângin nge Kristiante chu uirêna chungchânga khawvêl thlîr dânin a thunun loh vang? (b) Engtin nge Joba entawn tûr siam chu kan zui theih?

¹⁷ Mahni nupui pasal ni lo mutpuitute chuan nungchang lama Pathian dânte an ngaihnêpzia an târ lang a. Tûn laia mi tam takte chuan uirêna chu an pawm zam thei a ni. Mahse, uirêna chungchânga mite thlîr dân chuan Kristiante ngaih dân chu a thunun tûr a ni lo. Anni  chuan a tâwpah, “inngaite leh uirête” chu mihringte ni lovin, “Pathianin a ngaihtuah dâwn,” tih an hria a. (Hebrai 10:31; 12:29) Chuvângin, Kristian dikte chuan hemi chungchânga Jehova thlîr dân chu an pawm tlat a ni. (Rom 12:9 chhiar rawh.) Thlahtu Joba chuan: “Ka mit atân thuthlung ka siam a,” tia a sawi hi hre chhuak ang che. (Joba 31:1) Ni e, Kristian dikte chuan uirêna kawnga pên khat lek pawh an pên loh nân an mit an thunun a; an kawppui ni lote chu ngaih châkna nên an melh lo.—Thu Belhna, phêk 219-221-na chu en rawh.

18. (a) Jehova mithmuhah uirêna chu eng ang khawpa sual pawi nge a nih? (b) Uirêna leh milem biakna chuan inanna eng nge an neih?

¹⁸ Jehova mithmuhah uirêna chu eng ang khawpin nge a sual? Mosia Dân chuan hemi chungchânga Jehova ngaih dân hre thiam tûrin min ṭanpui a. Israel ramah khân, uirête leh milem betute hremna chu tihhlum hi a ni. (Leviticus 20:2, 10) Hêng thil pahnihte inanna hi i hmu thiam em? Awle, milem betu Israel mi chuan Jehova nêna an thuthlun chu a bawhchhia a. Chutiang bawkin, Israel mi uirê chuan a kawppui nêna an thuthlun chu a bawhchhia a ni. An pahnih hian thil suaksual tak an ti a. (Exodus 19:5, 6; Deuteronomy 5:9; Malakia 2:14 chhiar rawh.) Chuvângin, Pathian rinawm leh rin tlâk, Jehova hmâah chuan thiam loh an chang ve ve a ni.—Sâm 33:4.

19. Engin nge mi chu uirêna hnâwl a tumna tinghet thei a, engvângin nge?

¹⁹ Kristiante chu Mosia Dân hnuaiah an awm lo tih chu a dik a. Mahse, hmân lai Israel ramah khân, uirêna chu sual pawi tak a ni tih hriatna chuan Kristianin chutiang sual tih loh a tumna chu a tinghet sauh vang. Engvângin nge? He khaikhinna hi han ngaihtuah teh: Biak inah lûtin, milem hmaah ṭhingṭhiin i ṭawngṭai ang em? ‘Ṭawngṭai hauh lo vang!’ tiin i sawi ngei ang. Mahse, chutianga ti tûr chuan sum tam tak pêk ni dâwn ta la, i ti mai ang em?  ‘Teuh lo mai!’ tiin i chhâng ngei ang. Kristian dik tân milem biakna hmanga Jehova phatsan a ngaiha ngaihtuah ringawt pawh chu thil tenawm tak a ni. Chutiang bawkin, thil sual tih chu eng anga châkawm pawh ni se, Kristiante chuan, an Pathian Jehova leh an kawppuite phatsan chu a ngaihin an ngaihtuah tûr a ni lo. (Sâm 51:1, 4; Kolossa 3:5) Jehova chawimawi lo leh inneihna thianghlim tibawrhbângtu thiltihna hmanga Setana tihlâwm chu kan duh ngai lo vang.

20. Inneihna ṭhenkhatah eng nge thleng? Entîrna pe rawh.

²⁰ Inneihna chawimawi lo thiltihte i pumpelh bâkah, i kawppui zahna nei leh tûrin eng nge i tih theih? A chhân nân, inneihna chu in pakhat angin han ngaihtuah teh. A dawtah, nupa inkâra ngilneihna ṭawngkam te, thiltihte, leh ṭawngkam dangte chu in timawi zualtu in cheimawina angah ngai ang che. Inpawh tak in nih chuan, in inneihna chu mawi taka chei in nuam tak ang a ni a. In inngainatna a reh tial tial chuan, chûng cheimawinate chu zawi zawia bovin, in inneihna chu cheimawi loh in ang mai a ni ang. ‘Inneih hi chawimawiin awm rawh se,’ tih Pathian thupêk zawm i duh avângin, chu dinhmun siam ṭhat chu i duh ngei ang. Thil hlu tak leh chawimawi tlâk chuan siam ṭhat leh din ṭhat a phû si a. Engtin nge chu chu i tih theih? Pathian Thu chuan: “Finna in chu sak a ni a, hriat thiamnain tihngheh a ni. Tin, hriatna avângin pindan chu sum hlu tak leh duhawm taka tihkhahin a awm,” tiin a sawi a. (Thufingte 24:3, 4) Hêng thute hi inneihnaa nunpui theih a nih dân ngaihtuah rawh.

21. Engtin nge kan inneihna chu zawi zawia kan tihngheh theih? ( Phêk 131-naa bâwm chu en bawk rawh.)

²¹ In chhûng nuam tak tikhattu sum hlu takte zîngah chuan hmangaihna dik tak te, Pathian ṭihna te, leh rinna nghet tak ang chi miziate a tel a. (Thufingte 15:16, 17;  1 Petera 1:7) Chûng miziate chuan inneihna nghet tak a siam a ni. Mahse, a chunga târ lan tâk thufingah khân, pindante chu sum hlu taka tihkhah a nih dân i lo hria em? “Hriatna avângin” tihkhah a ni. Ni e, Bible hriatna chu nunpui a nih hian, chu chuan mite ngaihtuahna thlâkthleng tûr leh an inhmangaih tawnna tithar leh tûrin thiltihtheihna a nei a ni. (Rom 12:2; Philippi 1:9) Chuvângin, inneihna nêna inkûngkaih ni châng, a nih loh leh Vênnainsâng emaw, Awake! emawa Bible ṭanchhan thuziakte in chhiar dun apiangin, in in cheina tûr, in cheimawina duhawm tak bih chiang ang in ni. Jehova i hmangaihna chuan tûna i bih chian tâk thute nunpui tûra a chêttîr che chuan, in cheimawinatein in chênna pindan chu i cheimawi anga sawi theih a ni ang. Chutiang chuan, in lo neih tawh ṭhin inngainatna chu in nei lêt leh thei ang.

22. Inneihna tinghet tûrin keimahni lama theih tâwp kan chhuah chuan eng lungawina nge kan neih theih?

²² Chûng in cheimawinate a hmun tûr dik taka dah lêt leh tûr chuan hun pêk leh thawhrim a ngai ngei ang. Mahse, i tih tûr i tih phawt chuan: “Chawimawi kawngah chuan induhsak tawn ṭheuh ula,” tih Bible thupêk i zâwm tih inhriatna aṭangin lungawina nasa tak i nei ang. (Rom 12:10; Sâm 147:11) A pawimawh ber chu, in inneihna chawimawi tûra i thawhrimna chuan Pathian hmangaihnaa a vawng ṭha che hi a ni.