Jehova chuan innei tawhte chu an inneihna thutiama rinawm turin a beisei a. Mipa leh hmeichhe hmasa berte a inneihtîr khân Jehova chuan: “Mipain . . . a nupui a vuan ang: tichuan tisa pum khat an lo ni tawh ang,” tiin a sawi. A hnuah Isua Krista’n a sawi nawn leh a: “Pathianin a zawm tawh chu mihringin ṭhen suh se,” tiin a sawi belh a ni. (Genesis 2:24; Matthaia 19:3-6) Chuvângin, Jehova leh Isua chuan inneihna chu a tuemaw zâwk an thih hun chauhva tâwp tûr dam chhûng daih inzawmna angin an ngai a ni.  (1 Korinth 7:39) Inneihna chu Pathian ruahmanna thianghlim tak a nih avângin, inṭhenna chu holam taka ngaih tûr a ni lo. Dik takin, Bible ṭanchhan tûr awm lova inṭhen chu Jehova’n a hua a ni.—Malakia 2:15, 16.

Bible ṭanchhana inṭhen theih dân chu eng nge ni? Jehova chuan uirêna leh nungchang bawlhhlawhna a hua a. (Genesis 39:9; 2 Samuela 11:26, 27; Sâm 51:4) Nungchang bawlhhlawhna chu a huat êm avângin, inṭhen chhan tûr tlingah a ngai a ni. (Nungchang bawlhhlawhnain a huam telte chungchâng sawihona chu Bung 9, paragraph 7-naah en rawh.) Jehova chuan a rinawm zâwk chu a ngaidam dâwn nge a ṭhen dâwn tih chungchângah duh thlan theihna a pe a ni. (Matthaia 19:9) Chuvângin, a thiam zâwkin inṭhen a duh chuan, chu chu Jehova huatzâwng a ni lo vang. Mahse, chutih rualin Kristian kohhran chuan tumah hi inṭhen tûrin a fuih lo. Dinhmun ṭhenkhatah chuan, a thiam zâwk chuan a thiam lo zâwk bula awm zawm chu a rêl thlu thei a; chu chu a bîk takin inlamlêtna dik tak a lantîr hian a ni thei. Engpawh ni se, Bible ṭanchhana inṭhen theite chuan mahniin thu tlûkna an siam tûr a ni a, a sawhkhâwk pawh an pawm tûr a ni.—Galatia 6:5.

Dinhmun khirh tak ṭhenkhatah chuan uirêna awm lo mah se, Kristian chuan awm hran emaw, inṭhen emaw a thlang pawh a ni thei. Chutiang dinhmunah chuan, Bible chuan a ṭhentu chu “pasal nei tawh lovin awm law law rawh se, a nih loh leh a pasal nên vêk innei leh rawh se,” tiin a hrilh a ni. (1 Korinth 7:11) Chutiang Kristiante tân mi dang neih tumna nêna ngaihzâwng neih theih a ni lo. (Matthaia 5:32) Awm hran theihna nia ngaih dinhmun khirh tak ṭhenkhat chu i lo ngaihtuah ang u.

Chhûngkaw enkawl duh lohna. Pasalin a châwm thei reng chung pawha a châwm duh loh avângin chhûngkua chu ei tûr nei lo khawpin an rethei hle pawh a ni thei a. Bible chuan: “Tupawh . . . mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk” tiin a sawi. (1 Timothea 5:8) Chutiang mi chu a insiam ṭhat duh loh chuan, a nupui tân amah leh a fate vênhim nân dân phalna laa awm hran mai tûr nge ni tih chungchângah thu  tlûkna a siam a ngai ang. Kristianin a chhûngkua châwm duh lo anga puhna chungchângah Kristian upate chuan ngun takin an ngaihtuah a ngai ngei mai a. Mahni chhûngkaw châwm duh lohna chu kohhran aṭanga hnawh chhuah theihna sual a ni.

Nasa taka kut tawrhna. Kut thawh hmang chuan a kawppui hrisêlna leh nunna hial atân pawha hlauhawm khawpin tharum thawh a chîng pawh a ni thei. Chutiang kawppui chu kan unaupa a nih chuan Kohhran upate’n a chanchin an chhui chiang ang. Thinurna leh tharum thawhna chu kohhran aṭanga hnawh chhuah theihna sual a ni.—Galatia 5:19-21.

Thlarau lam thiltiha tel thei lo tûra khap behna. Mi chuan a kawppui tân biakna dik vuan thei lo tûr khawpin harsatna a siam zawm zêl emaw, Pathian dânte zâwm lo tûrin a nawrlui hial emaw pawh a ni thei. Chutiang dinhmunah chuan, ‘mihring thu aia Pathian thu a zawm zâwk’ theih dân kawng awmchhun chu dân phalna laa awm hran a nih leh nih loh chungchângah a tuartu chuan thu tlûkna a siam a ngai ang.—Tirhkohte 5:29.

Kan sawi tâk dinhmun khirh takahte hian a thiam zâwk chu awm hrang tûr emaw, awm dûn zêl tûr emawin tumahin an nawr lui tûr a ni lo. Kristian unau puitlingte leh kohhran upate chuan ṭanpuina leh Bible ṭanchhan fuihnate an pe mai thei; mahse, anni pawhin nupa inkâra thilthlengte chu an hre kim vek thei lo. Jehova chauhvin a hmu thei a ni. Kristian nupui emaw, pasal emawin a kawppui laka awm hran a duh vâng maia in chhûngkhura harsatna thleng chu a nihna aia nasaa a sawi chuan, Pathian leh inneihna ruahmanna chu a zah lo tihna a ni ang. Mi chuan eng ang khawpin thup tum mah se, Jehova chuan awmhran theih nâna ruahmanna a siamte chu a hre vek a ni. “Kan chanchin kan thlenna tûra mithmuhah chuan engkim saruak leh inhawng sain a awm” si a. (Hebrai 4:13) Mahse, hun rei tak chhûng dinhmun hlauhawm tak chu a thleng zui zêl a nih chuan, duh thlan tûr dang a hriat tawh loh avânga awm hran thlangtu chu tumahin an sawisêl tûr a ni lo. A tâwpah chuan, “kan zain Pathian hnênah mahni chanchin kan sawi ṭheuh tûr a ni.”—Rom 14:10-12.