1. Isua chuan leia a nun a hman hnuhnûn ber zân khân, eng thu nge a sawi chhuah?

ISUA chuan leia a nun a hman hnuhnûn ber zân khân, a hnungzuitute a ngaihtuahzia a sawi chhuak a. Chu mi chungchângah chuan a Pa hnênah heti hian a ṭawngṭai hial a ni: “Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni. Anni chu khawvêla mi an ni lo, kei khawvêla mi ka ni lo ang bawk hian,” tiin. (Johana 17:15, 16) Chutianga tih tak zeta a ṭawngṭainaah Isua chuan a hnungzuitute a hmangaihna thûk tak leh chu mi zâna an zînga mi ṭhenkhat hnêna: “Khawvêla mi in ni si lo,” tih thu a lo sawi tawh a pawimawhna chu a târ lang a ni. (Johana 15:19) Isua tân chuan a hnungzuitute khawvêl aṭanga an inlâk hran chu thil pawimawh tak a ni tih a chiang hle!

2. Isua sawi “khawvêl” chu eng nge ni?

² Isua sawi “khawvêl” tih ṭawngkam hian Setana rorêlna hnuaia awm Pathian laka inmihran mihringte—Setana hnên aṭanga chhuak mahni hmasialna leh chapona rilru put hmang nei mihring zawng zawngte—a kâwk a ni. (Johana 14:30; Ephesi 2:2; 1 Johana 5:19) Ni e, he “khawvêl ṭhian nihna hi Pathian hmêlma nihna a ni.” (Jakoba 4:4) Mahse, engtin nge Pathian hmangaihnaa awm reng duhtute chu khawvêla awm reng siin, khawvêl laka an inlâk hran theih ang? Kan inlâk hran theih dân kawng nga kan ngaihtuah ang. Chûngte chu: Khawvêl politics-a tualdâwiha Krista rorêlna hnuaia Pathian Lalram chunga rinawmna  te, khawvêl thlarau dona te, mawihnai taka inthuamna leh incheina te, nun tihsamkhaina te, leh thlarau lam râlthuama inthuamnate a ni.

3. (a) Engtin nge Isua chuan a hun laia politics chu a thlîr? (b) Engvângin nge Isua hnungzuitu hriak thihte chuan palai angin rawng an bâwl kan tih theih? (Footnote telh rawh.)

³ Isua chuan a hun laia politics-a tel ai chuan, Lal a nihna tûr vân sawrkâr, Pathian Ram chanchin mite hnêna hrilh chu a ngai pawimawh zâwk a. (Daniela 7:13, 14; Luka 4:43; 17:20, 21) Chuvângin, Isua chuan Rom Ram Awptu Pontia Pilata hnênah: “Ka ram chu he khawvêla mi hi a ni lo,” tiin a sawi thei a ni. (Johana 18:36) A hnungzuitu rinawmte chuan Krista leh a Lalram chunga rinawmna leh chu Lalram chanchin khawvêla puan chhuahna hmangin, Isua entawn tûr siam chu an zui a. (Matthaia 24:14) Tirhkoh Paula chuan: “Krista aia palai kan ni a, . . . ‘Pathian nên lo inrem rawh u,’ tiin Krista aiah kan ngên che u,” tiin a ziak a ni. *—2 Korinth 5:20.

4. Engtin nge Kristian dik zawng zawngte chuan Pathian Ram chunga an rinawmna chu an târ lan? ( Phek 52-naa bâwm chu en rawh.)

⁴ Palaite chu ram dang sawrkâr aiawhtu an nih avângin, an hnathawhna ram chhûng politics-ah an inhnamhnawih lo, an tualdâwih tlat zâwk a. Mahse, anni chuan an sawrkâr ṭhatna tûrin hna an thawk a ni. Chutiang bawkin, “vân khua leh tui” nihna nei, Krista hnungzui hriak thihte chuan an ram tân hna an thawk a. (Philippi 3:20) Ṭhahnemngai taka Lalram chanchin an hrilhna zârah Krista “berâm dang” mi maktaduai tam takte chu ‘Pathian nêna  lo inrem’ tûrin an ṭanpui a ni. (Johana 10:16; Matthaia 25:31-40) Chûng berâm dangte chuan Isua hriak thih unaute chu an ṭanpui a. He pâwl pahnihte hian Messia Lalram tân inlungrual takin hna an thawk a, khawvêl politics-ah an tualdâwih tlat a ni.—Isaia 2:2-4 chhiar rawh.

5. Engtin nge Kristian kohhran chu hmân lai Israelte laka a danglam a, engtin nge chu danglamna chu Kristiante’n an târ lan?

 ⁵ Krista chunga rinawmna chu Kristian dikte tualdâwih chhan awmchhun a ni lo. Pathian pêk ram pakhata awm hmân laia Israelte ang lo takin, khawvêl pumah kan awm darh vek a. (Matthaia 28:19; 1 Petera 2:9) Chuvângin, tualchhûng politics-ah party ṭan lam kan neih chuan Lalram thuchah zalên taka kan sawi theihna leh Kristian inpumkhatna chu nasa takin kan tichhe dâwn a ni. (1 Korinth 1:10) Chu bâkah, indona a thlen hunah, kan hmangaih tûr kan Kristian unaute chu kan do tihna a ni dâwn bawk. (Johana 13:34, 35; 1 Johana 3:10-12) Chuvângin, chhan ṭha tak neiin Isua chuan a zirtîrte chu indo lo tûrin a hrilh a. An hmêlmate hmangaih tûrin a hrilh hial a ni.—Matthaia 5:44; 26:52; “ Ka Tualdâwih Tlat Em?” tih phêk 55-naa bâwm chu en rawh.

6. Engtin nge Pathian hnêna i inpumpêkna chuan Kaisara nêna in inlaichînna a nghawng?

⁶ Kristian dikte kan nih angin, kan nun chu mihring, pâwl, a nih loh leh ram pakhat hnênah ni lovin, Pathian hnênah kan pumpêk tawh a. “Mahni ta pawh in ni lo va, mana lei in ni tawh,” tiin 1 Korinth 6:19, 20 chuan a sawi. Chuvângin, Isua hnungzuitute chuan “Kaisara” hnênah chawimawina te, chhiah te, leh chin tâwk neia intukluhna te chu an pêk rualin, “Pathian thilte chu Pathian hnênah” an pe a ni. (Marka 12:17; Rom 13:1-7) Chutah chuan, chibai bûkna te, thinlung zawng zawnga hmangaihna te, leh rinawm taka thuâwihna te a tel a. A ṭûl a nih chuan, Pathian tâna an nun pêk pawh an inhuam a ni.—Luka 4:8; 10:27; Tirhkohte 5:29; Rom 14:8 chhiar rawh.

7, 8. “Khawvêl thlarau” chu eng nge ni a, engtin nge chu thlarau chuan thuâwih lo mihringte chungah hna a ‘thawh’?

⁷ Khawvêl laka Kristiante inlâk hran dân kawng dang leh  chu khawvêl thlarau suaksual an dona hi a ni a. “Keini zawngin khawvêl thlarau ni lovin, thlarau, Pathian hnêna mi chu kan hmu zâwk a ni,” tiin Paula’n a ziak a ni. (1 Korinth 2:12) Ephesi khuaa mite hnênah pawh: “Hmânah khân he khawvêl dân anga in awm kha, boruaka thuneihna lal, tûna âwih lo fate chhûnga thawk mêktu thlarau dân ang hian,” tiin a hrilh bawk a ni.—Ephesi 2:2, 3.

⁸ Khawvêl ‘boruak,’ a nih loh leh thlarau chu Pathian thuâwih lohna awmtîrtu leh “tisa châkna te, mit châkna te,” min neihtîrtu hmuh theih loh chakna thiltithei tak a ni a. (1 Johana 2:16; 1 Timothea 6:9, 10) Khawvêl thlarau “thuneihna” chu tisa sual lama a hîpnaah te, a ngamthlêmnaah te, a nunrâwnnaah te, leh boruak anga a darhzaunaahte hian a lang a ni. Chu bâkah, chu thlarau chuan Pathian ngaihsak lote chungah mahni hmasialna te, chapona te, duhâm taka tum sânna te, mahnia thu tlûkna siam duhna leh thuneihna laka hel duhna te neihtîrin, an chungah hna a “thawk” a ni. * A awlsam zâwnga sawi chuan, khawvêl thlarau chuan Diabola miziate chu mihringte thinlungah zawi zawiin a ṭhan chhohtîr a ni.—Johana 8:44; Tirhkohte 13:10; 1 Johana 3:8, 10.

9. Engtin nge khawvêl thlarau chu kan rilru leh thinlungah a luh theih?

⁹ Chu khawvêl thlarau chuan i rilru leh thinlungah zung a kaih thei em? Thei e, mahse, inven ṭhat lohna hmanga i remtih chauhvin zung a kaih thei a ni. (Thufingte 4:23 chhiar rawh.) Chu chuan hriat theih mang lovin min thunun ṭan a, Jehova hmangaih lotu, mi ṭha anga langte kawmna aṭangin a ni thei. (Thufingte 13:20; 1 Korinth 15:33) Chu thlarau suaksual chu lehkhabu ṭha lo te, saruak lem leh thuziak te, kalpêngte siam Internet site-te, intihhlimna ṭha lo te, leh nasa taka inel ngai infiamna—a ni, Setana  leh a khawvêl ngaihtuahna mi pe thei mi tupawh leh thil engpawh—aṭangin i nei ṭan thei a ni.

10. Engtin nge khawvêl thlarau chu kan do theih?

¹⁰ Engtin nge khawvêl thlarau hlauhawm tak chu dova, Pathian hmangaihnaa kan invawn reng theih? Kan invawn theih dân kawng awmchhun chu Pathian Jehova thlarau lam thilpêkte hman ṭangkai vekna leh thlarau thianghlim dîla ṭawngṭai rengna hmangin a ni. Jehova chu Diabola leh  a thununna hnuaia awm khawvêl suaksual tak aiin a ropui zâwk daih a. (1 Johana 4:4) Chuti a nih chuan, ṭawngṭaia Jehova kan hnaih reng chu a va pawimawh tak êm!

11. Engtin nge khawvêl thlarau chuan thawmhnaw hâk dân a nghawng?

¹¹ Thawmhnaw hâk te, inchei dân te, leh invawn thianghlim dânte chuan mi rilru chhûngril a târ lang a. Ram tam takah chuan, thawmhnaw an inbel duhdah tawh êm avângin, TV-a thusawitu pakhat chuan: ‘Nawhchizuarte tân hâk tûr a awm tawh lo mai ang,’ tiin a sawi hial a ni. La tleirâwl chhuak lo hmeichhe naupangte pawh “khuh tlêm a, lan thuitîr” lam an hawi niin chanchinbu pakhat chuan a sawi. Inchei dân dang leh chu, helna rilru put hmang, leh zahawmna leh mahni inzahna tlâkchhamzia lantîrtu dâwngdah taka inthuam hi a ni.

12, 13. Kan thawmhnaw hâk leh inchei dân chu eng thu bulin nge thunun ang?

¹² Jehova chhiahhlawhte kan nih angin, lan ṭhat chu kan duh a, felfai tak, thianghlim tak, nalh tak, leh a hun leh a hmun azirin kan inthuam a ni. Eng lai pawhin, ‘inbel lutuk lo leh thuam inchawih tâwkin’ kan inthuam tûr a ni a, chu chu ‘Pathian ngaihsak inti’ apiangte tâna tihâwm “thil tihṭhatin” a zui tûr a ni. Kan ngaih pawimawh ber chu mahni lama ngaihsakna lâk ni lovin, ‘Pathian hmangaihnaa invawn ṭhat’ hi a ni a. (1 Timothea 2:9, 10; Juda 21) Ni e, ‘thinlunga mihring thurûk . . . Pathian mithmuha hlu êm êm’ chu kan incheina mawi ber nihtîr kan duh a ni.—1 Petera 3:3, 4.

¹³ Kan thawmhnaw hâk leh kan inchei dân chuan mi dangte’n biakna dik an thlîr dân a nghawng thei tih hre reng bawk ang che. “Inchawih tâwk” tia lehlin Grik thu mal hi nungchang lam thila hman a nih hian mi dangte rilru emaw, ngaih dân emaw zahsakna leh ngaihsânna a  kâwk a. Chuvângin, kan tum ber chu kan duh dâna inchei aiin mi dangte chhia leh ṭha hriatna ngaih pawimawh zâwk hi a ni. A pawimawh ber chu, Jehova leh a mite chawimawi leh ‘Pathian ropuina tûr hlîra’ thil tia, Pathian rawngbâwltu anga mi mittlunga awm hi a ni.—1 Korinth 4:9; 10:31; 2 Korinth 6:3, 4; 7:1.

14. Kan lan dân leh invawn thianghlimna chungchângah eng zawhnate nge kan inzawh ang?

¹⁴ Kan thawmhnaw hâk te, kan inchei dân te, leh invawn thianghlimnate chu thu hrila kan kal hunah leh kan inkhâwm hunah a pawimawh lehzual a. Heti hian inzâwt rawh: ‘Ka lan dân leh ka invawn thianghlim dân chuan mi ngaihsakna a la lutuk em? Mi dangte rilru a tibuai em? He mi chungchânga dikna ka neihte hman chu kohhrana rawngbâwlna chanvote nei tûra tlin tum aiin ka ngai pawimawh zâwk em?’ tiin.—Sâm 68:6, C.L. Re-edited; Philippi 4:5; 1 Petera 5:6.

15. Engvângin nge Bible chuan thawmhnaw hâk tûr, inchei dân tûr, leh invawn thianghlim dân tûr chungchângah dân tam tak a zam loh?

¹⁵ Bible chuan Kristiante tân thawmhnaw hâk tûr, inchei dân tûr, leh invawn thianghlim dân tûr chungchângah dân tam tak a zam lo. Jehova chuan kan ngaihtuahna leh zalên taka duh thlan theihna hmang lo tûra min khap chu a duh lo. Chu ai chuan, Bible thu bulte ṭanchhana  ngaihtuah thiam mi puitling ni tûrin leh ‘chhia leh ṭha fiah tûra kan hriat theihnate sawizawi’ tûrin min duh zâwk a ni. (Hebrai 5:14) Thil dang zawng aiin, Pathian leh ṭhenawmte hmangaihnain min thunun se a duh a ni. (Marka 12:30, 31 chhiar rawh.) A âwm tâwka inthuam chungin, thawmhnaw inbel leh inchei theih dân hrang hrang a awm a. Chu chu khawvêl hmun tina Jehova mite inkhâwmpuiahte chuan a lang a ni.

16. Engtin nge khawvêl thlarau chuan Isua zirtîrna a kalh a, eng zawhna nge kan inzawh ang?

¹⁶ He khawvêl thlarau hi bum hmang tak a ni a, mi tam tak chu hlimna hmuh nân sum leh pai leh neihnunna ûm tûrin a nawr a ni. Mahse, Isua chuan: “Sum ngah hi mihring dam chhan a ni lo,” tih a sawi. (Luka 12:15) Isua  chuan sakhuana avânga hrehawm taka nun, a nih loh leh a lutuka mahni inphata nun chu a pawm loh rualin, nunna leh hlimna dik tak chu “mahni thlarau lam mamawh hriate” leh an nun tisamkhai a, thlarau lam thil ngaihsaktute’n an nei ang tih a zirtîr a. (Matthaia 5:3, NW; 6:22) Heti hian inzâwt rawh: ‘Isua thu zirtîr chu ka ring tak zet nge ni a, “dâwt pa” thusawi ka ring zâwk? (Johana 8:44) Ka thusawite, ka thiltumte, ka thil ngaih pawimawhte, leh ka nun dân chuan eng nge a târ lan?’ tiin.—Luka 6:45; 21:34-36; 2 Johana 6.

17. Nun tisamkhaitute neih hlâwkna ṭhenkhat sawi rawh.

¹⁷ Isua chuan: “Finna chu a thiltih aṭangin a dikzia a lang,” tih a sawi a. (Matthaia 11:19) Nun tisamkhaitute neih hlâwkna ṭhenkhat hi han ngaihtuah teh. Rawngbâwlnaah hlimna dik tak an hmu a. (Matthaia 11:29, 30) Ṭûl lo taka lungkhamna an pumpelh a, chutiang chuan rilru hrehawmna tam tak laka vênhim an ni. (1 Timothea 6:9, 10 chhiar rawh.) Nuna thil mamawhte neia an lungâwi avângin, an chhûngkua leh an Kristian ṭhiante tân hun tam zâwk an nei a. Chuvângin, an mut pawh a tui lehzual thei bawk. (Thuhriltu 5:12) An theih ang apiang an pêk chhuah avângin, hlimna nasa lehzual an nei a. (Tirhkohte 20:35) Chu bâkah, ‘beiseina an ngahin,’ chhûngrila thlamuanna leh lungâwina an nei bawk. (Rom 15:13; Matthaia 6:31, 32) Chûng malsâwmnate chu a va hlu êm!

18. Engtin nge Bible chuan kan hmêlma, a thiltih dân, leh kan ‘inbuan’ dân chu a târ lan?

¹⁸ Pathian hmangaihnaa invawng ṭhatute chuan Kristiante hnên ata hlimna leh chatuan nunna lâksak duhtu, Setana lak ata thlarau lama vênhimna an dawng bawk. (1 Petera 5:8) Paula chuan: “Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau  sualho awmte an ni zawk e,” tiin a sawi a ni. (Ephesi 6:12) “Buante” tih thu mal hian kan inbeihna chu hmun hla tak—a rûka siam lei hnuai tawm himna hmun—aṭanga inbeihna ni lovin, hmaichhana inbeihna a ni tih a târ lang. Chu bâkah, “lalnate,” “thuneihnate,” leh “khawvêl rorêltute” tih thu mal hian thlarau khawvêl aṭanga beihna chu ṭha taka ruahman lâwk beihna a ni tih a târ lang bawk.

19. Kristian thlarau lam râlthuam chu sawi rawh.

¹⁹ Mahse, mihring chak lo leh theih chin nei kan ni chung pawhin, hnehna kan chang thei a ni. Engtin nge? ‘Pathian râlthuam famkima’ inthuamin kan hneh thei a ni. (Ephesi 6:13) Chu râlthuam chungchângah chuan, Ephesi 6:14-18-ah heti hian kan chhiar a: “Chutichuan inkâwng chu thutaka hrêngin, felna âwmphaw chu hain, remna chanchin ṭha inbuatsaihna chu in keah bunin ding rawh u; chûng lo pawh chu rinna phaw la ula, chu mi chuan mi sual thal alh thei zawng zawng chu in timit thei ang. Tin, chhandamna lukhum leh thlarau ngûnhnâm (Pathian Thu chu) la ula, ṭawngṭaina leh dîlna tinrêngin eng hun pawha thlarauva ṭawngṭaiin . . . ngaihven rawh u,” tiin.

20. Engtin nge kan dinhmun chu sipai tak takte nên a inan loh?

²⁰ He thlarau lam râlthuam hi Pathian min pêk a nih avângin, chumia kan inthuam reng chuan vênhim kan ni ang. Indonaa tel reng lo sipaite ang lo takin, Kristiante chuan Pathianin Setana khawvêl a tihboral a, thlarau suaksual zawng zawng leilâwta a khung hma loh zawng, chhum lo chat lovin nasa taka beihna an tâwk a ni. (Thu Puan 12:17; 20:1-3) Chuvângin, chak lohna emaw, châkna ṭha lo emaw chu i do reng a ngaih chuan tlâwmsan mai suh, Jehova chunga rinawm reng tûra kan ‘intihchhel’ a ngai vek si a. (1 Korinth 9:27) Dik tak chuan, kan do tawh loh hun chu a hlauhthâwnawm hun lai tak a ni si a!

21. Thlarau lam indonaa kan hneh theih dân awmchhun chu eng nge?

 ²¹ Chu bakah, he indona hi mahni chakna mai chuan kan hneh thei lo va. Chuvângin, Paula chuan Jehova hnênah “eng hun pawha thlarauva” ṭawngṭai a ngai tih min hriat nawntîr a ni. Chutih rual chuan, mahnia mal ṭan kan nih loh avângin Pathian Thu zirna leh a remchân hun apianga kan ‘sipaipuite’ kawmna hmangin Jehova thu chu kan ngaithla tûr a ni. (Philemona 2; Hebrai 10:24, 25) Chûng thil zawng zawnga rinawmte chuan hnehna an chang mai ni lovin, beih an nih hunah pawh an rinna ṭha takin an humhim thei ang.

22, 23. (a) Engvângin nge kan rinna humhim tûra kan inpeih reng ang a, eng zawhnate nge kan inzawh ang? (b) Bung 6-naah eng nge kan sawiho vang?

²² Isua chuan: “Khawvêla mi in ni si lo va, . . . khawvêlin a hua che u a ni e,” tiin a sawi a. (Johana 15:19) Chuvângin, Kristiante chuan thuhnuairawlh tak leh ṭih dêk chunga an rinna humhim chu an inpeih reng tûr a ni. (1 Petera 3:15 chhiar rawh.) Heti hian inzâwt rawh: ‘Jehova Thuhretute’n mi tam zâwkte ngaih dân kalha awm châng an neih chhan chu ka hre thiam em? Chutiang hunah chuan, Bible leh bâwih rinawm pâwl sawite chu a dik tih ka ring thlap em? (Matthaia 24:45; Johana 17:17) Chu bâkah, Jehova mithmuha thil dik tih a ṭûl hunah, danglam bîk ka inpeih mai ni lovin, danglam bîk nih chu ka inchhuang em?’ tiin.—Sâm 34:2; Matthaia 10:32, 33.

²³ Mahse, khawvêl laka inlâk hran kan duhna chu hriatthiam harsa lehzuala fiah châng a awm fo va. Entîr nân, atîra kan sawi tâk angin Diabola chuan Jehova chhiahhlawhte chu khawvêl intihhlimna hmanga thlêm a tum a ni. Mi tihahdam a, chhia leh ṭha hriatna thiang tak min neihtîrtu intihhlimna ṭha chu engtin nge kan thlan theih ang? Chu chu bung 6-naah sawiho a ni ang.