1, 2. Tûn laia Pathian thilpêk hlu tak chu eng nge ni a, engvângin nge a hlut?

KAN Pa vâna mi chuan thil hlu tak min pe a, chu chu a miziate lan chhuahtîr thei tûra finna neia min siam hi a ni. (Genesis 1:27) Chu thilpêk hlu tak zârah Bible thu bulte kan chhût theih phah a. Chûng thu bulte kan nunpuina aṭang chuan Jehova hmangaih a, ‘chhia leh ṭha fiah tûra hriat theihnate sawizawi tawh’ thlarau lama mi puitling kan ni chho thei a ni.—Hebrai 5:14.

² Khawvêl a changkân chhoh va, hma a sâwn tawh êm avângin, nuna lo thleng thei dinhmun zawng zawngte tân dân neih theih a ni lo; chuvângin, tûn lai hian Bible thu bulte chhût thiamna neih chu a pawimawh lehzual a ni. Damdawia inenkawlna lama thiamna, a bîk takin thisen hman dân leh thisen aṭanga siam chhuahna lama thiamna chuan Bible thu bulte chhût thiam a pawimawhzia a lantîr chiang hle. Hei hi Jehova thuâwih duh zawng zawngte tâna ngaihven tûr leh ngaih pawimawh tûr a ni. Bible thu bul pawimawhte kan hriatthiam chuan, chhia leh ṭha hriatna thiang tak min neihtîrtu leh Pathian hmangaihnaa min awmtîr reng theitu thu tlûkna fing kan siam thei ang. (Thufingte 2:6-11) Chûng thu bul ṭhenkhatte chu i lo ngaihtuah ang u.

3, 4. Eng hun aṭangin nge thisen thianghlimna chu Bible-ah sawi ṭan a nih a, chu chu eng thu bulah nge a innghah?

³ Jehova chuan thisen thianghlimna leh nunna nêna a inzâwm tlat dân chu Kaina’n Abela a thah hnu lawk khân a  sawi ṭan a. Kaina hnênah: “I nau thisen aw chuan lei aṭangin mi au asin,” tiin a hrilh a ni. (Genesis 4:10) Jehova thlîrna aṭang chuan, Abela thisen chuan râwng taka lâksak a nunna chu a entîr a. Chuvângin, Abela thisen chuan phuba la tûrin Pathian a ngên tia sawi theih a ni.—Hebrai 12:24.

⁴ Nova Tuilêt hnu aṭangin, Pathian chuan sa ei a phal a, a thisen erawh ei a phal lo. Pathian chuan: “Sa a nunna (a thisen) chawpin in ei tûr a ni lo. Tin, in thisen, in nunnate thisen phuba chu ka la ngei ngei ang,” tiin a hrilh a ni. (Genesis 9:4, 5) He thupêk hi Nova thlah zawng zawngte tân a ni a, tûn thleng pawhin a la ni reng a ni. Chu chuan Pathianin Kaina hnêna a sawi thil nung zawng zawngte nunna chu thisen a ni tih chu a nemnghet a. Chu chuan nunna Hnâr, Jehova chuan nunna leh thisen zah lotu zawng zawngte chu a hrem ngei ang tih chiang takin a târ lang bawk.—Sâm 36:9.

5, 6. Engtin nge Mosia Dân chuan thisen chu a thianghlimin, a hlu bawk tih a târ lan? ( Phêk 78-naa bâwm chu en bawk rawh.)

⁵ Chûng thu bul pawimawh tak pahnihte chu Mosia Dânah khân kan hmu thei bawk a. Leviticus 17:10, 11-ah chuan heti hian kan chhiar a ni: “Tupawh . . . chu thisen eitu chungah chuan ka hmai ka thuar ang a, a chipuite zîng ata tuithlârin ka awmtîr ang. Tisa nunna chu thisenah chuan a awm si a; in nunna atâna inremna siamna tûra maichâm chunga ka pêk che u a ni; nunna atâna inremna siamna chu thisen ngei chu a ni si a,” tiin. *—Phêk 76-naa “ Thisenin Inremna A Siam Theih Dân,” tih bâwm chu en rawh.

⁶ Ran talh thisen chu maichâma hman a nih loh chuan leiah leihbuak tûr a ni a. Chutiang hmang chuan, nunna chu a Neitu dik tak hnênah kan pe kîr leh a tih theih a ni. (Deuteronomy 12:16; Ezekiela 18:4) Mahse, Israel mite chuan an sa ei tûra thisen far khat tê pawh a awm loh nân an sâwngbâwl  kher a ngai lo tih erawh chhinchhiah ang che. Ran chu talh a, a thisen ṭha taka chhuahtîr a nih phawt chuan, Nunna Petu hnênah zahna lantîr a nih tawh avângin, Israel mi chuan chhia leh ṭha hriatna thiang tak neiin a ei thei a ni.

7. Engtin nge Davida chuan thisen thianghlimna chu a zahzia a lantîr?

⁷ “[Pathian] thinlung ang pu mi,” Davida chuan thisen chungchânga Pathian dân phêna awm thu bul chu a hre  thiam a. (Tirhkohte 13:22) Ṭum khat chu a tui a hâl êm êm a, a mi pathumte chuan hmêlmate riah hmun tâwn tlangin tuichhunchhuaha tui chu va chawiin an rawn pe a. Engtin nge Davida’n a lo tih? “Thih huama kalte thisen chu ka in dâwn em ni?” tiin a sawi. Davida mitah chuan, tui chu a mite thisen ang a ni. Chuvângin tui hâl hle mah se, “LALPA tân a bun chhuak ta zâwk a.”—2 Samuela 23:15-17.

8, 9. Kristian kohhran din a nih khân, Pathianin nunna leh thisen a thlîr dân chu a inthlâk em? Hrilhfiah rawh.

⁸ Nova hnêna thisen chungchânga thupêk a chhuah hnu kum 2,400 vêl, Dân thuthlung siam hnu kum 1,500 vêlah khân, Jehova chuan Kristian kohhran hmasaa governing body chu: “Thlarau thianghlim leh keinin, hêng thu pawimawh lo hi chu, phurrit zual in chungah nghat lo ila a ṭha kan ti; milem biakna sa ei te, sa thisen ei te, sa rehhlum ei te, inngaih te bâng ula kan ti,” tia ziak tûrin a thâwk khum a ni.—Tirhkohte 15:28, 29.

⁹ Kum zabi khatnaa governing body chuan thisen thianghlimna leh hman sualna chu milem biakna emaw, nungchang bawlhhlawhna emaw nêna inang reng niin an hre thiam tih a chiang hle. Chu chu tûn laia Kristian dikte pawhin an pawm a. Chu bâkah, thisen hman chungchânga thu tlûkna an siam hunah Bible thu bulte an ngaihtuah avângin Jehova an tilâwm thei a ni.

10, 11. (a) Engtin nge Jehova Thuhretute’n thisen hlang leh thisen pêng bulpuite dawn chu an ngaih? (b) Thisen chungchângah Kristiante chuan eng kawngahte nge ngaih dân inang lo an neih theih?

¹⁰ Jehova Thuhretute chuan ‘thisen laka inthiar fihlîm’ tih awmzia chu thisen inthun loh emaw, anmahni thisen ngei pawh mite hnêna pêk loh emaw, a nih loh leh dah ṭhat loh emaw a tel tih an hria a. Pathian dân an zah avângin, thisen pêng bulpui pali: thi mûr sen, thi mûr vâr, thi mûr ban, leh thisena tuihnâng pawh an pawm lo a ni.

¹¹ Tûn laiah hian hêng thisen pêng bulpuite hi thisen  them te tak tê têa ṭhen darh leh a ni a, chu chu kawng hrang hranga hman a ni. Kristian chuan, chutiang thisen them te tak tê tête chu a pawm ang em? Chûngte chu “thisen” angin a thlîr ang em? Hemi chungchângah hian mi tinin thu tlûkna an siam tûr a ni. Thisen dah ṭhat ngai lova thisen thlitfai hnua inthun lehna hemodialysis te, thisen pawlh dâl hemodilution te, leh zaina leh hliamna hnuhma aṭanga chhuak thisen thlitfaia inthun lehna cell salvage ang chi-ahte pawh mahnia thu tlûkna siam a ngai a ni.—Phêk 215-218-naa Thu Belhna chu en rawh.

12. Chhia leh ṭha hriatnaa innghat thilte chu engtin nge kan thlîr ang a, engtin nge kan chinfel ang?

¹² Mi mala thu tlûkna kan siam hi Jehova tân a pawimawh lutuk lo tihna a ni em? Ni lo ve, kan ngaihtuahnate leh min chêttîrtu thilte chu a ngaihven êm avângin a tân a  pawimawh a ni. (Thufingte 17:3; 24:12 chhiar rawh.) Chuvângin, damdawi emaw, inenkawl dân emaw chungchânga ṭawngṭaina nêna ngun taka kan inzir chian hnuah, Bible zirtîr kan chhia leh ṭha hriatna thu chu kan zâwm tûr a ni. (Rom 14:2, 22, 23) Mi dangte chuan an chhia leh ṭha hriatna mila duh thlang tûrin min nawr lui tûr a ni lo va, keini pawhin, “Ka dinhmunah hian ding ta la, eng nge i tih ang?” tiin kan zâwt tûr a ni hek lo. Chutiang thilah chuan, Kristian tinte hian “mahni phur an phur ṭheuh” tûr a ni. *—Galatia 6:5; Rom 14:12; Phêk 81-naa “ Thisen Chu Thil Thianghlim Angin Ka Ngai Em?” tih bâwm chu en rawh.

13. Jehova dânte leh thu bulte chuan a chungchâng eng nge a târ lan? Entîrna pe rawh.

¹³ Bible dânte leh thu bulte chuan Jehova chu dân Petu fing tak leh a fate ṭhatna tûr ngaihsaktu hmangaihna nei Pa ber a ni tih a târ lang. (Sâm 19:7-11) ‘Thisen laka inthiarfihlîm’ tûra thupêk chu hrisêlna atâna dân siam ni lo mah se, chu chuan thisen inthunna nêna inkaihhnawih buaina lakah min vênghim a ni. (Tirhkohte 15:20) A nihna takah chuan, damdawi lama mi thiam tam tak chuan thisen tel lova inzai chu inenkawlna “ṭha ber” niin an sawi. Kristian dikte tân chuan, chûng hmasâwnnate chuan Jehova neih finna chhui chhuah rual loh leh pa anga min hmangaihzia a finfiah a ni.—Isaia 55:9 chhiar rawh; Johana 14:21, 23.

14, 15. (a) Eng dânah nge Pathianin a mite a hmangaihna chu lang chhuak? (b) Engtin nge chûng kan himna tûr dân phêna awm thu bulte chu kan nunpui theih?

¹⁴ Pathianin hmân laia a mi Israelte ṭhatna tûr a ngaihtuahzia chu a dân pêk tam takah a lang a. Entîr nân, Israel mite chuan an in chung zâwla thil tam tak an tih ṭhin avângin, an chêtsual palh loh nân an in chung hung tûrin a phût a.  (Deuteronomy 22:8; 1 Samuela 9:25, 26; Nehemia 8:16; Tirhkohte 10:9) Mi sîk hmang sebâwngpa hlauhawm tak chu ṭha taka khung tûrin thu a pe bawk. (Exodus 21:28, 29) Chûng thil phûtte ngaihthahna chuan mi dangte ṭhatna tûr ngaihthahna a lantîr a, thisena thiam loh channa a thlen thei a ni.

¹⁵ Hêng dânte phêna awm thu bulte hi engtin nge i nunpui theih ang? I lîrthei te, i khalh ṭhin dân te, i ran vulh te, i in te, i hnathawhna hmun te, leh intihhlimna i thlante chu engvângin nge i ngaihtuah loh vang? Ram ṭhenkhatah chuan nunna atâna hlauhawm thei thilte ṭûl lo taka tih chu ṭhalaite chêtsual chhan ber a ni. Mahse, Pathian hmangaihnaa awm reng duh ṭhalaite chuan nunna an hlut a, thil hlauhawm takte tihna aṭanga phûrna neih chu an tum lo. An tleirâwl lai chuan an chungah chhiatna engmah a thleng thei lo tih ngaih dân âtthlâk tak an nei lo. An ṭhat lai hun chu thil hlauhawmte laka invêngin hlim takin an hmang zâwk a ni.—Thuhriltu 11:9, 10.

16. Nau tihtlâk chungchângah eng Bible thu bul nge kan hman theih? (Footnote en bawk rawh.)

¹⁶ Nau la piang lo nunna pawh Pathian mit hmuhah chuan a hlu a. Hmân lai Israel hun lai khân, mi tuemawin hmeichhe nau pai lai a tih nat a, amah emaw, a naute emaw a thih chuan, Pathianin chu thil thlentîrtu chu tualthattuah a ngai a, “nun aia nun,” a phût a ni. * (Exodus 21:22, 23 chhiar rawh.) Chuti a nih chuan, mahni ṭhatna tûr leh nungchang bawlhhlawhna avânga mite’n kum tin nau tam tak an titla a hmuh hian Jehova pawi tih dân tûr chu han ngaihtuah teh.

17. Thutak a hriat hmaa nau titlatu chu engtin nge i thlamuan ang?

¹⁷ Mahse, Bible thutak a hriat hmaa nau titlatu hmeichhe chungchâng chu eng nge ni ang? Pathian khawngaihna a dawng dâwn lo tihna a ni em? Ni lo ve! Dik takin, inlamlêt  tak zettu chuan Isua thisen chhuak zârah Jehova ngaihdamna a beisei thei a. (Sâm 103:8-14; Ephesi 1:7) Krista ngei chuan: “Mi fel takte lam tûra lo kal ka ni lo va, mi sualte lama simtîr tûra lo kal ka ni zâwk,” tiin a sawi a ni.—Luka 5:32.

18. Engtin nge Bible chuan thisen chhuahna a thlen chhan ber chu a târ lan?

¹⁸ Mi dangte tihnat loh bâkah, Jehova chuan thisen chhuahna thlentîrtu ber—huatna—chu kan thinlung aṭanga paih bo tûrin min duh a ni. Tirhkoh Johana chuan: “Tupawh a unau hua chu tualthat a ni,” tiin a ziak a. (1 Johana 3:15) Chutiang mi chuan a unau chu a hua chauh ni lovin, thi se a duh tihna a ni. A huatna chu huatthlala taka a sawichhiatna leh dik lo taka a puhna aṭangin a lang chhuak thei a; chutiang a nih chuan Jehova hremna a tuar ang. (Leviticus 19:16; Deuteronomy 19:18-21; Matthaia 5:22) Chuti a nih chuan, kan thinlunga huatna ṭha lo tak awm chu paih bo vek a va pawimawh tak êm!—Jakoba 1:14, 15; 4:1-3.

19. Bible thu bulte thununa awmtu chuan Sâm 11:5 leh Philippi 4:8, 9-a thute hi engtin nge a ngaih?

¹⁹ Jehova’n nunna a hlut anga hluttute leh a hmangaihnaa invawn ṭhat duhtute chuan tharum thawhna rêng rêng chu an pumpelh bawk a. Sâm 11:5 chuan: “Nunrâwnna ngaina erawh chu a nunnain a haw ṭhîn,” tiin a sawi. Chu thuah chuan Pathian mize sawina mai aia tam a tel a; chu chu nun dân tûr kaihhruaina a ni. Chu chuan Pathian hmangaihtute chu tharum thawh duhna neihtîr thei intihhlimna tawh phawt chu hawisan tûrin a chêttîr a. Chutiang bawkin, Jehova chu “thlamuanna Pathian,” a nih loh leh remna Pathian tia sawina chuan a chhiahhlawhte chu an ngaihtuahna leh thinlungte remna awmtîrtu thil duhawm, nungchang mawi, leh fak tlâktea tikhat tûrin a chêttîr a ni.—Philippi 4:8, 9 chhiar rawh.

20-22. Khawvêl lam thila Kristiante dinhmun chu eng nge ni a, engvângin nge?

²⁰ Pathian mit hmuhah chuan Setana khawvêl pum hlûm hi thisen chhuahnain a khat a. Bible-a sakawlh hlauhawm  tak anga târ lan khawvêl politics kal hmang hian Jehova chhiahhlawhte pawh tiamin mi tam takte nunna a la tawh a ni. (Daniela 8:3, 4, 20-22; Thu Puan 13:1, 2, 7, 8) Sumdâwnna leh science lam chuan he sakawlh hi a thawhpui a, ngaihtuah phâk bâka hlauhawm râlthuamte siamin a hlâwkna nasa tak an têl bawk. “Khawvêl pumhlûm hi mi sual thu thuin a awm” tih chu a va dik tak êm!—1 Johana 5:19.

²¹ Isua hnungzuitute chu ‘khawvêla mi an nih loh’ avângin, politics leh indonaah an tualdâwih tlat a, chutiang chuan mi mal leh khawtlânga thisena thiam loh channa an pumpelh a ni. * (Johana 15:19; 17:16) Mite’n an tihduhdah hunah pawh Krista entawnin, tharum thawhin an chhâng lêt lo. An hmêlmate chungah hmangaihna lantîrin, an ṭawngṭaisak hial zâwk a ni.—Matthaia 5:44; Rom 12:17-21.

²² A pawimawh ber chu, Kristian dikte chuan “Babulon Khaw Ropui,” khawvêla sakhaw dik lo lalram leh thisen  chhuah hmang ber nêna inkûngkaihna an nei lo hi a ni. Pathian Thu chuan: “A chhûngah zâwlneihote, mi thianghlimhote, leia thah zawng zawngte thisen chu an hmu,” tiin a sawi a. Chuvângin: “Ka mite u . . . a chhûng ata chhuak rawh u,” tia vaukhân kan ni.—Thu Puan 17:6; 18:2, 4, 24.

23. Babulon Khaw Ropui aṭanga chhuak tih awmzia chu eng nge ni?

²³ Babulon Khaw Ropui chhuahsannaah chuan, chuta kan hming dah thai chhiat mai a tâwk lo. Sakhaw dik lovin a pawm emaw, a chawilâr emaw chîn dân suaksual—nungchang bawlhhlawhna te, politics-a telna te, leh duhâm taka hausak ûmnate—huat pawh a tel a ni. (Sâm 97:10 chhiar rawh; Thu Puan 18:7, 9-17) Hêng thiltihte hian thisen chhuahna a va thlen zing tak êm!

24, 25. (a) Thisena thiam loh chang inlamlêttu chungah chuan eng ṭanchhanin nge Pathianin lainatna a lantîr theih? (b) Hei hian Bible hun laia eng ruahmanna nge min hriat chhuahtîr?

²⁴ Biakna dika kan awm hmain, kawng engemaw takin Setana khawvêl chu kan thlâwp a, thisena mawhphurhna engemaw chen chu kan nei ṭheuh va. Mahse, kan nun kawngte kan thlâk avâng te, Krista tlanna inthawina kan rin avâng te, leh Pathian hnênah kan nun kan inpumpêk avângtein, Pathian khawngaihna leh thlarau lama vênhimna chu kan dawng a ni. (Tirhkohte 3:19) Chu vênhimna chuan Bible hun laia tualtlânna khuate kha min hriat chhuahtîr a ni.—Number 35:11-15; Deuteronomy 21:1-9.

²⁵ Chu ruahmanna chuan eng angin nge hna a thawh? Israel miin mi a thah palh chuan, tualtlânna khua a khawi emaw berah a tlân lût tûr a ni a. Rorêltu tling takte’n ro an rêlsak hnuah, chu khuaah chuan puithiam lalber a thih hma loh zawng a awm reng tûr a ni. A thih hnuah chuan hmun dangah zalên takin a awm thei tawh ang. Pathian khawngaihna leh mihringte nunna a ngaihhlutzia târ lanna duhawm tak a va ni êm! Hmân laia tualtlânna khuate ang bawkin tûn laiah Krista tlanna inthawina kan nei a, chu chuan nunna leh thisen thianghlimna chungchânga Pathian thupêkte bawhchhiat palh avânga thihna tûr lakah min vênghim  a ni. Chu chu i ngaihlu em? I ngaihlu tih engtin nge i lantîr theih? I tih theih dân kawng khat chu, a bîk takin “hrehawm nasa tak” a lo thlen thuai dâwn avânga invênhim nâna Pathian ruahmanna siam pawm tûra mi dangte sâwm hi a ni.—Matthaia 24:21; 2 Korinth 6:1, 2.

26-28. Eng kawngin nge tûn laia kan dinhmun hi zâwlnei Ezekiela hun lai nên a inan a, engtin nge Pathian hmangaihnaah kan invawn reng theih?

²⁶ Tûn laia Pathian mite dinhmun hian, hmân lai Israel mite thlarau lama enthla tûra Jehova mi tirh zâwlnei Ezekiela kha min hriat chhuahtîr a. “Ka kâa thu chhuak hi ngaithla la, ka hnên ata inrâlrinna tûr thu chu an hnênah hrilh rawh,” tiin Pathianin hnathawh tûr a pe a ni. Ezekiela chuan chu hna chu lo ngaihthah se chuan, Jerusalem tihchhiat a nih huna tihboralte thisen mawh chu a phur ngei ang. (Ezekiela 33:7-9) Mahse, thu a âwih a, an thisen mawh chu a phur ta lo a ni.

²⁷ Tûn laiah pawh, Setana khawvêl pum pui tâwpna chu kan hmachhawn mêk a. Chuvângin, Jehova Thuhretute chuan Lalram chanchin ṭha nêna inkûngkaihin Pathian ‘phuba lâk nî thu sawi tûrin’ mawhphurhna an nei a, chu chu chanvo hlu tak niin an ngai bawk. (Isaia 61:2; Matthaia 24:14) He hna pawimawh takah hian theih tâwp chhuahin i tel em? Tirhkoh Paula chuan he thu hrilhna hna hi a ngai pawimawh hle a. Chuvâng chuan: “Mi zawng zawng thisenah ka hul a ni . . . Pathian rêl zawng zawng azain in hnênah hrilh ka tîm loh kha,” tiin a sawi thei a ni. (Tirhkohte 20:26, 27) Kan tân entawn tûr ṭha a va ni êm!

²⁸ Pa ber anga Jehova min hmangaihna duhawm taka awm reng tûr chuan, thisen leh nunna chu a thlîr dân anga thlîr mai aia tam kan tih a ngai a. A mit hmuha kan thianghlim reng a ngai bawk a, chumi chungchâng chu bung 8-naah kan hmu ang.