1, 2. Pathian Jehova hmangaih tûrin engin nge chêttîr che?

PATHIAN i hmangaih em? Pathian Jehova hnêna inpumpêk a, inlaichînna nei tawh i nih chuan, “Hmangaih e,” tih chu i chhânna a ni ang a; chu chu thil inâwm tak pawh a ni ngei ang! Jehova chu kan tân hmangaih âwm a ni rêng a ni. Pathian kan hmangaihna chu a nihna takah chuan min hmangaihna kan chhân lêtna mai a ni a. Bible chuan: “[Jehova’n] min hmangaih hmasak avângin kan hmangaih a ni,” tiin a sawi.—1 Johana 4:19.

² Jehova chuan min hmangaihzia a târ lang hmasa a. Kan chênna tûr leilung mawi tak min pe a. Kan tisa lam mamawhte a ngaihsak a ni. (Matthaia 5:43-48) Chu aia pawimawh zâwk, kan thlarau lam mamawhte pawh a ngaihsak bawk. A Thu, Bible min pe a. Chu bâkah, a hnêna ṭawngṭai tûrin min sâwm a, min ngaihthlâksak leh min ṭanpui tûra a thlarau thianghlim pêk min tiam bawk. (Sâm 65:2; Luka 11:13) A pawimawh ber chu, sual leh thihna ata min chhan chhuak tûra A Fapa duh tak a rawn tîr hi a ni. Jehova’n kan chunga a lantîr hmangaihna chu a va ropui êm!—Johana 3:16; Rom 5:8 chhiar rawh.

3. (a) Pathian hmangaihnaa awm reng tûrin, keimahni lamah eng nge kan tih ngai? (b) Eng zawhna pawimawh tak nge kan chhût ngun ngai a, a chhânna chu khawiah nge kan hmuh theih?

³ Jehova chuan a hmangaihna chu chatuana hlâwkpui  tûrin min duh a. Mahse, kan hlâwkpui dâwn leh dâwn loh chu keimahniah a innghat a ni. Pathian Thu chuan: “Chatuan nunna . . . nghâk chungin, Pathian hmangaihnaah chuan invawng ṭha rawh u,” tiin min fuih a. (Juda 21) “Invawng ṭha” tih ṭawngkam hian Pathian hmangaihnaa awm reng tûr chuan keimahni lamah thil tih kan neih a ngai tih a kâwk a ni. A hmangaihna chu tih tak zeta kan chhân lêt a ngai a. Zawhna pawimawh tak kan ngaihtuah ngai ta chu, ‘Engtin nge Pathian ka hmangaihna chu ka lantîr theih ang?’ tih hi a ni. A chhânna chu thlarauva thâwk khum tirhkoh Johana thusawiah kan hmu a ni: “Pathian kan hmangaihna chu hei hi a ni, a thupêkte kan  zawm hi; a thupêkte chu a khirh si lo va,” tihah hian. (1 Johana 5:3) Pathian kan hmangaihna a nasatzia lantîr kan duh avângin, hêng thute awmzia hi ngun takin kan chhût tûr a ni.

4, 5. (a) ‘Pathian hmangaihna’ tih thu hian eng nge a kawh? (b) I thinlunga Jehova i hmangaih ṭan dân sawi rawh.

⁴ Tirhkoh Johana’n ‘Pathian hmangaihna’ a tih hian eng a tihna nge? He ṭawngkam hian Pathian min hmangaihna lam ni lovin, amah kan hmangaihna lam a kâwk a ni. I thinlunga Jehova hmangaihna i neih ṭan lai kha i hre chhuak thei em?

⁵ Jehova leh a thiltumte chungchânga thu dik i hriat ṭan a, rinna i neih ṭan lai kha han ngaihtuah lêt lawk teh. Pathian laka inmihran suala piang ni mah la, Jehova chuan Krista hmangin Adama hloh tâk ṭhat famkimna leh chatuan nunna nei thei tûrin kawng a hawnsak che tih i hre thiam a ni. (Matthaia 20:28; Rom 5:12, 18) I tâna thi tûra a Fapa duh tak a rawn tirhnaa Jehova inpêkna a nasatzia chu i hre thiam ṭan a. Chu chuan i thinlung a khawihin, i chunga hmangaihna ropui tak lantîrtu Pathian chu i hmangaih ṭan ta a ni.—1 Johana 4:9, 10 chhiar rawh.

6. Hmangaihna dik tak chu eng anga târ lan nge a nih a, Pathian i hmangaihna chuan eng ti tûrin nge a chêttîr che?

⁶ Mahse, chu hmangaihna chu Jehova kan hmangaihna dik tak bul inṭanna chauh a ni a. Hmangaihna chu rilrua veina mai a ni lo va, ṭawngkam mai lah a ni hek lo. Pathian kan hmangaihna dik takah chuan, “Jehova ka hmangaih,” tia sawi mai aia tam a tel a ni. Rinna ang bawkin, hmangaihna dik tak chu thiltih hmanga târ lan a ni a. (Jakoba 2:26) A bîk takin, hmangaihna chu a dawngtu duhzâwng thilte tihna hmanga târ lan a ni. Chuvângin, i thinlungah Jehova hmangaihnain zung a kaih tawh chuan, i Pa vâna mi tilâwm tûr zâwnga nun duhna chu i nei ang.  Baptisma chang tawh Thuhretu i ni em? I nih chuan, chu hmangaihna thûk tak leh i rinawmna chuan i nuna thu tlûkna pawimawh ber a siamtîr tawh che tihna a ni a. Jehova duhzâwng ti tûrin a hnênah i inpumpêk a, chu chu baptisma channa hmangin i lantîr tawh a ni. (Rom 14:7, 8 chhiar rawh.) Jehova hnêna he thutiam urhsûn tak hlennaah hian a dawta tirhkoh Johana thusawi hi a tel a ni.

7. Pathian thupêk ṭhenkhat chu engte nge ni a, chûng thupêkte zawmnaah chuan eng nge tel?

⁷ Johana chuan Pathian kan hmangaihna awmzia chu: ‘A thupêk kan zawm hi a ni,’ tiin a hrilhfiah a. Pathian thupêkte chu engte nge ni? Jehova chuan a Thu, Bible-ah thupêk tam tak min pe a. Entîr nân, zu ruih te, inngaih te, milem biak te, rûkrûk te, leh dâwt sawi ang chi thil chînte chu a khap tlat a ni. (1 Korinth 5:11; 6:18; 10:14; Ephesi 4:28; Kolossa 3:9) Pathian thupêk zawmnaah chuan nungchang lama Bible tehnate mila nun a tel bawk.

8, 9. Bible thupêk chiang tak a awm lohna dinhmunah pawh engtin nge Jehova duhzâwng thilte chu kan hriat theih ang? Entîrna pe rawh.

⁸ Mahse, Jehova tilâwm tûr chuan, a thupêk chiang takte zawm mai aia tam kan tih a ngai a. Jehova chuan kan nî tin nun kawng engkima min kaihruaitu tûr dân tam tak zamin min khuahkhirh lo. Chuvângin, kan nî tin nunah hian Bible thupêk chiang tak awm lohna dinhmun tam tak kan tâwk thei a. Chutiang hunah chuan, Jehova tilâwmtu chu engtin nge kan hriat theih ang? Bible-ah hian Pathian ngaihtuah dân chiang taka târ langtu tam tak a awm a. Bible kan zir hian Jehova duhzâwng leh a huatzâwngte kan hria a ni. (Sâm 97:10 chhiar rawh; Thufingte 6:16-19) A ngaihhlut zâwng rilru put hmang leh thiltihte pawh kan hre thiam a. Jehova miziate leh a kawng chanchinte kan hriat tam poh leh a ngaihtuahnate chu  kan thu tlûkna siamte kan inkaihhruaitîrin, kan thiltihte kan inthununtîr lehzual thei ang. Chutiang chuan, Bible dân chiang tak a awm lohna dinhmunah pawh, “Lalpa duhzâwng eng nge ni,” tih kan hre thei ṭhîn.—Ephesi 5:17.

⁹ Entîr nân, tharum thawhna râpthlâk tak emaw, nungchang bawlhhlawhna emaw târ lanna film, a nih loh leh TV program-te khapna thupêk chiang tak Bible-ah a awm lo. Mahse, chûng thilte khapna thupêk chiang tak kan mamawh kher em? Jehova’n chûng thilte a thlîr dân chu kan hria a. “[Jehova chuan] nunrâwnna ngaina . . . chu a nunnain a haw ṭhîn,” tih a Thu chuan chiang takin min hrilh a. (Sâm 11:5) “Inngaite . . . chu Pathianin a ngaihtuah dâwn,” tih min hrilh bawk. (Hebrai 13:4) Thlarauva thâwk khum hêng thute ngaihtuahin, Jehova duhzâwng chu kan hre chiang thei a ni. Chuvângin, kan Pathian huatzâwng thiltihte en loh chu kan thlang a. He khawvêlin intihhlimna pawi lo anga lantîr a tum nungchang bawlhhlawhna thiltihte kan pumpelh hian Jehova chu a lâwm tih kan hria a ni. *

10, 11. Engvângin nge Jehova thuâwih chu kan thlan a, eng ang thuâwihna nge kan lantîr?

¹⁰ Pathian thupêkte kan zawm chhan bul ber chu eng nge ni? Engvângin nge nî tin hian Pathian ngaihtuah dân nia kan hriatte mila nun chu kan duh? Hremna pumpelh duh vâng emaw, Pathian duhzâwng ngaihthahtute tawrh ṭhin thil ṭha lote pumpelh duh vâng emaw maia Pathian thupêk zâwmtu kan ni lo. (Galatia 6:7) Chu ai chuan, Jehova thuâwih chu amah kan hmangaihzia târ lanna hun remchâng ṭha tak angin kan thlîr zâwk a ni. Naupangin a pa duhsakna hlawh a duh angin, Jehova duhsakna hlawh kan duh a. (Sâm 5:12) Ani chu kan Pa a ni a, kan hmangaih a ni. ‘Jehova duhsakna hlawh’ zâwngin kan nung tih  inhriatna aia hlimna leh lungawina nasa zâwk min pe thei thil dang engmah a awm lo.—Thufingte 12:2.

¹¹ Chuvângin, hreh tak chungin thu kan âwih lo va; kan duhna lai leh kan duh huna thuâwih lah kan ni hek lo. * A remchân hun leh harsatna a awm loh hun chauhva thu âwih kan ni lo bawk. Chu aimah chuan, ‘rilru tak zeta âwih’ kan ni zâwk. (Rom 6:17, 18) “I thupêk, ka ngainat chungahte chuan, ka lâwm ang,” tia ziaktu Bible-a fakna hla phuahtu rilru put hmang hi kan pu ve a ni. (Sâm 119:47) Ni e, Jehova thuâwih chu kan duh a. Ani chuan thuâwihna pumhlûm a phûin, min phût a ni tih kan hre bawk. (Deuteronomy 12:32) Bible chuan kum sâwm bi tam tak chhûng thuâwihtu mi rinawm Nova chungchângah: “Chutiang chuan Novan a ti a; Pathianin a hnêna thu a pêk zawng zawng ang ngei chuan a ti ta a,” tiin a sawi a. Jehova chuan kan chungchângah pawh chutiang chuan sawi ve se kan duh a ni.—Genesis 6:22.

12. Eng hunah nge kan thuâwihna chuan Jehova thinlung a tihlâwm?

¹² Engtin nge Jehova chuan inhuam taka a thu kan âwihna chu a ngaih? Chutianga kan tihna chuan a ‘thinlung a tilâwm’ tih Bible chuan a sawi a ni. (Thufingte 27:11) Kan thuâwihna chuan lei leh vâna Lal Chungnungber thinlung chu a tilâwm thei tak zet em? Tehrêng mai, lâwm chhan tûr ṭha tak a nei bawk! Jehova chuan zalên taka duh thlan theihna neiin min siam a. Chu mi awmzia chu duh kan thlang thei a; Pathian thuâwih kan thlang theiin, a thuâwih loh pawh kan thlang thei tihna a ni. (Deuteronomy 30:15, 16, 19, 20) Thinlung zawng zawnga Jehova kan hmangaih avânga a thuâwih kan thlan hian,  chu chuan kan Pa vâna mi chu nasa takin a tilâwm a. (Thufingte 11:20) Nun kawng ṭha ber kan thlang tihna a ni bawk.

13, 14. Engvângin nge Pathian ‘thupêkte chu a khirh lo’ tia kan sawi theih a, chu chu eng anga tehkhin theih nge a nih?

¹³ Tirhkoh Johana chuan Jehova thil phût chungchângah: “A thupêkte chu a khirh si lo va,” tiin thu thlamuanthlâk tak min hrilh a. Johana thawn khat 5:3-a “khirh” tia lehlin Grik thu mal hi, a awmzia dik tak chu “rit” tihna a ni. * Bible lehlin dangah chuan: “A thupêkte phurrit a ni si lo va,” tiin kan chhiar a ni. (Baptist Mid-Missions’ Translation) Jehova thil phûtte chu thil inâwm lo emaw, phurrit emaw a ni lo va. A dânte chu mihring ṭha famkim lote tân zawm theih loh a ni hek lo.

¹⁴ Chu chu hetiang hian kan tehkhin thei ang. I ṭhian ṭha tak chuan a insawnnaa pui tûrin a sâwm che a. Bungrua thiar tûr tam tak a awm a ni. Ṭhenkhat chu mi pakhat tân awlsam taka chawisawn theih a nih laiin, a ṭhen chu mi pahnih chawi ngai khawpin a rit a ni. I ṭhianpa chuan i thiar tûrte chu a thlang a. Rit lutukte chu a thiartîr che ang em? Tîr lo vang. I intihnat chu a duh dâwn si lo va. Chutiang bawkin, hmangaihna leh ngilneihnaa khat kan Pathian chuan kan tâna zawm harsa lutuk tûr thupêkte zâwm tûrin min phût lo a ni. (Deuteronomy 30:11-14) Chutiang phurrit tak chu min phurhtîr ngai lo vang. Jehova chuan “kan taksa siam dân hi a hriat a, vaivut mai kan  ni tih a hriat reng avângin” kan tih theih chin a hre thiam a ni.—Sâm 103:14.

15. Engvângin nge Jehova thupêkte chu kan tâna ṭha ber tûr a ni tih kan rin tlat theih?

¹⁵ Jehova thupêkte chu khirh a hnêkin, kan tâna ṭha ber tûr a ni zâwk a. (Isaia 48:17 chhiar rawh.) Chuvângin, Mosia chuan hmân lai Israel mite hnênah: “Hêng dân zawng zawngte hi zâwm tûr leh kan ṭhat rengna tûra LALPA kan Pathian chu ṭih tûrin LALPA chuan thu min pe a, vawiin nîte anga mi nungdama min zuah reng theih nân,” tiin a sawi thei a ni. (Deuteronomy 6:24) Jehova chuan a dânte min pein, kan tâna ṭha ber tûr leh kan ṭhat hlenna tûr a ngaihtuah tih kan ring tlat thei a. Engtin nge kan tâna ṭha lo tûr chu a ngaihtuah theih tehrêng ang? Jehova chuan finna tâwp nei lo a nei si a. (Rom 11:33) Chuvângin, kan tâna ṭha ber tûr chu a hria a, hmangaihna chungchânga entawn tûr ṭha ber a ni bawk. (1 Johana 4:8) A mize bul ber, hmangaihna chuan a thusawi leh a thiltih apiang chu a thunun a. Chu chu a chhiahhlawhte zawm atâna a thupêk zawng zawngte innghahna a ni.

16. He khawvêl suaksual tak thununna leh sual lam tih duhna nei mi ṭha famkim lo kan ni chung pawhin engvângin nge thu kan âwih theih?

¹⁶ Pathian thuâwih chu a awlsam ang tihna erawh a ni lo. ‘Mi sual thu thua awm’ he khawvêl suaksual tak thununna hi kan do a ngai a. (1 Johana 5:19) Pathian dânte bawhchhiat duhna min neihtîrtu kan ṭhat famkim lohna pawh kan do a ngai bawk. (Rom 7:21-25) Mahse, Pathian kan hmangaihna chuan min do hnehtîr thei a ni. Jehova chuan thuâwihna hmanga amah hmangaihna lantîr duhte chu mal a sâwm ṭhîn a. “A thu zâwm apiangte” chu a thlarau thianghlim a pe ṭhîn a ni. (Tirhkohte 5:32) Chu thlarau chuan keimahniah rah ṭha tak—thuâwihna kawng zawh tûra min ṭanpuitu mize hlu takte a chhuah a ni.—Galatia 5:22, 23.

17, 18. (a) He lehkhabuah hian eng nge kan bih chian ang a, chutianga kan bih chian rual chuan kan rilruah eng nge kan dah reng ang? (b) A dawta thuziakah eng nge kan sawiho vang?

 ¹⁷ He lehkhabuah hian, Jehova thu bul leh nungchang tehnate bâkah, a duhzâwng târ lanna thil dang tam tak kan bih chiang ang. Chutih rual chuan, thil pawimawh tam tak kan hriat reng ngai a awm a ni. Jehova chuan a dânte leh a thu bulte zâwm tûrin min tilui lo, kan thinlung chhûng aṭanga lo chhuak inhuam taka thuâwihna chu a duh a. Tin, tûna malsâwmna tam tak dawng thei tûr leh nakina chatuan nunna nei thei tûr zâwnga nung tûrin min duh tih i theihnghilh lo vang u. Chu bâkah, kan thinlung zawng zawnga thuâwihna chu a nihna dik tak—Jehova kan hmangaihzia lantîrna hun remchâng ṭha tak—angin i thlîr ang u.

¹⁸ Thil dik leh dik lo thliar hrang thei tûra min ṭanpui tûrin, Jehova chuan chhia leh ṭha hriatna min pe a. Mahse, kan chhia leh ṭha hriatna chu kaihruaitu rintlâk ni tûr chuan sawizawi a ngai a, chu chu a dawta thuziakah sawiho a ni ang.