1-3. (a) Bible chuan hnial rual loh eng thu dik nge a sawi? (b) Engtin nge a ṭha zâwnga min thunun thei tûr ṭhiante kan thlan theih?

LAPUA hian a bula thil awmte chu a hîp khâwm ṭhîn a; mihringte pawh chutiang chu kan ni. Kan ṭhian hnaite rilru put hmang te, tehna te, leh miziate chu tum lo deuh pawhin kan lo la palh ṭhîn.

² Bible chuan: “Mi fing pâwl la, i lo fing ang a, mi â pâwl erawh chu hrehawm tuar phahna a ni,” tiin hnial rual loh thu dik chu a sawi a. (Thufingte 13:20) He thufing hian inkawmna satliah aia tam a sawi a ni. “Pâwl” tih ṭawngkam hian hun rei tak chhûng inkawm rengna a kâwk a. * He Bible châng chungchângah Bible hrilhfiahna lehkhabu pakhat chuan heti hian a sawi: “Mi pâwl tih hian hmangaih taka inzawmna a kâwk a ni,” tiin. Kan hmangaihte entawn kan tum ṭhîn tih chu i pawm dâwn lâwm ni? Kan hmangaihte nên chuan rilrua inzawmna kan neih avângin, a ṭha zâwng emaw, a chhe zâwng emawin kan chungah nghawng an nei thei a ni.

³ Pathian hmangaihnaa awm reng tûr chuan a ṭha zâwnga min thununtu ṭhiante kan thlan a pawimawh hle a. Chu chu engtin nge kan tih theih ang? A awlsam zâwnga sawi chuan, Pathianin a hmangaihte chu hmangaih a, a ṭhiante chu ṭhiana siamin kan ti thei a ni. Han  ngaihtuah teh: Pathianin a ṭhiante hnêna a beisei mize neitute aia ṭhian ṭha zâwk thlan tûr an awm thei dâwn em ni? Chuti a nih chuan, Pathianin eng ang mite nge a hmangaih tih chu i lo bih chiang ang u. Jehova thlîr dân rilrua kan vawn reng chuan, ṭhian ṭha thlan dân kan thiam lehzual ang.

4. Engvângin nge Jehova chu ṭhian thlan chungchângah a duh tui a, engvângin nge Abrahama chu “ka ṭhian” tia a koh?

⁴ Jehova chu ṭhian thlan chungchângah a duh tui hle a. Duh tui thei tûr a ni rêng lâwm ni? Tihah chuan, lei leh vâna Lalchungnungber a ni a, amah nêna inṭhianna neih chu chanvo ropui ber a ni si a. A nih chuan, eng ang mi nge ṭhiana a thlan? Jehova chuan amah rinchhan a, ring pumhlûmtute chu a hnaih a. Entîr nân, rinna nasa tak a neih avânga hriat hlawh tak, thlahtu Abrahama chungchâng hi ngaihtuah ta ila. Pa ber tân chuan inthawi nâna a fapa hlân tûra ngen aia rinna fiahna nasa zâwk a awm thei lo. * Mahse, Abrahama chuan “mitthi pawh Pathian chuan a kai tho thei” tih ring tlatin, “Isaaka chu a hlân a.” (Hebrai 11:17-19) Chutiang rinna leh thu âwihna a târ lan avângin, Jehova chuan “ka ṭhian” tiin a ko hial a ni.—Isaia 41:8; Jakoba 2:21-23.

5. Engtin nge Jehova chuan rinawm taka a thu âwihtute chu a thlîr?

⁵ Jehova chuan rinawm taka thu âwihna chu a ngaihlu hle a. A chunga rinawmna ngai pawimawh bertute chu a hmangaih a ni. (2 Samuela 22:26 chhiar rawh.) He lehkhabu bung 1-naa kan hmuh tâk ang khân, Pathian Jehova chuan hmangaihna avânga a thu âwih thlangtute chu a  lâwm hle a. Thufingte 3:32 chuan: “Mi ṭha famkim erawh chu a ṭhian an ni,” tiin a sawi. Pathian thil phûtte rinawm taka titute chuan Jehova sâwmna duhawm tak: A “puan inah” thlen theihnate, amah chibai bûk theihnate, engtik hunah pawh ṭawngṭaia pan theihna te chu an dawng a ni.—Sâm 15:1-5.

6. Engtin nge Isua kan hmangaihna chu kan târ lan theih a, Jehova chuan a Fapa hmangaihtute chu engtin nge a ngaih?

⁶ Jehova chuan a fapa mal neih chhun Isua hmangaih tute chu a hmangaih a. Isua chuan: “Miin mi hmangaih chuan ka thu a zâwm ang a; ka Pain ani chu a hmangaih ang a, a hnênah kan lo kal ang a, a hnênah kan awm reng ang,” tiin a sawi. (Johana 14:23) Engtin nge Isua kan hmangaihna chu kan târ lan theih? Chanchin ṭha hril tûr leh zirtîr siam tûra thupêk tiamin, a thupêkte zâwmin kan târ lang thei a. (Matthaia 28:19, 20; Johana 14:15, 21) Ṭha famkim lo kan ni chung pawha kan thusawi leh thiltihah theih tâwp chhuaha amah kan entawn a, ‘a hniaka kan zui’ tlat hian, Isua kan hmangaihna kan târ lang bawk. (1 Petera 2:21) A Fapa Krista an hmangaihna avânga nun kawng ûmtute thawhrimna chuan Jehova thinlung a khawih hle a ni.

7. Engvângin nge Jehova ṭhiante ṭhiana siam chu a finthlâk?

⁷ Jehova’n a ṭhiante hnêna a beisei miziate zîngah chuan rinna te, rinawmna te, thuâwihna te, leh Isua leh a nun kawngte hmangaihna te a tel a. Heti hian kan inzâwt ṭheuh tûr a ni: ‘Hêng miziate leh kawngte hi ka ṭhian ṭhate mizia a ni em? Jehova ṭhiante chu ṭhianah ka siam em?’ tihte hi. Chutianga tih chu a finthlâk a ni. Pathian duhzâwng miziate nei a, ṭhahnem ngai taka Lalram chanchin ṭha hriltute chuan kan chungah thununna ṭha an nei thei a, Pathian tilâwm zâwnga nung tûrin min thunun thei a ni.—“ Ṭhian Ṭha Tih Chu Eng Nge Ni?” tih phêk 29-naa bâwm chu en rawh.

8. (a) Naomi leh Ruthi (b) Hebrai tlangvâl pathum (c) Paula leh Timothea inkâra awm inlaichînnaah engin nge i rilru khawih?

⁸ Bible-ah hian ṭhian ṭha thlan hlâwkpuitute entîrna tam tak a chuang a. Naomi leh a monu Ruthi te, Babulon-a awm inṭhian ṭha tak Hebrai tlangvâl pathum te, leh Paula leh Timothea te inkâra inṭhianna chungchângte chu i chhiar thei a ni. (Ruthi 1:16; Daniela 3:17, 18; 1 Korinth 4:17; Philippi 2:20-22) Mahse, tûnah chuan entîrna dang: Davida leh Jonathana inkâra inṭhianna chu i lo ngaihtuah ang u.

9, 10. Davida leh Jonathana inkâra inṭhianna chu engah nge a innghah?

⁹ Bible chuan Davida’n Goliatha a thah hnu khân, “Jonathana nunna leh Davida nunna chu a lo inzawm ta chiah mai a,” tiin a sawi a. (1 Samuela 18:1) Chutiang chuan, kum lamah inthlau hle mah se, inṭhianna nghet tak an nei ṭan a, indonaa Jonathana thih thlengin an inṭhianna chu a nghet reng a ni. * (2 Samuela 1:26) An inṭhianna nghet tak chu engah nge a innghah?

¹⁰ Davida leh Jonathana-te chu Pathian an hmangaihna leh a chunga rinawm tlat an duhna chuan ṭhian nghet takah a siam a. Pathian tihlâwm an duhna chuan a inpumkhattîr a ni. An pahnih hian an inkâra inngainatna awmtîrtu miziate an târ lang ve ve bawk. Pathian Jehova hming humhimtu tleirâwl David huaisenna leh ṭhahnemngaihna chuan Jonathana rilru chu a hneh a ni ngei ang. Davida chuan rinawm taka Jehova ruahmanna thlâwptu leh a ṭhatna tûr aia Davida ṭhatna tûr dah pawimawhtu,  a aia upa zâwk Jonathana chu a zah tih a chiang hle. Entîr nân, Davida lunghnual lai ber, Jonathana pa lal suaksual Saula hnên ata a tlân chhiat a, thlalêra a vahvaih laia thilthleng kha han ngaihtuah teh. Rinawmna chhinchhiah tlâk tak lantîrin Jonathana chuan hma a la a, “Davida hnênah chuan a kal a, Pathianah a kut a tihchaksak” a ni. (1 Samuela 23:16) A ṭhian duh tak lo kal a, ṭanpuina  leh fuihna a rawn pêk avânga Davida lâwm dân tûr chu han mitthla teh! *

11. Jonathana leh Davida entawn tûr siam aṭangin inṭhianna chungchângah eng nge kan zir?

¹¹ Jonathana leh Davida entawn tûr siam aṭangin eng nge kan zir theih? Ṭhian inkârah hian Pathian nêna inlaichînna ṭha neih ve ve hi thil pawimawh ber a ni, tih hi. Kan thurin ang, kan nungchang ang, leh Pathian laka rinawm kan duhna ang neitute kan hnaih hian, kan ngaihtuahna,  rilru veizâwng, leh thiltawnte chu kan inhrilh tawn thei a, chu chuan min fuih a, min tichaktu inthlamuan tawnna a awmtîr a ni. (Rom 1:11, 12 chhiar rawh.) Chutianga kawm tûr thlarau lama puitling takte chu kan Kristian unaute zîngah kan hmu thei a ni. Mahse, Kingdom Hall-a rawn inkhâwm apiangte hi ṭhian atâna ṭha an ni vek tihna a ni em? Ni lo ve.

12, 13. (a) Engvângin nge Kristian unaute zîngah pawh ṭhian kawm tûrah kan fîmkhur ang? (b) Kum zabi khatnaa kohhrante khân eng harsatna nge an tawh a, Paula chuan eng vaukhânna khauh tak nge a pêk?

¹² Kohhran chhûngah pawh thlarau lama min tichak theitu tûrte chu ṭhian atân kan thlang tûr a ni. Chu chu mak kan ti tûr a ni em? Ni lo ve. Thing pakhata a rah zawng zawng chu a ruala a hmin loh ang bawkin, kohhran chhûnga Kristian zawng zawng chu thlarau lamah a rualin an puitling vek lo. Chuvângin, kohhran tinah hian Kristiante chu thlarau lama an puitlin dân a inang lo tih kan hmu a. (Hebrai 5:12–6:3) Mahse, kohhrana mi tharte leh chak lo deuhte chu thlarau lama ṭhang chho tûra ṭanpui kan duh avângin, an chungah dawhtheihna leh hmangaihna kan lantîr a ni.—Rom 14:1; 15:1.

¹³ Kohhran chhûnga kan ṭhian kawmah fîmkhur a ngaih châng a awm thei a. Ṭhenkhat chu thil dik lo tihna engemawah an lo inhnamhnawih mai thei. Mi dangte chuan lungnih lohna emaw, sawisêl duhna emaw an nei mai thei bawk. C.E. kum zabi khatnaa kohhrante khân chutiang dinhmun chu an tawng a. Mi tam zâwkte chu rinawm mah se, ṭhenkhat chu an awm ṭha duh lo. Korinth kohhrana mi ṭhenkhatin Kristian zirtîrna eng engemawte an zawm loh avângin, tirhkoh Paula chuan chu kohhran chu: “Bumin awm suh u; ‘Ṭhian sualte chuan nungchang ṭha an tikhawlo ṭhîn,’” tiin a vaukhân a ni. (1 Korinth 15:12, 33) Paula  chuan Timothea chu Kristian unaute zîngah pawh awm ṭha duh lo an awm theih thu sawiin a vaukhân a. Timothea chu chûng mite laka inthiar fihlîm a, anmahni kâwm lo tûra hrilh a ni.—2 Timothea 2:20-22 chhiar rawh.

14. Ṭhian kawm chungchângah Paula vaukhânna phêna awm thu bul chu engtin nge kan nunpui theih ang?

¹⁴ Paula vaukhânna phêna awm thu bul chu engtin nge kan nunpui theih ang? Kohhran chhûng leh pâwna mi tupawh, a ṭha lo lama min thunun theitu apiangte kawm lohna hmangin kan ti thei a. (2 Thessalonika 3:6, 7, 14) Jehova nêna kan inlaichînna chu kan vênghim tûr a ni. Lapua angin kan ṭhian ṭhate rilru put hmang leh tih dânte chu kan hîp, a nih loh leh kan zir thei tih hre reng ang che. Tui bawlhhlawha chiah lapuain tui thianghlim a hîp khâwm kan beisei theih loh ang bawkin, ṭhian ṭha lo kawmnain rah ṭha a chhuah kan beisei thei lo.—1 Korinth 5:6.

15. Kohhranah thlarau lama puitling tak ṭhiante nei tûrin eng nge i tih theih?

¹⁵ Kristian unaute zîngah ṭhian ṭha hmuh tûr an awm chu a lâwmawm hle. (Sâm 133:1) Engtin nge kohhranah thlarau lam thil ngaihsaktu ṭhiante chu i hmuh theih? Pathian duhzâwng miziate leh nungchangte i neih chhoh hian, Pathian tilâwmtu mi dangte chuan an rawn hnaih ang che. Chutih rualin, ṭhian tharte siam tûrin hma lâkna ṭhenkhat i neih a ngai mai thei a ni. (“ Ṭhian Ṭha Siam Dân,” tih phêk 30-naa bâwm chu en rawh.) I mize neih duh ang neite chu zawng rawh. Bible-in rilru “inhawng” lehzual tûra min fuihna chu zâwm la, ram mi nihna hrang hrang leh hnam ze hrang hrang nei Kristian unaute zîngah ṭhian ṭha zawng ang che. (2 Korinth 6:13; 1 Petera 2:17 chhiar rawh.) I kum rualpuite chauh ṭhianah thlang suh. Jonathana chu Davida aiin a upa hle tih hre reng ang che. Kum upa tawh tam takte chuan an thiltawn leh finna an neihte avângin inṭhianna an tiphuisui thei a ni.

16, 17. Kristian unau pakhatin kawng engemaw taka kan rilru a tihnat pawhin engvângin nge kohhran aṭanga kan inlâk hran loh vang?

¹⁶ Kohhran chhûngah hian mizia leh seilenna chi hrang hrang neite awm khâwm kan nih avângin, buaina chhuah châng a awm thei a. Kristian unau pakhat chuan kan rilru tina thei thil a sawi emaw, a ti emaw pawh a ni thei. (Thufingte 12:18) A châng chuan, harsatnate chu mize inmil lohna te, inhriat sualna te, a nih loh leh ngaih dân inan lohnate avânga lo chhuak a ni a. Chûng harsatnate avânga tluin, kohhran aṭangin kan inla hrang ang em? Jehova leh a hmangaihte chunga hmangaihna dik tak kan neih chuan kan inla hrang lo vang.

¹⁷ Jehova chu min Siamtu leh Nunna Châwmtu a nih avângin, kan hmangaihna leh inpêkna pumhlûm a phû a. (Thu Puan 4:10, 11) Chu bâkah, Pathian hman kohhran  chuan rinawm taka kan thlâwp a phû bawk. (Hebrai 13:17) Chuvângin, kan Kristian unau pakhatin kawng engemaw taka kan rilru a tina emaw, min tilunghnual emaw a nih chuan lungawi lohna lantîr nân kohhran aṭangin kan inla hrang lo vang. Engah nge kan inlâk hran theih tehrêng ang? Min tilungni lotu chu Jehova a ni si lo. Jehova kan hmangaihna chuan amah leh a mite kalsan chu a remti thei ngai lo vang!—Sâm 119:165 chhiar rawh.

18. (a) Kohhrana remna awmtîr tûrin eng nge kan tih theih? (b) Ngaihdam chhan tûr ṭha tak a awm huna ngaihdamna chuan eng malsâwmnate nge a thlen?

¹⁸ Unaute kan hmangaihna chuan kohhrana remna siam tûrin min chêttîr ṭhîn. Jehova chuan a hmangaihte lakah ṭhat famkimna a beisei lo va, keini pawhin kan beisei tûr a ni lo. Hmangaihna chuan sual tê thamte haider tûr leh ṭha famkim lo leh thil tisual thei kan ni tih hre reng tûrin min ṭanpui thei a ni. (Thufingte 17:9; 1 Petera 4:8) Hmangaihnain “inngaidam tawn” zêl tûrin min ṭanpui a. (Kolossa 3:13) He fuihna nunpui hi a awlsam reng lo. Lungnih lohnain min thunun chuan engtin emaw taka min tilungni lotu hremna anga ngaiin, thinurna pai reng chu kan duh thei a. Mahse, a nihna takah chuan thinurna pai reng chu kan chhiatpui thei a ni. Ngaihdam chhan tûr ṭha tak a awm huna kan ngaihdamna chuan malsâwmna nasa tak a thlen a. (Luka 17:3, 4) Rilru leh thinlunga thlamuanna min pe a, kohhrana remna a vawn ṭhat bâkah, a pawimawh ber, Jehova nêna kan inlaichînna a vênghim bawk a ni.—Matthaia 6:14, 15; Rom 14:19.

19. Eng hunah nge kohhrana tuemaw chu kan kawm loh vang?

¹⁹ A châng chuan, kohhrana mi tuemaw chu kâwm tawh lo tûra tih kan ni a. Chutiang dinhmun chu tuemawin inlamlêt lova Pathian dân a bawhchhiat avânga hnawh chhuah a nih hunah emaw, thurin dik lo a zirtîrna  hmanga rinna a hnâwl hunah emaw, a nih loh leh ama thua kohhran a chhuahsan hunah emaw a thleng ṭhîn a ni. Pathian Thu chuan chutiang mite chu “pâwl lo tûrin” chiang takin min hrilh a. * (1 Korinth 5:11-13 chhiar rawh; 2 Johana 9-11) Kan ṭhian emaw, kan chhûngkhat emaw kawm loh chu thil harsa tak a ni thei ang. Pathian Jehova leh a dân felte chunga rinawmna târ langin, kan ding nghet tlat ang em? Ani chuan rinawmna leh thu âwihna a ngaihlu hle tih hre reng ang che.

20, 21. (a) Engvângin nge hnawh chhuahna chu ruahmanna duhawm a nih? (b) Engvângin nge fing thiam taka ṭhian kawm tûr kan thlan chu a pawimawh?

²⁰ Hnawh chhuahna hi Jehova ruahmanna duhawm tak a ni a. Engtin nge? Inlamlêt duh lo hnawh chhuahna chu Jehova hming thianghlim leh a tehnate bâkah, Amah Jehova ngei kan hmangaihzia lantîrna a ni. (1 Petera 1:15, 16) Hnawh chhuahna chuan kohhran a vênghim a. Kohhrana mi rinawmte chu duh rêng vânga thil sual titute thununna ṭha lo lakah vênghimin, anni chuan kohhran chu he khawvêl suaksualah hmun him tak a ni tih hriatna nên Pathian chibai an bûk zawm zêl thei a ni. (1 Korinth 5:7; Hebrai 12:15, 16) Hnawh chhuahna chuan thil sual titu chungah hmangaihna a târ lang a. Chu chu a rilru put hmangte thlâk a, Jehova hnêna kîr leh tûrin hma lâk a ngai tih inhriat chhuahna nei tûra a thil mamawh tak a ni thei a ni.—Hebrai 12:11.

²¹ Kan ṭhian ṭhate’n nasa taka min thunun theihna chu kan pumpelh ngawt thei lo. A nih chuan, kan ṭhian kawm tûrte fing thiam taka thlan chu a pawimawh hle. Jehova ṭhiante ṭhiana siam a, Pathianin a hmangaihte kan hmangaih chuan, ṭhian ṭha berte hual vêlin kan awm ang. An hnên aṭanga kan neih miziate chuan Jehova tihlâwm kan tumna mila nung tûrin min ṭanpui ang.