1-3. (a) Engtin nge mi tam takte’n an hnathawh chu an ngaih? (b) Bible-in hnathawh chungchângah eng thlîr dân nei tûrin nge min fuih a, he bung 15-ah hian eng nge kan sawiho vang?

TUN lai khawvêla mi tam takte tân hnathawh hi thil hlimawm a ni lo. An hna ngainat vak lohte ni lêng lênga an thawh avângin, hnathawk tûra kal chhuah an hreh a ni. Chutiang rilru put hmang neite chuan an hnaa lungawina neih chu sawi loh, engtin nge an hnaah tuina kan neihtîr theih ang?

² Bible chuan thawhrimna chungchânga thlîr dân dik nei tûrin min fuih a. Hnathawh leh a thawh rahte chu thilpêk niin a sawi a. Solomona chuan: “Mi tin ei leh in leh an thawhrimna zawng zawnga hlim taka an awm chu Pathian thilpêk a ni,” tiin a ziak a ni. (Thuhriltu 3:13) Min hmangaih a, kan tâna ṭha ber tûr min duhsaktu Jehova chuan kan hnathawha lungawina hmu tûr leh kan thawhrimna rahte têla hlimna hmu tûrin min duh a. A hmangaihnaa invawng ṭha tûr chuan, hnathawh chungchâng a thlîr dân leh a thu bulte mila kan nun a ngai a ni.—Thuhriltu 2:24; 5:18 chhiar rawh.

³ He bung 15-naah hian, zawhna pali kan sawiho vang: Engtin nge kan thawhrimnaah hlimna kan hmuh theih ang? Eng ang hnate nge Kristian dikte chuan an thawh loh vang? Engtin nge kan hnathawh chu kan thlarau lam thiltihte nên kan inbûk tâwktîr theih ang? Kan thawh theih  hna pawimawh ber chu eng nge ni? tihte chu. Mahse, a hmasain, lei leh vâna hnathawktu ropui ber pahnih—Pathian Jehova leh Isua Krista entawn tûr siam chu i lo bih chiang ang u.

4, 5. Engtin nge Bible-in Jehova chuan hna a thawk ṭha tih a târ lan?

⁴ Jehova chu Hnathawktu Ropui Ber a ni a. Genesis 1:1 chuan: “Atîrin Pathianin lei leh vân a siam,” tiin a sawi. Pathianin leilung leh a chhûnga awmte a siam zawh khân, a thil siamte chu “ṭha a ti êm êm a.” (Genesis 1:31) Thu danga sawi chuan, a lei lam hnathawh zawng zawngah a lungawi hle a ni. “Pathian hlim” Jehova chu hna a thawh ṭhat avângin a hlim hle ngei ang.—1 Timothea 1:11, NW.

⁵ Kan Pathian taima tak chuan hna a thawk reng a. Lei lam thilte a siam zawh hnu hun rei takah, Isua chuan: “Ka Pain tûn thleng pawhin hna a thawk reng a ni,” tiin a sawi. (Johana 5:17) Pathianin eng hna nge a thawh reng? A awmna vân aṭangin mihringte chu kawngte kawhhmuhin, a ngaihsak zawm reng a. A tâwpa Isua nêna vâna rorêltu tûr “thil siam thar,” thlarauva hriak thih Kristiante chu a din a ni. (2 Korinth 5:17) Mihringte tâna a thiltum—amah hmangaihtute’n khawvêl thara chatuana nunna an neih theihna tûr—hlen chhuak tûrin hna a thawk zawm zêl a. (Rom 6:23) Jehova chu he a hnathawh rah chhuah avângin a lâwm hle ngei ang. Mi maktaduai tam tak chuan Lalram thuchah chu an chhâng lêt a, Pathian hîpa awmin, a hmangaihnaa awm reng tûrin an nunte an siamrem si a.—Johana 6:44.

6, 7. Isua chuan hun rei tak chhûng rim taka hna thawkin eng hming nge a chher?

⁶ Isua chuan kum rei tak chhûng taima taka hnathawktu niin, hming ṭha a chher a. Mihring anga a lo kal hma khân, ‘vâna awmte leh leia awm’ zawng zawngte siamnaah Pathian “mi themthiam angin” hna a thawk a ni. (Kolossa  1:15-17; Thufingte 8:22-31) Leia a awm lai pawh khân, mi taima tak a ni zêl a. A naupan lai aṭang tawhin kut themthiamna a zir a, “thingrem siamtu” tia hriat a lo ni ta a ni. * (Marka 6:3) Chu hna thawk tûr chuan nasa taka thawh rim leh thiamna hrang hrang neih a ngai a—a bîk takin thingzaina khâwl te, hnathawh nâna mamawh thilte, leh electric hmang bungruate awm hma a nih avângin a ngai lehzual a ni. Isua chu thingte kit a, zai phel a, a hnathawhna hmun lama pu tûr angin i mitthla thei em? Khanchhuk tûr rel a, kawngkâ a siam lai te, leh in chhûng bungrua a siam laite chu i mitthla thei em? Isua chuan thawhrim ngai hna thiam taka thawh zawhna aṭanga lo awm lungawina chu a nei ngei a ni.

⁷ Isua chu rawngbâwlnaah a taima fâl bîk hle a. Kum thum leh a chanve chhûng chu hna azawnga pawimawh berah a inhmangzo ṭhak a ni. Mi a tam thei ang berte hnêna chanchin ṭha thlen a duh avângin, zîng hma taka thovin, tlai thim thlengin rawng a bâwl a, hun a khawhral mai mai lo. (Luka 21:37, 38; Johana 3:2) “Thu hril leh Pathian ram chanchin ṭha thlen chungin khaw lian leh khaw tê te a fang zêl a.” (Luka 8:1) Mite hnêna chanchin ṭha thlen tûrin kawng vaivut chhah takah kêin mêl za tam tak a zin a ni.

8, 9. Engtin nge Isua chuan a thawhrimna aṭangin hlimna a hmuh?

⁸ Isua chuan rawngbâwlnaa a thawhrimnaah hlimna a hmu em? Hmu e! Lalram thutak chi chu thehin, buh seng tûr a hnutchhiah a ni. Pathian rawngbâwlna chuan Isua chu chakna a pêk avângin, a thawh zawh nân chaw nghei pawh a inhuam a. (Johana 4:31-38) A lei lam rawngbâwlna tâwp hunah a Pa hnêna: “Nangin thil tih tûr mi pêk kha ka ti zo va, khawvêlah ka chawimawi tawh a che,” tia a sawi  theih avânga lungawina a neih dân tûr chu han ngaihtuah teh.—Johana 17:4.

⁹ Jehova leh Isua chu thawhrimna aṭanga hlimna hmutu entawn tûr ṭha ber an ni tih a chiang hle. Pathian Jehova kan hmangaihna chuan “Pathian awm dân latute” ni tûrin min chêttîr a. (Ephesi 5:1) Isua kan hmangaihna chuan ‘a hniaka zui tûrin’ min tur bawk. (1 Petera 2:21) Chuvângin, keini pawhin kan thawhrimna aṭanga hlimna kan hmuh theih dân i lo bih chiang ang u.

10, 11. Kan hnathawh chungchânga rilru put hmang dik nei tûrin engin nge min ṭanpui thei?

¹⁰ Kristian dikte chuan eizawn nân hna an thawh a ngai a. Kan hnathawhah lungawina leh hlimna hmu duh mah ila, kan tui loh zâwng hna thawhna chuan hmuh a tiharsa hle thei a ni. Chutiang dinhmunah chuan engtin nge kan thawhrimnaah hlimna kan hmuh theih ang?

¹¹ Rilru put hmang dik neiin. Kan dinhmun chu thlâk danglam ziah thei lo mah ila, kan rilru put hmang erawh kan thlâk thei a ni. Pathian thil thlîr dân chhût ngunna chuan hnathawh chungchânga rilru put hmang dik nei tûrin min ṭanpui thei a. Entîr nân, chhûngkaw lû i nih chuan, i hnathawh chu hna hniam tak angin lang mah se, i chhûngkaw mamawh a phuhhrûk theih dân chu ngaihtuah rawh. I chhûngte mamawh phuhrûk chu Pathian mithmuhah thil tênau a ni lo. A Thu chuan a chhûngkaw enkawl lotute chu “ring lo mi aiin an sual zâwk” tiin a sawi a ni. (1 Timothea 5:8) I hnathawhin Pathian pêk i mawhphurhna a hlentîr thei che tih hriatna chuan i thawhpuite neih ve loh lungawina leh thiltum a neihtîr thei che a ni.

12. Eng kawngin nge kan hnathawha taihmâk leh rinawm chu a manhla?

¹² Taima tak leh rinawm tak niin. Hna thawhrimna leh thiam taka thawh dân zirna chuan malsâwmna min thlen  thei a. Hnathawktu taima leh themthiam takte chuan an hnathawhna pute ngaihhlut an hlawh thîn. (Thufingte 12:24; 22:29) Kristian dikte kan nih angin, kan hnathawhna pute sum te, thil te, hunte chu rûksak lovin, kan hnaah kan rinawm tûr a ni. (Ephesi 4:28) Bung 14-a kan hmuh tawh angin, rinawm chu a manhla hle. Hnathawktu rinawm nia hming chhertu chuan mite rin a hlawh ṭhîn a. Kan hnatawhna pute chuan thawhrimnaa kan entawn tûr siam chu an hmu emaw, hmu lo emaw pawh ni se, “chhia leh ṭha hriatna thiang tak” neihna leh kan hmangaih tak Pathian kan tilâwm tih hriatna aṭanga lo awm lungawina chu kan nei thei a ni.—Hebrai 13:18; Kolossa 3:22-24.

13. Hnathawhna hmuna kan entawn tûr ṭhain eng nge a thlen theih?

 ¹³ Kan miziain Pathian a chawimawi thei tih hriain. Kan hnathawhnaah Kristian mize tehna sâng tak kan vawn tlat chuan, chu chu mi dangte’n an hmu ngei dâwn a. Eng nge a rah chhuah ang? ‘Pathian min Chhandamtu zirtîrna thu cheimawina’ a rah chhuak ang. (Tita 2:9, 10) Ni e, kan nungchang ṭha chuan mi dangte chu kan Pathian biak dân a ṭhatzia hmuhtîrin, an tân a duhawm lehzual thei a ni. I hnathawhna hmuna entawn tûr ṭha i siam avângin i thawhpuiin Bible thutak a chhân lêt huna i hlim dân tûr chu han ngaihtuah teh! A pawimawh berah, hei hi ngaihtuah ang che: I nungchang mawiin Jehova a chawimawiin, a thinlung a tilâwm tih hriatna aia lâwmawm zâwk a awm thei dâwn em ni? tih hi.—Thufingte 27:11; 1 Petera 2:12 chhiar rawh.

14-16. Hnathawh chungchânga thu tlûkna kan siam a ṭûl hunah, eng zawhna pawimawh takte nge kan ngaihtuah ngai?

¹⁴ Bible chuan eizawnna hna chungchângah pawm theih leh theih loh tûr chu ziak chhuakin min pe lo va. Chu chu eng ang hna pawh ni se, kan pawm vek thei tihna erawh a ni lo. Bible chuan Pathian tilâwmtu hna ṭha leh dik thlang a, amah tilâwm lotu hnate pumpelh tûrin min ṭanpui thei a. (Thufingte 2:6) Hnathawh tûr thlang tûra thu tlûkna kan siam a ṭûl hunah, zawhna pawimawh tak pahnih kan ngaihtuah a ngai a ni.

¹⁵ He hna hi thawk ta ila, Bible-in a dem thilte ka ti tihna a ni ang em? Pathian Thu chuan rûkrûk te, dâwtsawi te, leh milem siamte chu a dem a. (Exodus 20:4; Tirhkohte 15:29; Ephesi 4:28; Thu Puan 21:8) Chutiang thiltihte telna hna engpawh chu kan hnâwl ngei ang a. Jehova kan hmangaihna avângin a thupêk bawhchhiatna thiltihte telna hna chu kan thawk ngai lo vang.—1 Johana 5:3 chhiar rawh.

 ¹⁶ He hnathawhna hian thilsual tihna pawmpuitu emaw, chawi lârtu emaw min nihtîr ang em? Entîrna pakhat lo ngaihtuah ta ila. Insak hna thawka inhlawh chu thil sual a ni lo va. Mahse, Kristian chu biak in sa tûra tih ni ta se, engtin nge ni ang? A hnathawh chuan sakhaw dik lo thiltih nên tlang taka inzawmna a nei lo tih chu a dik a. Mahse, biak in saknaa a telna chuan kawng engemaw takin sakhaw dik lo a thlâwp tihna a ni dâwn lâwm ni? (Thu Puan 18:4)  Jehova hmangaihtute kan nih angin, Bible nêna inmil lo thiltiha inhnamhnawih chu kan duh lo.

17. (a) Hnathawh tûr thlanga thu tlûkna kan siam hunah eng thilte nge ngun taka kan ngaihtuah ang? ( Phêk 177-naa bâwm chu en rawh.) (b) Engtin nge kan chhia leh ṭha hriatna chuan Pathian tilâwmtu thu tlûknate siam tûra min ṭanpui theih?

¹⁷ Hnathawh chungchânga buaina tam tak chu paragraph 15 leh 16-naa târ lan zawhna pawimawh tak pahnihte bih chianna hmangin chinfel theih a ni a. Chu bâkah, hnathawh tûr thlanga thu tlûkna kan siam hunah ngun taka kan ngaihtuah ngai thil ṭhenkhat a la awm bawk. * Bâwih rinawm, fing tak chu dinhmun engkim atâna kaihhruaina siam tûrin kan beisei thei lo va. Chu tak chu a ni, keimahni lama hriat thiam theihna neih a ngaihna chu.  Bung 2-naa kan hriat tawh angin, kan nî tin nuna Pathian Thu nunpui dân zirna hmangin kan chhia leh ṭha hriatna chu kan zirtîrin, kan sawizawi tûr a ni. Kan ‘hriat thiam theihna’ chu ‘engtik lai pawha hmanga’ kan sawizawi chuan, kan chhia leh ṭha hriatna chuan Pathian tilâwmtu thu tlûkna siam tûr leh a hmangaihnaa awm reng tûrin min ṭanpui thei a ni.—Hebrai 5:14.

18. Engvângin nge thlarau lama inbûk tâwk reng chu a awlsam loh?

¹⁸ Hêng ‘ni hnuhnûng hun khirh takahte’ hian thlarau lama inbûk tâwk renga awm chu a awlsam lo hle a. (2 Timothea 3:1) Hnathawh tûr zawn hmuh leh thawh zawm zêl chu thil harsa tak a ni thei. Kristian dikte kan nih angin, kan chhûngkuate mamawh phuhru tûra kan thawhrim a pawimawh tih kan hria a. Mahse, kan fîmkhur loh chuan kan hnathawhna hmuna nêksâwrna emaw, khawvêl ngaihtuahna kaichhâwn awl tak hausak âtchilhna emaw chuan thlarau lam thilte kan ûmna chu a tibuai thei a ni. (1 Timothea 6:9, 10) “Thil pawimawh zualte” ngaihsak a, kan inbûk tâwk theih dân i lo ngaihtuah ang u.—Philippi 1:10, NW.

19. Engvângin nge Jehova chuan kan rinchhan pumhlûm a phû a, chutiang rinna chuan eng nge pumpelh tûra min ṭanpui?

¹⁹ Jehova rinchhan pumhlûm rawh. (Thufingte 3:5, 6 chhiar rawh.) Jehova chuan chutianga rinchhan chu a phû a ni lâwm ni? Min ngaihsaktu a ni si a. (1 Petera 5:7) Kan mamawhte chu keimahni ai pawhin a hria a, a kut chu tihtawiin a awm ngai lo. (Sâm 37:25) Chuvângin, a Thuin: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah [Pathian] ngeiin, ‘Engtikah mah ka thlahthlam tawp lo vang chia; kal pawh ka kalsan tawp lo vang che,’ a ti si a,” tia a sawi chu kan ngaithla tûr a ni. (Hebrai 13:5)  Hunbi kima rawngbâwltu tam tak chuan nunna atâna an mamawhte chu Pathianin a pêk theihzia mahni ngeiin an tawng a. Jehova’n min enkawl dâwn tih kan rinchhan pumhlûm chuan, kan chhûngkaw mamawh phuhrûk chu a lutukin kan lungkham lo vang. (Matthaia 6:25-32) Kan eizawnna hnathawh avângin chanchin ṭha hrilh leh inkhâwm  ang chi thlarau lam thiltihte chu kan ngaihthah ngai lo vang.—Matthaia 24:14; Hebrai 10:24, 25.

20. Mit tifîm tih awmzia chu eng nge ni a, chutiang thlîr dân chu engtin nge kan neih reng theih ang?

²⁰ I mit tifîm rawh. (Matthaia 6:22, 23 chhiar rawh.) Mit tifîm tih awmzia chu kan nun kan tisamkhai tihna a ni a. Kristian mitfîm nei chuan thiltum pakhat—Pathian duhzâwng tihna chauh chu a ngaihsak a ni. Chutianga kan ngaihsak tlat chuan, hlawh sâng tak hmuh theihna hna kan ûm lo vang a, changkâng taka nun chu kan tum lo vang. Thil fak mawitute’n hlimna neih nâna loh theih lova neih ngai anga an târ lan thil thar ber berte emaw, thil ṭha ber berte emaw chu neih zêl kan tum lo bawk ang. Engtin nge i mit i tihfîm reng theih ang? Ṭûl lo taka leiba neih chu pumpelh rawh. Hun pêk ngai leh nasa taka enkawl ngai thil tam tak khâwl khâwm suh. ‘Ei tûr leh silh tûr neia’ lungawi tûra Bible zilhna chu zâwm rawh. (1 Timothea 6:8) A theih ang tâwkin i nun tisamkhai ang che.

21. Engvângin nge dah pawimawh hmasak tûr kan insiam ang a, kan nunah eng nge kan dah hmasak ber ang?

²¹ Thlarau lam thilte dah pawimawh tûrte insiam la, tlin tum tlat rawh. Kan nî tin nunah hun leh tha leh zung kan neih tam tâwk loh avângin, dah pawimawh hmasak tûrte kan insiam a ngai a. A nih loh chuan, thil pawimawh lote chuan kan hun hlu tak chu la zovin, thil pawimawh zâwkte tih nân hun kan nei lo thei a ni. Kan nuna kan dah pawimawh ber tûr chu eng nge ni? Khawvêla mi tam tak chuan hlawh tam tak neih theih nân zirna sâng ûm chu an dah pawimawh ber a. Mahse, Isua chuan a hnungzuitute chu Pathian “Ram . . . zawng hmasa” tûrin a fuih a ni. (Matthaia 6:33) Ni e, Kristian dik kan nih angin kan nunah Pathian Ram kan dah hmasa a. Kan nun dân—kan duh thlanna te, thiltum kan insiam te, leh kan thiltihte—chuan sum leh pai, leh khawvêl thilte aiin Lalram leh Pathian duhzâwng kan ngai pawimawh zâwk tih a târ lang tûr a ni.

22, 23. (a) Kristian dikte hna ber chu eng nge ni a, chu hna chu kan tân a pawimawh tih engtin nge kan târ lan theih? ( Phêk 180-naa bâwm chu en rawh.) (b) Eizawnna hna chungchângah eng nge tih i tum tlat?

²² Tâwpna kan hnaih hle tawh tih hriain, Kristian dikte hnathawh ber—thu hrilh leh zirtîr siamna—chu kan ngaihsak tlat a. (Matthaia 24:14; 28:19, 20) Kan entawn tûr Isua angin, nun chhanhimna hnaa buai reng chu kan duh a ni. He hna hi kan ngai pawimawh tih engtin nge kan târ lan theih ang? Pathian mi a tam zâwkte chu kohhrana thuchhuahtute niin thu hrilh rawngbâwlnaah tih tak zetin an inhmang a. Ṭhenkhatte chu pioneer emaw, missionary emaw nia rawngbâwl tûrin an insiamrem a ni. Nu leh pa tam tak chuan thlarau lam thiltum neih a pawimawhzia hriain, an fate chu hunbi kima rawngbâwl tûrin an fuih bawk. Lalram chanchin ṭhahnemngai taka puang chhuaktute chuan rawngbâwlnaa an thawhrimnaah hlimna an hmu em? Tehrêng mai! Thinlung zawng zawnga Jehova rawng kan bâwl chuan hlimna te, lungawina te, leh malsâwmna chhiar sên lohte kan dawng ngei ang.—Thufingte 10:22 chhiar rawh.

²³ Kan zînga tam tak hian kan chhûngte tisa lam mamawh phuhrûk nân dârkâr rei tak tak hna kan thawh a ngai a. Jehova chuan kan thawhrimna zawng zawnga hlimna hmu tûrin min duh tih hre reng ang che. Kan rilru put hmang leh thiltihte chu Jehova thlîr dân leh thu bulte mil tûra kan siamrem chuan, kan hnathawhah lungawina kan nei thei ang. Mahse, kan eizawnna hna chuan kan hna pawimawh ber—Pathian Ram chanchin ṭha puan chhuahna—a tihbuai chu i phal ngai lo vang u. Kan nunah he hna hi dah pawimawh berin, Jehova kan hmangaihzia kan lantîr a, chutiang chuan a hmangaihnaah kan invawng reng a ni.