Min Siamtu chu kan aiin a fing zâwk a. Hmangaihna nei tak Pa a nih angin, min ngaihsak a ni. Chu bâkah, a hnên ata inla hrang tûrin min siam lo bawk. (Jeremia 10:23) Chuvângin, naupangin a nu leh pa kaihhruaina a mamawh ang bawkin, Pathian kaihhruaina kan mamawh ṭheuh a ni. (Isaia 48:​17, 18) Bible thu bulte chuan Pathian thilthlâwnpêk kaihhruaina chu min pe a ni.—2 Timothea 3:16 chhiar rawh.

Jehova dânte leh thu bulte chuan tûna nun kawng ṭha ber min zirtîr bâkah, nakina chatuan daih malsâwmna dawn theih dân pawh min kawhhmuh a. Pathian siam kan nih avângin, a kaihhruaina lâwm taka pawm chu kan tih tûr dik awmchhun a ni.—Sâm 19:​7, 11; Thu Puan 4:​10, 11 chhiar rawh.

Bible thu bul kan tih chu Bible thutak bulpuite a ni a. Kawng leh lamah chuan dânte chu dinhmun engemaw bîk tâna zam a ni thei. (Deuteronomy 22:⁠8) Thu bul pakhat chu dinhmun engemaw tak atâna hmang thei tûrin remhriatna kan hmang tûr a ni. (Thufingte 2:​10-12) Entîr nân, Bible chuan nunna hi Pathian thilthlâwnpêk a ni tih min zirtîr a. Chu thutak bulpui kan hriat reng chuan kan hnathawhnaah te, kan inah te, leh kan zin vêl hunah te hian keimahni leh mi dangte nun chu dinhmun hlauhawmah kan dah lo vang.—Tirhkohte 17:28 chhiar rawh.

Isua chuan thu bul pawimawh tak pahnih chungchâng a sawi a. A hmasa zâwk chuan mihring nunin a  tum ber​—⁠Pathian hriat te, amah hmangaih te, leh rinawm taka a rawng bâwl te​—⁠chu a târ lang a ni. He thu bul hmasa zâwk hi kan thu tlûkna siam zawng zawngah kan ngaihtuah tel tûr a ni a. (Thufingte 3:⁠6) He thu bul ngaihsaktute hian Pathian nêna inṭhianna te, hlimna dik tak te, leh chatuana nunna te an nei ang.—Matthaia 22:​36-38 chhiar rawh.

Thu bul pahnihna chuan mi dangte nên inlaichînna muanawm tak min neihtîr thei a. (1 Korinth 13:​4-7) Chu mi nunpuinaah chuan Pathianin mite a cheibâwl dân entawn a tel a ni.—Matthaia 7:12; 22:​39, 40 chhiar rawh.

Bible thu bulte chuan chhûngkuate chu hmangaihnaa inpumkhat tûrin a zirtîr a. (Kolossa 3:​12-14) Pathian Thu chuan chhûngkuate chu kaihruaitu thu bul dang​—⁠inneihna chu a nghet tûr a ni tih​—⁠zirtîrin a vênghim bawk.—Genesis 2:24 chhiar rawh.

Bible thu bulte nunpuina hmangin, kan tisa lam leh rilru lam ṭhatna tûr chu kan vênghim thei a. Entîr nân, hnathawk ruaitute chuan rinawmna leh taihmâkna chungchâng Bible thu bulte nunpuitu hnathawktute chu an thlang zâwk fo ṭhîn a ni. (Thufingte 10:​4, 26; Hebrai 13:18) Pathian Thu chuan thil ṭûlte neia lungawi tûr leh tisa lam thil aia Pathian nêna kan inṭhianna hlut zâwk tûrin min zirtîr bawk.—Matthaia 6:​24, 25, 33; 1 Timothea 6:​8-10 chhiar rawh.

Bible thu bulte nunpuina chuan kan hrisêlna a vênghim thei a. (Thufingte 14:30; 22:​24, 25) Entîr nân, zu ruih khap chungchânga Pathian dân zawmna chuan natna hlauhawm takte leh chêtsualna lakah min vêng a ni. (Thufingte 23:20) Jehova chuan zu in chu a phal a; mahse, a tâwk tê chauhva in a phal a ni. (Sâm 104:15; 1 Korinth 6:10) Pathian thu bulte chuan kan thiltih mai ni lovin, kan ngaihtuahna thlenga thunun tûra min zirtîr avângin kan hlâwkpui a ni. (Sâm 119:​97-100) Mahse, Kristian dikte’n Pathian tehnate an zawm chhan chu an hlâwkpui vâng mai a ni lo. Pathian Jehova chawimawi nân an zâwm zâwk a ni.—Matthaia 5:​14-16 chhiar rawh.