Setana’n dâwt hmasa ber a sawi khân leiah sual a lo awm ṭan a. Ani chu atîrah chuan vântirhkoh ṭha famkim a ni a; mahse, “thutakah a awm [“nghet,” New World Translation] lo.” (Johana 8:44) Ani chuan Pathian chauh dawn tûr biakna chu a ît ṭan a. Evi chu dâwt hrilhin, Pathian thu aia ama thu âwih tûrin a hmin a ni. Adama pawhin Evi Pathian thu âwih lohna chu a zâwm a. A thu tlûkna siam chuan hrehawm tawrhna leh thihna a thlen ta a ni.—Genesis 3:​1-6, 19 chhiar rawh.

Setana’n Pathian thu âwih lo tûra Evi a thlêm khân, Pathian lalchungnunna, a nih loh leh Chungnungber a nihna laka helna chu a ṭan a. Mi tam zâwkte chuan Pathian rorêlna hnâwlin, Setana lamah an ṭang a. Chutiang chuan, Setana chu “khawvêl lal” a lo ni ta a ni.—Johana 14:30; 1 Johana 5:19 chhiar rawh.

Pathian kut chhuakte chu an ṭha famkim vek a. A thil siam mihringte leh vântirhkohte chuan A thu an zâwm famkim thei vek a ni. (Deuteronomy 32:​4, 5) Pathian chuan thil ṭha emaw, thil sual emaw ti thei tûra zalênna neiin min siam a. Chu chuan Pathian kan hmangaihzia târ lan theihna hun remchâng min pe a ni.—Jakoba 1:​13-15; 1 Johana 5:3 chhiar rawh.

Hun engemaw chhûng chu, Jehova’n a lal chungnunna do zâwnga helna awm a phal a. Engvângin nge? A tel lova ro inrêl tumnain ṭhatna a thlen lohzia târ lan nân a ni. (Thuhriltu 7:29; 8:⁠9) Kum 6,000 chhûng mihringte  mahnia ro an inrêl hnu chuan a finfiahna chu a chiang ta hle. Khawvêl rorêltute chuan indona te, dân bawhchhiatna te, hleih neihna te, leh natna te an tireh thei lo, tih hi.—Jeremia 10:23; Rom 9:17 chhiar rawh.

Mihringte rorêlna nêna inkalh takin, Pathian rorêlna chu a pawmtute chuan nasa takin an hlâwkpui a. (Isaia 48:​17, 18) Nakin lawkah, Jehova chuan mihring siam sawrkârna zawng zawng chu a titâwp vek ang. Pathian rorêlna hnuaia awm thlangtute chauhvin lei hi an luah ang.​—⁠Isaia 11:⁠9; Daniela 2:44 chhiar rawh.

Engvângin Nge Pathianin Hrehawm Tawrhna Awm A Phal? tih video en rawh

Setana chuan mihringte’n Pathian rawng an bâwl chhan chu mahni hma an sial vâng a ni a ti tlat a. Chu chu dâwt a nihzia i hai lang duh ang em? I hai lang thei a ni! Pathian dawhtheihna chuan A rorêlna nge kan duh a, mihringte rorêlna zâwk tih târ lan theihna hun ṭha tak min pe ṭheuh va. Kan nun dân hmangin kan duhthlanna chu kan târ lang a ni.—Joba 1:​8-12; Thufingte 27:11 chhiar rawh.

Pathian Thu, Bible ṭanchhan biakna dik zawng chhuak a, chu biakna vuan rengin, Rorêltu atân Pathian kan thlang thei a. (Johana 4:23) Isua anga politics leh indonaa tel lovin, Setana rorêlna kan hnâwl thei a ni.—Johana 17:14 chhiar rawh.

Setana chuan a thiltihtheihna chu nungchang bawlhhlawh leh thil chîn hlauhawmte theh lâr nân a hmang a. Chûng thil chînte kan hnâwl hian kan ṭhiante leh chhûngkhatte’n min nuihzatin, min dodâl pawh a ni thei. (1 Petera 4:​3, 4) Chuvângin, duhthlanna kan siam a ngai a. Pathian hmangaihtute kan kâwm ang em? A dân fing tak leh duhawm takte hi kan zâwm ang em? Chutianga tiin, nêksâwrna hnuaiah Pathian thu tuma’n an zâwm lo vang tih Setana thusawi chu dâwt a nihzia kan finfiah a ni.—1 Korinth 6:​9, 10; 15:33 chhiar rawh.

Pathian min hmangaihna chuan sual leh hrehawm tawrhna a tâwp dâwn tih min tiam a. Chu thutiam an âwihzia târ langtute chuan leiah chatuana nunna an chên ang.—Johana 3:16 chhiar rawh.