Chanchin ṭha chu chhûngkuate hlim tûra duhtu “Pathian hlim,” Jehova hnên aṭanga lo chhuak a ni a. (1 Timothea 1:​11, NW) Ani chuan inneihna bul a ṭan a. Chhûngkaw hlim nei tûr chuan dân anga inneih a pawimawh a ni; chu chuan naupang enkawl nân boruak ṭha a awmtîr avângin. Kristiante chuan inneihna hming ziah chungchângah an awmna ram dân an zâwm tûr a ni.—Luka 2:​1, 4, 5 chhiar rawh.

Engtin nge Pathian chuan inneihna chu a thlîr? Ani chuan mipa leh hmeichhia chu inkawp nghet tûrin a duh a. Jehova chuan nupate chu rinawm tawn tûrin a duh a. (Hebrai 13:⁠4) Inmâk emaw, inṭhen emaw chu a hua a ni. (Malakia 2:16) Mahse, an kawppuite an uirê chuan Kristiante tân inṭhen leh nupui pasal dang neih a phal a ni.—Matthaia 19:​3-6, 9 chhiar rawh.

Jehova chuan mipa leh hmeichhiate chu inneihnaa inṭanpui tawn tûrin a siam a. (Genesis 2:18) Pasal chuan chhûngkaw lû a nih angin, tisa lama chhûngkaw mamawh phuhrûknaah leh Pathian chanchin zirtîrnaah hma a hrui tûr a ni. Mahni hmasial lo takin a nupui a hmangaih tûr a ni a. Nupate chu an inhmangaihin, an inzah tawn tûr a ni. Mihring ṭha famkim lo vek an nih avângin, in ngaihdam dân zir chu inneihnaa hlimna hmuh nân a pawimawh hle.—Ephesi 4:​31, 32; 5:​22-25, 33; 1 Petera 3:7 chhiar rawh.

Inneihnaa harsatna in tawh chuan, hmangaihna nêna incheibâwl chu in tum ve ve tûr a ni. (1 Korinth 13:​4, 5) Inneihnaa buaina chhuak ṭhînte chinfel nâna awm hran chu Pathian Thu chuan a remti lo.—1 Korinth 7:​10-13 chhiar rawh.

Jehova chuan hlim taka in awm chu a duh a. In ṭhat lai hun hlim taka in hman theih nân thurâwn ṭha ber a pe che u a ni. In nu leh pate finna leh thiltawnte chu hlâwkpui tûrin a duh che u bawk. (Kolossa 3:20) Jehova chuan nangmahni Siamtu leh a Fapa tâna thil in tihnaah hlimna hmu tûrin a duh bawk che u a ni.—Thuhriltu 11:9–12:1; Matthaia 19:​13-15; 21:​15, 16 chhiar rawh.

In fate hnêna ei leh in tûr, awmna tûr, leh silhfên tûrte pe tûrin in thawkrim tûr a ni a. (1 Timothea 5:⁠8) Mahse, in fate’n hlimna an hmuh theih nân, Pathian hmangaih tûr leh a hnên aṭanga inzir tûrin in zirtîr tûr a ni. (Ephesi 6:⁠4) Pathian hmangaihna târ lanna kawnga in entawn tûr siam chuan in fate thinlung chu nasa takin a thunun thei a. Pathian Thu in ṭanchhan phawt chuan, in kaihhruaina pêk chuan in fate thinlung chu a ṭha zâwngin a chher thei a ni.—Deuteronomy 6:​4-7; Thufingte 22:6 chhiar rawh.

Naupangte chuan in fuihna leh in fakna chu an hlâwkpui a. Thununna leh zilhhauna pawh an mamawh bawk a ni. Chutiang kaihhruaina chuan an hlimna rubo thei nungchang lakah anni chu a vênghim a. (Thufingte 22:15) Mahse, hrehawm tak leh nunrâwng takin in thunun ngai tûr a ni lo.—Kolossa 3:21 chhiar rawh.

Jehova Thuhretute chuan nu leh pate leh fate tân a bîk taka siam lehkhabute chu an chhuah nual a. Chûng lehkhabute chuan Bible a ṭanchhan a ni.—Sâm 19:​7, 11 chhiar rawh.