ZIRLAI 5
Leilung Atâna Pathian Thiltum Chu Eng Nge Ni?
1. Engvângin nge Pathianin he lei hi a siam?
Jehova chuan lei hi mihring a hmei a pate hnênah a pe a. Chu chu kan chênna in a ni. Chuvângin, nupa tuak hmasa Adama leh Evi chu vân luah khat tûra siam an ni lo—Pathianin vâna awm tûr vântirhkohte a siam daih tawh si a. (Joba 38:4, 7) Chu ai mah chuan, Pathianin mipa hmasa ber chu Eden huan tia koh paradis nuam takah chuan a dah zâwk a. (Genesis 2:15-17) Jehova chuan Adama leh nakina a thlah lo la piang tûrte hnênah leia chatuana nun theih beiseina ṭha tak a pe a ni.—Sâm 37:29; 115:16 chhiar rawh.
Atîrah chuan, Eden huan chauh chu paradis a ni a. Nupa tuak hmasa chuan an thlahte nên lei hi an luah khat tûr a ni a. A tâwpah chuan, leilung pum pui hi an thu thua awmtîrin, paradis-ah an chantîr tûr a ni. (Genesis 1:28) Lei hi engtikah mah tihchhiat a ni ngai lo vang. Mihringte awmna tûr a ni kumkhua zâwk dâwn a ni.—Sâm 104:5 chhiar rawh.
Engvângin Nge Pathianin He Lei Hi A Siam? tih video en rawh
2. Engvângin nge lei hi tûnah paradis a nih loh?
Adama leh Evi chuan Pathian thu an âwih loh avângin, Pathian Jehova chuan huan ata a hnawt chhuak a. Paradis chu hloh a lo ni ta a, mihring tumahin an tung ding leh thei tawh lo. Bible chuan: “Lei hi mi suaksual kutah pêk a ni,” tiin a sawi.—Joba 9:24; Genesis 3:23, 24 chhiar rawh.
Jehova chuan mihringte tâna atîra a thiltum chu a rauhsan em? Rauhsan lo ve! Engkimtithei a ni a, hlawhchham thei a ni lo. (Isaia 45:18) Atîra a thiltum ang ngeiin mihringte chu a tung ding leh dâwn a ni.—Sâm 37:11, 34 chhiar rawh.
3. Engtin nge Paradis chu tun din leh a nih dâwn?
Pathian Lal ruat a nih anga Isua’n ro a rêl hunah Paradis chu tun din leh a ni ang a. Armageddon kan tih indonaah Isua chuan Pathian vântirhkohte hruaiin Pathian dodâltute chu a tiboral vek ang. Tichuan, Isua chuan Setana chu kum 1,000 chhûng a phuar ang a. Pathian mite erawh chu Isua kaihhruai leh vênhim an nih dâwn avângin, chu tihboralna aṭang chuan an dam khawchhuak ang. Anni chuan lei Paradis-ah chatuana nunna an chên ang.—Thu Puan 20:1-3; 21:3, 4 chhiar rawh.
4. Engtikah nge hrehawm tawrhna a tâwp ang?
Engtikah nge Pathianin lei ata sualna a tihbo vang? Isua chuan tâwpna a hnai tih hriat theihna tûrin “chhinchhiahna” min pe a. Tûn lai khawvêl dinhmun hian mihringte chu dam zêl beisei awm lo kawp dinhmun hlauhawmah a awmtîr a, chu chuan “khawvêl tâwpna” huna kan awm tawhzia a târ lang a ni.—Matthaia 24:3, 7-14, 21, 22 chhiar rawh.
Isua’n vân aṭanga lei a awp hun kum 1,000 chhûng chuan hrehawm tawrhna zawng zawng a titâwp ang. (Isaia 9:6, 7; 11:9) Lal anga ro a rêl bâkah, Isua chuan Puithiam Lal anga rawngbâwlin, Pathian hmangaihtute sualna zawng zawng pawh a thai bo vang. Chutiang chuan, Isua hmangin Pathian chuan natna te, tarna te, leh thihna te chu a tibo vek ang.—Isaia 25:8; 33:24 chhiar rawh.
5. Paradis-ah chuan tute nge awm ang?
Kingdom Hall-ah chuan Pathian hmangaihtute leh amah tihlâwm dân zir duhte chu i hmu ang
Pathian thu âwihte chu Paradis-ah an awm ang. (1 Johana 2:17) Isua chuan a hnungzuitute chu thuhnuairawlhte zawng chhuak a, Pathian pawm tlâk nih theih dân zirtîr tûrin a tîr a. Tûn laiah, Pathian Jehova chuan mi maktaduai têlte chu khawvêl thara nung tûrin a buatsaih mêk a ni. (Zephania 2:3) Jehova Thuhretute Kingdom Hall-ah mite chuan nupui pasal ṭha zâwk nih dân leh nu leh pa ṭha zâwk nih dân an zir a. Naupangte chuan an nu leh pate ruala Pathian biain, chanchin ṭha hlâwkpui dân tûr an zir a ni.—Mika 4:1-4 chhiar rawh.
