ZIRLAI 4
Isua Krista Chu Tu Nge Ni?
1. Engtin nge Isua nun chu a inṭan?
Eng miziate’n nge Isua chu pan nuam tak nihtîr?—MATTHAIA 11:29; MARKA 10:13-16.
Mihring dangte ang lo takin, Isua chu leia a lo pian hmain vânah thlarau mi angin a lo awm tawh a. (Johana 8:23) Pathian thil siam hmasa ber a nih bâkah, thil dang zawng zawng siamnaah pawh a Pa chu a ṭanpui a ni. Pathian Jehova’n a kut ngeia a siam awmchhun a nih avângin, Fapa “mal neih chhun” tia inâwm taka koh a ni a. (Johana 1:14) Pathian tâna Thusawitu a nih avângin, “Thu” tia koh a ni bawk.—Thufingte 8:22, 23, 30; Kolossa 1:15, 16 chhiar rawh.
2. Engvângin nge Isua leiah a lo kal?
Pathian chuan a Fapa nunna chu Juda mi nula thianghlim Mari chhûlah sawnin, vân aṭangin leiah a rawn tîr a. Chuvângin, Isua chuan mihring pa a nei ve lo. (Luka 1:30-35) Isua leia a lo kal chhan chu hêngte hi a ni: (1) Pathian chungchâng thudik min zirtîr tûrin, (2) harsatna kan tâwk chung pawha Pathian duhzâwng tih dân chungchânga entawn tûr siam tûrin, leh (3) “tlan nâna” a nun ṭha famkim hlân tûrin.—Matthaia 20:28 chhiar rawh.
3. Engvângin nge tlanna kan mamawh?
Tlanna kan tih chu thih hlauhawm dinhmun aṭanga chhuah zalên nâna sum pêk hi a ni a. (Exodus 21:29, 30) Thihna leh tarna te hi mihringte tâna atîra Pathian thiltum zîngah a tel lo. Chu chu engtin nge kan hriat theih? Pathian chuan mipa hmasa Adama hnênah, Bible-in “sual” tia a sawi thil a tih chuan a thi ang tih a hrilh a. Chuvângin, Adama chuan thil sual ti lo sela chuan a thi ngai hauh lo vang. (Genesis 2:16, 17; 5:5) Bible sawi dânin, Adama avângin thihna chu khawvêlah a lo “lût” a. Chutiang chuan, Adama chuan a thlahte hnênah sual leh sual man thihna chu a rochun ta zêl a. Chuvângin, Adama hnên aṭanga kan rochun thihna laka zalên thei tûrin tlanna kan lo mamawh ta a ni.—Rom 5:12; 6:23 chhiar rawh.
Tuin nge thihna ata kan zalên theihna tûrin tlanna pe thei ang? Kan thih hian keimahni sual man chauh kan pe tla ṭhîn a. Ṭha famkim lo tumah hian mi dangte sual man kan pêksak thei lo.—Sâm 49:7-9 chhiar rawh.
4. Engvângin nge Isua a thih?
Keimahni ang lo takin, Isua chu a ṭha famkim a. Eng thil mah a tih sual loh avângin, ama sualna atân a thih a ngai lo. Mi dangte sual atân a thi zâwk a ni. Pathian chuan mihringte a hmangaihna nasa tak lantîrin, kan aia thi tûrin a Fapa a rawn tîr a. Isua pawhin a Pa thu âwih a, kan sual tlan nâna a nun hlânin min hmangaihzia a lantîr bawk a ni.—Johana 3:16; Rom 5:18, 19 chhiar rawh.
Engvângin Nge Isua A Thih? tih video en rawh
5. Isua chuan tûnah eng nge a tih?
Leia a awm lai khân, Isua chuan dam lote a tidam a, mitthite a kaithovin, mangangte a chhan chhuak a. Chutiang chuan, thu âwih mihring zawng zawngte tâna thil a la tih tûrte chu a lo entîr lâwk a ni. (Matthaia 15:30, 31; Johana 5:28) Isua a thih hnuah, Pathianin thlarau lam nunna pein a kaitho leh a. (1 Petera 3:18) Tichuan, lei chung zawng zawnga Lal anga rorêl theihna Pathian Jehova’n a pêk hma loh chuan, Pathian ding lamah ṭhuin a nghâk ta reng a. (Hebrai 10:12, 13) Tûnah chuan, vânah Lal niin ro a rêl tawh a, chu mi chungchâng chanchin ṭha chu he leia a hnungzuitute chuan khawvêl pumah an puang chhuak a ni.—Daniela 7:13, 14; Matthaia 24:14 chhiar rawh.
Nakin lawkah, Isua chuan Lal a nih anga a thu neihna chu hrehawm tawrhna leh a thlentîrtu zawng zawngte tihtâwp nân a hmang dâwn a. Isua thu âwihna hmanga amaha rinna lantîrtu zawng zawngte chuan lei paradis-ah nun hlimawm tak an chên ang.—Sâm 37:9-11 chhiar rawh.
