Pathian chuan thlahtu Abrahama thlahte chu hnam khat anga dinin, an hnênah dânte a pe a. Chu hnam chu “Israel” tia kovin, biakna dik leh a thu chu a kawltîr a ni. (Sâm 147:​19, 20) Chuvângin, hnam tina mite chuan Israel hnam chu an hlâwkpui thei a ni.—Genesis 22:18 chhiar rawh.

Pathian chuan Israelte chu a thuhretu atân a thlang a. An hmân lai chanchinte chuan mite’n Pathian dân zawm an hlâwkpui dân a târ lang. (Deuteronomy 4:⁠6) Chutiang chuan, Israelte avângin mi dangte chuan Pathian dik an hre thei a ni.—Isaia 43:​10, 12 chhiar rawh.

A hnuah chuan, Israelte chuan Pathian duhsakna an chân a, Pathian Jehova chuan chu hnam chu Kristian kohhran nên a thlâk ta a. (Matthaia 21:43; 23:​37, 38) Tûnah chuan, Israelte aiah Kristian dikte chu Jehova tân a thuhretute an lo ni ta a ni.—Tirhkohte 15:​14, 17 chhiar rawh.

Isua chuan a hnungzuitute chu hnam tina mite hnêna thu hril tûr leh zirtîrte siam tûrin pâwl angin a din a. (Matthaia 10:​7, 11; 24:14; 28:​19, 20) He khawvêl tâwpna hunah hian chu rawngbâwlna chuan a vâwrtâwp a thleng mêk a ni. Thilthleng chanchina a vawikhatna atân, Jehova chuan hnam tina mi maktaduai têlte chu biakna dikah hian a inpumkhattîr a. (Thu Puan 7:​9, 10) Kristiante chu infuih tawn a, inṭanpui tawn tûrin an inpumkhat a. Khawvêl puma an inkhâwmnaahte chuan Bible zirtîrna hun duan inang vek chu an nei a ni.—Hebrai 10:​24, 25 chhiar rawh.

Kum 1870 chho bâwr vêl khân Bible zirlai pâwl te tak tê chuan hun rei tak ata bo tawh Bible thutak chu an hmu chhuak leh a. Anni chuan Isua’n Kristian kohhran chu thu hril tûrin a din tih an hriat avângin, khawvêl pum huapa Lalram thu hrilhna beihpui chu an thlâk ṭan a. Kum 1931 khân Jehova Thuhretute tih hming chu an chhawm ta a ni.—Tirhkohte 1:8; 2:​1, 4; 5:42 chhiar rawh.

Kum zabi khatnaah khân, ram tam taka Kristian kohhrante chuan kohhran Lû anga Isua pawmtu governing body neih chu an hlâwkpui a. (Tirhkohte 16:​4, 5) Chutiang bawkin, tûn laiah khawvêl puma Jehova Thuhretute chuan upa thil tawn ngah takte hmanga din Governing Body chu an hlâwkpui a ni. Chu chuan Bible zirna tûr thu leh hlate ṭawng 600 chuanga letling a, chhu chhuak a, sem chhuaktu Jehova Thuhretute branch office-te chu a enkawl a ni. Chutiang chuan Governing Body chuan khawvêl puma kohhran 1,00,000 chuangah Pathian Thua fuihna leh kaihhruaina chu a pe chhuak thei a ni. Kohhran tinah chuan mipa thlarau lama tlingte chuan upa, a nih loh leh enkawltu angin rawng an bâwl a. Hêng mipate hian Pathian berâmte chu hmangaihna nên an enkawl a ni.—1 Petera 5:​2, 3 chhiar rawh.

Jehova Thuhretute chu chanchin ṭha hril tûr leh zirtîr siam tûra pâwl anga din an ni a. Tirhkohte ang khân, in tinah kan kal a ni. (Tirhkohte 20:20) Thutak ngainatute chu Bible zirpuiah kan sâwm bawk a. Mahse, Jehova Thuhretute chu pâwl pakhata awm mai an ni lo. Pa ber hmangaihna nei tak enkawlna hnuaia awm chhûngkaw khat kan ni a. Unau inngaihsak tak kan ni hlawm bawk. (2 Thessalonika 1:⁠3) Jehova mite chu Pathian tilâwm tûr leh mi dangte ṭanpui tûra pâwl anga din an nih avângin, he leia chhûngkaw hlim ber an ni.—Sâm 33:12; Tirhkohte 20:35 chhiar rawh.