ZIRLAI 2
Pathian Chu Tu Nge Ni?
1. Engvângin nge Pathian chibai kan bûk ang?
Pathian dik chu thil engkim Siamtu a ni a. Awm ṭan hun a nei lo va, tâwp hun a nei hek lo. (Sâm 90:2) Ani chu Bible-a kan hmuh chanchin ṭhate lo chhuahna Hnâr a ni a. (1 Timothea 1:10, 11) Nunna min petu a nih avângin, amah chauh chu chibai kan bûk tûr a ni.—Thu Puan 4:10, 11 chhiar rawh.
2. Pathian chu eng ang nge a nih?
Pathian chu he leia chêng nunna nei thil siamte aia sâng zâwk—Thlarau—a nih avângin, tuman engtik lai mahin an hmu ngai lo. (Johana 1:18; 4:24) Amaherawhchu, a thil siamte aṭangin Pathian mizia chu kan hre thei a ni. Entîr nân, thei leh pangpâr chi hrang hrang chuan a hmangaihna leh finna min hriattîr a. Lei leh vân zau tak mai hian Pathian thiltihtheihna min hriattîr bawk a ni.—Rom 1:20 chhiar rawh.
Bible chhiarna aṭangin Pathian mizia chu kan hre tam lehzual thei a. Entîr nân, Bible chuan a duhzâwng leh a duh lohzâwng te, mite a cheibâwl dân te, leh dinhmun chi hrang hrang a chhân lêt dânte min hrilh a ni.—Sâm 103:7-10 chhiar rawh.
3. Pathianin hming a nei em?
Isua chuan: “Kan Pa vâna mi, i hming zahawm rawh se,” a ti a. (Matthaia 6:9) Pathian chuan nihna tam tak nei mah se, hming erawh pakhat chauh a nei a ni. Chu hming chu ṭawng hman azirin a lam dân a inang lo va, Mizo ṭawng chuan “Jehova” tiin kan lam a ni. Mahse, mi ṭhenkhat chuan “Yahweh” tiin an lam bawk.—Sâm 83:18 chhiar rawh.
Bible tam takah Pathian hming chu paih bo va, Lalpa emaw, Pathian emawa thlâk a ni a. Mahse, Bible ziah a nih lai chuan a hming chu vawi 7,000 dâwn lai a chuang a ni. Isua chuan mite hnêna Pathian thu a hrilhin Pathian hming a hriattîr ṭhîn.—Johana 17:26 chhiar rawh.
Pathianin Hming A Nei Em? tih video en rawh
4. Pathian Jehova chuan min ngaihsak em?
Heta hmangaihna nei pa ber angin, Pathian chuan kan ṭhat hlenna tûrin thil a ti
Hrehawm tawrhna tam takte hian Pathian Jehova’n min ngaihsak lo tih a hril em? Ṭhenkhat chuan Pathianin min fiah nân hrehawm min tawrhtîr niin an sawi a; mahse, chu chu a dik lo.—Jakoba 1:13 chhiar rawh.
Pathian chuan mihringte chu zalên taka duhthlan theihna pein a chawimawi a. Pathian rawngbâwl tûra zalên taka duh thlan theihna kan nei hi kan ngaihlu hle a ni lâwm ni? (Josua 24:15) Mahse, mi tam takin mi dangte chunga thil ṭha lo tih an thlang a, chu chuan hrehawm tawrhna a tihluar a. Chûng thilte chuan Jehova a tilungngai êm êm a ni.—Genesis 6:5, 6 chhiar rawh.
Jehova chu min ngaihsaktu Pathian a ni a. Nun hlim tak kan neih chu a duh a ni. Nakin lawkah chuan hrehawm tawrhna leh a awmtîrtute chu a paih bo vang. Chu mi hma zawng chuan, hrehawm tawrhna a awm rih phal tûrin chhan ṭha tak a nei a. Zirlai 8-ah chu chu kan hmu ang.—2 Petera 2:9; 3:7, 13 chhiar rawh.
5. Engtin nge Pathian kan hnaih lehzual theih ang?
Jehova chuan ṭawngṭaia amah hnaih tûrin min sâwm a. Ani chuan a mi malin min ngaihsak ṭheuh a ni. (Sâm 65:2; 145:18) Pathian chu ngaihdam peih tak a ni a. Hlawhchham châng pawh nei mah ila, Amah tihlâwm tuma kan thawhrimna chu a hmuh hmaih lo. Chuvângin, mi ṭha famkim lo kan ni chung pawhin, Pathian nên inlaichînna ṭha kan nei thei tak zet a ni.—Sâm 103:12-14; Jakoba 4:8 chhiar rawh.
Jehova chu nunna min petu a nih avângin, mi dang zawng aiin kan hmangaih zâwk tûr a ni. (Marka 12:30) Pathian i hmangaihna chu a chanchin zir belhna leh ti tûra a duhte tihna hmanga i lantîr chuan amah chu i hnaih lehzual ang.—1 Timothea 2:4; 1 Johana 5:3 chhiar rawh.
