Pathian chuan hnam tina mite chu ṭawngṭaia amah hnaih tûrin a sâwm a. (Sâm 65:⁠2) Mahse, ṭawngṭaina zawng zawng chu a ngaithla lo va, a pawm vek hek lo. Entîr nân, an nupuite chunga kut thlâk hmangte ṭawngṭaina chu dâl, a nih loh leh ngaihthlâk loh a ni thei a. (1 Petera 3:⁠7) Chu bâkah, Israel mite’n thil sual an tihluih tlat khân, Pathian chuan an ṭawngṭaina a ngaithla duh lo. Ṭawngṭaina chu chanvo hlu a ni tih a chiang hle. Amaherawhchu, Pathian chuan an inlamlêt phawt chuan thil sual nasa tak titute ṭawngṭaina pawh a chhâng tho vang.—Isaia 1:15; 55:7 chhiar rawh.

Pathianin Ṭawngṭaina Zawng Zawng A Ngaithla Vek Em? tih video en rawh

Ṭawngṭaina hi Pathian kan biakna pêng pakhat a nih avângin min Siamtu, Jehova hnênah chauh kan ṭawngṭai tûr a ni. (Matthaia 4:10; 6:⁠9) Chu bâkah, ṭha famkim lo kan nih avângin kan sual tâna thi Isua hmingin kan ṭawngṭai tûr a ni bawk. (Johana 14:⁠6) Jehova chuan thiam sa emaw, ziah chhuah sa emaw sawi nawn mai maia ṭawngṭai chu a duh lo. Kan thinlung aṭanga tih tak zeta kan ṭawngṭai chu a duh a ni.—Matthaia 6:7; Philippi 4:​6, 7 chhiar rawh.

Min Siamtu chuan ri chhuak lova ṭawngṭaina pawh a hre thei a. (1 Samuela 1:​12, 13) Zîng thawh hlim leh zân mut dâwn te, chaw ei dâwn te, leh buaina kan tawh hun ang chi pawh tiamin, engtik lai pawha ṭawngṭai tûrin min sâwm a ni.—Sâm 55:22; Matthaia 15:36 chhiar rawh.

Pathian ring lote leh leia remna awm tûra A thutiam nuihsantute zînga chêng kan nih avângin, Pathian hnaih chu thil awlsam a ni lo. (2 Timothea 3:​1, 4; 2 Petera 3:​3, 13)  Chuvângin, kan Kristian unaute nêna mi tichak thei inkawmna kan neih chu a ngai a, anni pawhin min mamawh a ni.—Hebrai 10:​24, 25 chhiar rawh.

Pathian hmangaihtute nêna inkawmna chuan Pathian hnaih tûrin min ṭanpui a. Jehova Thuhretute inkhâwmna chuan mi dangte rinna hlâwkpui theihna hun remchâng ṭha tak min pe a ni.—Rom 1:​11, 12 chhiar rawh.

Jehova Thu aṭanga i thil zirte chhût ngunna hmangin amah i hnaih thei a. A thiltih te, a kaihhruaina te, leh a thutiamte chu ngun takin ngaihtuah ṭhîn ang che. Ṭawngṭaina nêna chhût ngunna chuan Pathian hmangaihna leh finna ngaihhlutna thinglung min neihtîr a ni.—Josua 1:8; Sâm 1:​1-3 chhiar rawh.

Pathian rinchhanna leh rinna i neih chauhvin, amah chu i hnaih thei ang. Rinna chu nunna nei thil nung châwm reng ngai ang a ni a. I thurinte i rin nachhan ennawn ṭhînin, i rinna chu i châwm reng tûr a ni.—Matthaia 4:4; Hebrai 11:​1, 6 chhiar rawh.

Jehova chuan amah hmangaihtute chu a ngaihsak a. An rinna leh an chatuan nun beiseina tichhe thei thil engpawh lakah anni chu a vênghim ṭhîn. (Sâm 91:​1, 2, 7-10) Ani chuan kan hrisêlna leh hlimna tichhe thei nun kawng ṭha lote zawh lo tûrin min vaukhân bawk. Pathian Jehova chuan nun kawng ṭha ber min zirtîr a ni.—Sâm 73:​27, 28; Jakoba 4:​4, 8 chhiar rawh.