Pathian Ram chu vân sawrkâr a ni a. Chu chuan sawrkâr dang zawng zawngte chu rawn thlâkin, Pathian duhzâwng chu vânah leh leiah hian a rawn thlentîr ang. Chutianga Pathianin a Ram a hmang tûr chu chanchin ṭha a ni. Pathian Ram chuan mihringte sawrkâr ṭha mamawhna chu a rawn phuhru thuai ang a. Chu chuan leia awm zawng zawngte chu a inpumkhattîr ang.—Daniela 2:44; Matthaia 6:​9, 10; 24:14 chhiar rawh.

Lalram chuan lal a nei tûr a ni a. Jehova chuan a Fapa, Isua Krista chu A Lalrama Lal ni tûrin a ruat tawh a ni.—Thu Puan 11:15 chhiar rawh.

Pathian Ram Chu Eng Nge Ni? tih video en rawh

Pathian Fapa chu ngilnei tak leh thu dika ding nghet tlat a nih avângin, Lal atâna duhthusâm a ni. (Johana 1:14) Tin, vân aṭanga leia ro a rêl dâwn avângin, mite ṭanpui tûrin thiltihtheihna a nei tâwk hle bawk. Kaihthawh leh a nih hnuah, Isua chu vânah a chho va, Jehova ding lamah lalna a chan hun tûr chu a nghâk a. (Hebrai 10:​12, 13) A tâwpah, Pathian chuan vân aṭanga rorêl ṭan tûrin thu neihna a pe ta a ni.—Daniela 7:​13, 14 chhiar rawh.

“Mi thianghlimte” tia koh pâwl pakhat chuan vânah Isua ro an rêlpui ang. (Daniela 7:27) Mi thianghlimte ni tûra thlan hmasak chu Isua tirhkoh rinawmte kha an ni a. Jehova chuan tûn thlengin mi rinawm a hmei a pate chu mi thianghlimte  zînga mi ni tûrin a la thlang zêl a ni. Isua angin, anni chu thlarau taksa pua kaihthawh an ni.—Johana 14:​1-3; 1 Korinth 15:​42-44 chhiar rawh.

Mi engzât nge vânah lâwn dâwn? Isua chuan anni chu “pâwl tlêmte” tiin a ko va. (Luka 12:32) A tâwpah chuan anni chu 1,44,000 an tling chho ang a. Isua nên leiah hian ro an rêl ang.—Thu Puan 14:1 chhiar rawh.

Pathian Ram chuan kum 1914-ah ro a rêl ṭan a. * Lal a nih hnua Isua thiltih hmasak ber chu Setana leh a vântirhkohte leia paih thlâk a ni. Setana chu a thinur êm êm a, lei pum puiah hian buaina a chhuahtîr a ni. (Thu Puan 12:​7-10, 12) Chu hun aṭang chuan mihringte hrehawmna chu nasa takin a pung chho va. Indona te, ṭâm te, hrilêng te, leh lîrnghîngte hi Pathian Ramin lei chungah thu neihna zawng zawng a la thuai dâwn tih “chhinchhiahna” pakhat hmêlhmangte zînga mi a ni.—Luka 21:​7, 10, 11, 31 chhiar rawh.

Khawvêl puma thu hrilhna hmangin, Pathian Ram chuan hnam tina mi mipui tam takte chu a inpumkhattîr dêr tawh a. Thuhnuairawlh mi maktaduai têlte chu Isua rorêlna hnuaia Pathian Ram khua leh tuite an lo ni ta. Lei kal hmang suaksual tihtâwp a nih hunah, Pathian Ram chuan anni chu a vênghim ang. Chuvângin, Pathian Ram hlâwkpui duh zawng zawngte chuan Isua khua leh tui thu âwih tak nih dân an zir tûr a ni.—Thu Puan 7:​9, 14, 16, 17 chhiar rawh.

Kum 1,000 chhûngin, Lalram chuan mihringte tâna atîra Pathian thiltum chu a rawn hlen chhuak ang a. Lei pum pui hi paradis a rawn nihtîr ang. A tâwpah Isua chuan Lalram chu a Pa hnênah a hlân kîr leh ang. (1 Korinth 15:​24-26) Pathian Ram chungchâng hrilh hriat duh tuemaw i nei em?—Sâm 37:​10, 11, 29 chhiar rawh.