Sierra Leone-a awm Dauda-a chuan: “Ram hmâr lama khaw pakhatah ka seilian a. Ka naupan laiin ka chhûngkua leh chhûngkaw khat dang chu chênna lei inchuhin kan inhau va. Chumi chinfel nân damdawi thiam pakhat kan ko va. Ani chuan mi dang pakhat chu dârthlalang kentîrin puan vâr nên a khuh a. Nakin lawkah chuan, puan vâra inkhuha chu rawn thlân chhuakin a khur ta hlawk hlawk mai a. A dârthlalang keng chu a han en chuan, “Putar pakhat hi ka hmu a, ani chuan puan vâr a sin a, mi sâng tak leh tar tak a ni a, a samte pawh a vâr vek a; tichuan, kûn chung hian a kal a,” tiin mak ti tak mai hian a sawi a ni.

“Ani chaun ka pu chungchâng a sawi lo niin! Chumi hnuah: ‘Ka sawi i awih loh chuan, nangmah ngei lo kal a, rawn en rawh!’ tiin phâwk hrêt chung hian min hrilh a ni. Tu mahin an en ngam lo. Chu damdawi thiam chuan ûm rah ro chhûnga a tui dawi chuan hnah leh dârthlalang kengtu chu a han theh chuan, chu pa chu a ngawi ta reng mai a ni.

“Dârthlalang kengtu chuan ‘Ka puin’ he lei neitu chu kan chhûngkua a ni tih a sawi a. Engmah hlauh thâwna nei lovin, hna thawk rawh u tih thu ka pi a hrilh a. Chu thu tlûkna chu chhûngkaw dangte pawhin an pawm a. Buaina chu chinfel a ni ta.”

Chutiang thiltawnte chu West Africa lamah chuan a hlûar hle a. Khawvêl hmun pakhat ve mai, he lai hmunah hi chuan, mi tam tak chuan, mitthite chu thlarau khawvêlah an insawn a, chutah chuan he leia mite awm dânte chu enin an thunun thei a ni. Chu thurin chu a dik em? Mitthite chu an nung tak tak em? An nung lo a nih chuan, mitthite thlarau nia inchhâlte chu tute nge an nih? Chûng zawhnate chungchânga a chhânna dik tak hriat chu thil pawimawh tak a ni. Chu chu thih leh dam tlauka pawimawh a ni.