Evângin nge Setana leh a ramhuaite chuan mite bum tûra theih tâwp an chhuah? An helnaa teltîr min duh vâng a ni a. Anni chu Pathian anga be tûrin min duh a. An dâwtsawite ring tûr leh Pathian Jehova duh loh zâwngte ti tûrin min duh bawk. Chûng thiltih zînga tam tak chu mitthite nêna inkûngkaih hnam dânah a tel a ni.

Hmangaih tak an thih hian rilru lamah hrehawm kan tuar a, chutiang huna lungngaih chu thil pângngai tak a ni. A ṭhian Lazara a thih chuan Isua chu “a ṭap ta a”.—Johana 11:35.

Thihna nêna inkûngkaih hnam dân chi hrang hrang khawvêl pumah a tam hle a. Tam tak chu Bible thu bul nên inkalhna a awm lo. Mahse, hnam dân ṭhenkhat chuan mitthite chu an la nungin, mi nung damte la hmu thei nia ngaih dân chu a ṭanchhan a ni. Mitthi lumen te, a lutuka sûnna lantîr te, leh ropui taka mitthi vuina siamte chu mitthi thlarau tihlâwm loh hlauhna aṭanga lo chhuak vek a ni. Mahse, mittthite chuan ‘eng mah an hriat loh’ avângin chutianga thiltih dânte chu Setana dâwtsawite chawi lârna a ni.—Thuhriltu 9:5.

Hnam dân ṭhenkhat leh serh leh sângte chu mitthite chuan mi nung damte hnên aṭangin ṭanpuina an mamawh a, tihlungawi an nih loh chuan nung dama awmte chu an tina thei nia rinna aṭanga lo chhuak a ni. Ram ṭhenkhatah chuan mi chu a thih hnu ni 40 emaw, kum khat emawah ruaite siamsakin, thil hlante an nei a. Chu chuan mitthi chu thlarau rama ‘hruai kai’ tûra ṭanpui niin an ngai a. Tih dân ṭhin dang leh chu mitthite tâna ei tûr leh in tûr pêk hi a ni.

Chûng thiltihte chu mitthite chungchânga Setana dâwtsawi chawi lârna a nih avângin a dik lo a. Pathian Jehova chuan ramhuaite zirtîrna ṭanchhan hnam dân leh thiltihte chu a pawm ang em? A pawm ngai lo vang!—2 Korinth 6:14-18.

Pathian chhiahhlawh dik takte chu Setana dâwtsawi thlâwp zâwnga thiltihna eng mahah an tel lo. Chu aiin, nunga la damte chu tih tak zeta ṭanpuiin an thlamuan zâwk a ni. Anni chuan mi chu a thih chuan Jehova chuahvin a ṭanpui thei tih an hria a ni.—Joba 14:14, 15.

Mi ṭhenkhat chu ramhuaite nêna tlang taka inpawhna emaw, ramhuai zâwl kal tlanga inpawhna emaw an nei a. Chu chu dawithiamna tia koh a ni. Voodoo te, dawi te, mitdawivaih te, aienthiamna te, leh mitthi biaknate chu dawithiamna thiltih vek a ni.

Chûng thiltihte chu Bible chuan a hnâwl a, heti hian a sawi a ni: “Aien chîng te, ṭhumvâwi chîng te emaw, mitlâkdawi hmang emaw te, dawithiam te, dawi ât te, ramhuai zâwl rawih te, dawithiam te, mitthi biak chîng mi te in zîngah an awm tûr a ni lo. Hêng thil ti mi apiangte hi LALPA ngaihin mi tenawm an ni si a,” tiin.—Deuteronomy 18:10-12.

Engvângin nge Pathian Jehova chuan chûng dawithiamna thiltihte chu nasa taka dodâl tûra min vaukhân?

Kan tâna ṭha tûr a nih avângin Pathian Jehova chuan dawithiamna thiltih zawng zawngte dodâl tûra min vaukhân a. Ani chuan mite chu a hmangaihin, a ngaihsak hle a, ramhuai nêna inkûngkaihtute chuan, a khuahkhirhna a tuar dâwn tih a hria a ni.

Brazil rama Nilda-i chu mitthi thlûk thiam a ni a. Ramhuai chuan a nun chu a tihrehawm hle a. Ani chuan: “Ka kawchhûnga . . . ramhuaite chuan, thil tih tûr chungchângah min thunun hle a. Thil hriat theihna nei mang meuh loh châng leh neih loh hulhual châng pawh ka nei a, rilru lamah buaina nasa tak ka nei a ni. Ramhuaihovin min tihduhdah êm avângin ka hriatna thazâmate a chhia a. Rilru hahdam nân damdawi te hmangin, zu te ka in a, meizial pawh ka zu nasa hle a. Chutiang chuan kum tam tak chhûng ka awm a ni,” tiin a sawi.

A hnuah, Pathian Jehova leh leia a Thuhretute ṭanpuina avângin Nilda-i chu ramhuai thununna ata a zalên a, tûnah chuan nun hlimawm leh nuam tak a nei tawh a ni. Ani chuan: “Thlarau [suaksual] te nên rei lo tê chhûng pawh inkûngkaihna nei ngai lo tûrin ka fuih ṭheuh a che u,” tiin a sawi a ni.