Bible chuan Setana chu “khawvêl zawng zawng bumtu” a ni tiin a sawi a. (Thu Puan 12:9) Setana leh a ramhuaite chuan Pathian Thu, Bible kan rin chu an duh lo. Anni chuan mite chu mitthi tawhte thlarau chu thlarau khawvêl hmun emaw laiah la nung nia rintîr min tum a. Chutianga an tih dân chu i lo en ang u.

Sakhaw tam tak chuan mihringte hian taksa thih hnuah thlarau khawvêla kal chhuak soul, a nih loh leh nunna, thlarau thi thei lo nei niin an zirtîr a. Taksa chu thi mah se, soul erawh a thi lo an ti a. Chu bâkah, soul chu a thi thei lo va, chatuanin a awm an ti tlat a ni.

Mahse, Pathian Thu, Bible chuan chutiang chuan a zirtîr lo. Bible chuan nunna [soul] chu mihring chhûnga awm thil eng emaw ni lovin, amah mihringa chu a ni tih a târ lang a. Entîr nân, Adama siam a nih dân chungchângah Bible chuan: “LALPA Pathianin leia vaivutin mihring a siam a, a hnârah chuan nunna thaw chu a thaw lût a; tichuan, mihring chu mi nung a lo ni ta a,” tiin a sawi. (Genesis 2:7) Chuvângin, Adama hnênah [soul] nunna thi thei lo pêk ni lovin, amah chu soul, a nih loh leh mi nung a ni.

Ramsate pawh suol tia koh an ni.—Genesis 1:20, 21, 24, 30.

Bible thu mal “soul” tih hi amah ngei sawina a nih avângin, soul chu a thi theiin, a thi rêng a ni tih hriat chu mak kan ti tûr a ni lo. Bible chuan heti hian a sawi a ni:

• “Thil tisualtu [soul] apiang an thi ang.”—Ezekiela 18:4.

• “Samsona chuan, ‘Philistia-ho hi ka han thihchilh teh ang.’ ”—Rorêltute 16:30.

• “Chawlhniah hian tihṭhat nge thiang, tihchhiat? Chhandam nge thiang, tihhlum?”—Marka 3:4.

Bible châng dangte pawhin [soul] nunna chu tihboral thei (Genesis 17:14), khandaiha tihhlum theih (Josua 10:37), rehhlum theih (Joba 7:15), leh tuia tla hlum thei (Jona 2:5) a ni tih a târ lang. Chuvângin, [soul] nunna chu a thi a ni.

Bible hi a bu puma i chhiar chhuak a nih chuan, “nunna [soul] thi thei lo” tih i hmu ngai lo vang. Mihring [soul] nunna chu thlarau a ni lo. nunna thi thei lo tih zirtîrna hi Bible zirtîrna a ni lo. Chu chu Setana leh ramhuaite zirtîrna a ni. Jehova chuan sakhaw zirtîr dâwt thu zawng zawng chu a hua a ni.—Thufingte 6:16-19; 1 Timothea 4:1, 2.

Setana’n mite a hruai pên dân kawng dang leh chu mitthi thlûk thiamte hmangin a ni a. Mitthi thlûk thiam chu thlarau khawvêl aṭanga tlang taka thuchahte dawng theitu a ni. Mitthi thlûk thiamte pawh tiamin, mi tam tak chuan chûng an thuchah dawnte chu mitthi tawhte thlarau aṭanga lo kal niin an ring a ni. Mahse, Bible aṭanga kan hriat tawh angin, chu chu thil ni thei a ni lo.—Thuhriltu 9:5, 6, 10.

A nih chuan, chûng thuchahte chu tu hnên aṭanga lo kal nge ni ta ang? Anmahni ramhuaite hnên aṭang ngeiin! Chûng ramhuaite chuan mi chu a dam laiin an lo enthla thei a; a ṭawng dânte, a duh zâwngte, a thiltihte, leh a thil hriatte chu an hria a. Chuvângin, mitthi tawhte awm dân entawn chu an tân awlsam tak a ni.—1 Samuela 28:3-19.

Mitthite chungchânga Setana dâwtthu chawilâr dân dang leh chu thawnthu mai mai aṭangin a ni a. Chûng chanchin dik lote chuan mite chu Bible thutak aṭangin a kalpêntîr fo a ni.—2 Timothea 4:4.

Africa ramah chuan an thih hnua nung dam anga hmutute chungchâng sawi tam tak a awm a. A tlângpui thuin, chutianga hmu nia an sawi ṭhinte chu chumi awmna hmun aṭanga hla takah a ni ṭhîn a. Mahse, heti hian inzâwt ang che: ‘Mi chu thihna aṭanga a lo kîr leh thei a nih chuan, a chhûngte leh ṭhiante awmna aṭanga hla taka a kîr leh chu thil inâwm a ni em?’ tiin.

Chu bâkah, an mi hmuh chu mitthi taa nêna inan tak a ni thei lo vang maw? Entîr nân, ram pakhata thu hrila rawngbâwl Kristian pahnih chuan pu tar pakhatin dârkâr eng emaw zât chu an hnung a rawn zui tih an hria a. An han zawh chuan, chu pu tar chuan Kristian rawngbâwltu pakhat zâwk chu tûn hma kum eng emaw kal taa thi a unaupa nia a hriat vâng a ni. A lo hre sual chiang hle a; mahse, a hre sual tih chu a pawm duh hauh lo. Chu pu tarin, a hnua a ṭhiante leh a vêngte hnêna a hrilh leh dân tûr chanchin chu han mitthla teh!

Mite chuan thil makte chu an hmu ṭhînin, an hre ṭhîn a, an mang ṭhîn tih pawh i hre ngei ang. Chûng an thiltawn mak takte chuan mahniah hlauhna a neihtîr fo a ni. Africa khawthlang lam rama awm Marein-i chuan a pi thi tawh aw chu zanah a hre ṭhîn a. Ani chuan a hlauh êm avânga ring taka au chhuak vakin, a chhûngte zawng zawng chu a tiharh a. A tâwpah, a rilru a kim lo ta hial a ni.

A nih leh, mitthite chu an la nung tak tak a nih chuan, an hmangaih takte tihṭhaih chu thil inâwm a ni em? Ni lo ve. Chutiang thu hlauhawm takte lo chhuahna chu ramhuaite hnên aṭangin a ni.

Ṭangkai tak leh thlamuanthlâk tak anga lang thuchahte chungchâng hi eng nge ni ve? Entîr nân, Sierra Leone rama awm Gbassay-i chu a dam lo va. Mumang a nei a, a mumangah a pa thi tawh chu a hmu a. A pa chuan thingkûng pakhat awmnaah kal a, a hnah chu la a, chu hnah chu tui nêna chawhpawlha in tûrin a hrilh a. Chutianga a tih hma chuan tu mah hrilh lo tûrin a ti a ni. Ani chuan chutiang chuan a ti a, a dam ta a ni.

Hmeichhe dang pakhat chuan a pasal thi tawh chu zâna a hnêna a rawn inlan thu a sawi a. Thawmhnaw mawi tak a hah a, hmuh a nuam khawp mai tiin a sawi.

Chutiang thuchahte leh inlârnate chu ṭha leh ṭangkai tak angin a lang a. Chûng chu Pathian hnên aṭanga lo kal a ni em? Ni lo. Jehova chu “thutak Pathian” a ni a. (Sâm 31:5) Ani chuan vervêk taka min bum a duh ngai lo. Ramhuaite chauhvin chutiang chuan an ti a ni.

A nih leh, ramhuai ṭhate an awm em? Awm lo. Ṭangkai ang taka lan châng nei mah se, an vaiin an ṭha lo vek a ni. Diabola’n Evi a biak pawh khân nêlawm tak angin a lang a. (Genesis 3:1) Mahse, Evi chuan a thusawite a ngaihthlâk a, a sawi anga thil a tih hnu chuan eng thil nge thleng? A thi ta a ni.

Mi sualte tân an bum duhte hmaa nêlawm tak anga awm chu thil pângngai tak a ni tih i hria a. Africa thufingah chuan “Ha var tak, thinlung thim tak,” tih a ni a. Bible chuan: “Setana meuh pawh êng tirhkohvah a insiam chawp si ṭhîn a,” tiin a sawi a ni.—2 Korinth 11:14.

Pathian chuan tûn laiah mite chu mumang te, inlârna te, leh thalrau khawvêl aṭanga awte hmangin a be ngai lo. Mite chu ‘hna ṭha tinrêng thawk tûra kim taka an inthuam’ theih nân Bible hmangin kaihhruaina leh zirtîrna a pe a ni.—2 Timothea 3:17.

Chuvângin, Jehova’n Diabola bumna laka min vaukhân hi min hmangaih vâng a ni. Ani chuan ramhuaite chu hmêlma hlauhawm tak an ni tih a hre si a.