Setana leh a ramhuaite chu râwng tak leh hlauhawm tak an ni reng a. Hmân lai hunah, Setana chuan Pathian chhiahhlawh rinnawm Joba rante chu a tihhlumsak a. Chumi hnuah, “thlipui” tlehtîrin Joba fa sâwmte chhênna inte chu tichhiain, a chhûnga awmte chu a tihlum vek a ni. Chumi hnu lehah, Joba chu “a kephah hnuai aṭangin a lu thlengin pânchhia a veitîr a.”—Joba 1:7-19; 2:7.

Isua hun laiin, ramhuaite chuan mi ṭhenkhat chu ṭawng thei lo leh khua hmu thei lovin an siam a. (Matthaia 9:32, 33; 12:22) Anni chuan mi pakhat chu hremin mahnia lunga inzaitîrin an siam a ni. (Marka 5:5) Chu bâkah, naupang pakhat chu an autîr chiam a, leiah an titlu a, ‘nasa takin an sawisa a ni.’—Luka 9:42.

Tûn laiah pawh, Setana leh ramhuaite chu tualthattute an la ni reng a. Dik tak chuan, vân aṭanga paihthlâk an nih aṭang chuan an thil sual tihte chu a nasa tawh zâwk mah a ni. Khawvêl hmun hrang hranga chanchin târ lante chuan an nunrâwngzia a târ lang a ni. Mi ṭhenkhat chu natna veitîrin an tihrehawm a. Mi dangte chu zânah an tihṭhaih a, mu thei lovin an siam a, mumang hlauhawm tak takte an neihtîr a. Mi dang lehte chu an pâwngsual hial a ni. Mi dang lehte chu mi â-ah leh tual thattu-ahte an chantîr a, mahni intihlum tûrin an chêttîr ṭhîn a ni.

Suriname rama awm Lintina-i chuan ramhuai, a nih loh leh thlarau sualin a chhûngkaw zînga mi 16 a tihlum bâkah, ani chu kum 18 chhûng tisa lam leh rilru lamah tihrehawmin a siam tih a sawi. Ramhuaite chuan “mite an thih thlenga sawisak chu nuam an ti,” tih a thiltawn aṭangin a sawi a ni.

Mahse, Jehova chuan a chhiahhlawhte chu Setana beihna lakah a vênghim thei a ni.—Thufingte 18:10.