Kan vai hian duh thlan tûr kan nei a. Pathian Jehova rawng nge kan bâwl dâwn a, a nih loh leh Setana leh a ramhuaite rawng nge kan bâwl dâwn tih duh kan thlang thei a. A pahnih chuan kan thlang thei lo a ni. Jehova rawngbâwl thlan chu a va finthlâk tak êm!

Kan hriat angin, ramhuaite chuan mite chu an tinain, an bum a. Jehova chu chutiang a ni lo. Pain a fate a hmangaih angin ani chuan mihringte chu a hmangaih a. Ani chu “thilpêk ṭha leh thilpêk famkim zawng zawng” Petu a ni. (Jakoba 1:17) Nasa taka ama tawrhnaah pawh, mihringte tân eng mah sûm lovin thil ṭha a pe a ni.—Ephesi 2:4-7.

Pathian Fapa Isua leia a awm laia a thiltihte kha han ngaihtuauh teh. Ṭawng thei lo te leh mitdelte a tidam a. Pharte leh kebaite pawh a tihdamsak bawk. Chu bâkah, ramhuaite a hnawt chhuakin, natna tinrêng a tidam a. Pathian thiltihtheihnain Isua chuan mitthite pawh a kaitho a ni.—Matthaia 9:32-35; 15:30, 31; Luka 7:11-15.

Pathian chuan mite hruai sual tumin a bum lova; chu aiin, thutak a sawi reng zâwk a ni. Tu mah a bum ngai lo.—Numbers 23:19.

Maimawm ina tho tâng angin mi maktaduai tam takte chu puithuna leh dâwt thute hmanga phuarin an awm a. Mitthite an hlau va. Ramhuaite pawh an hlau a ni. Anni chu anchhe lawh te, aien te, ramhuai laka invênna thil te, leh thil engemaw min vênghim theia ngaihna neihte chuan a tibuai hle a. Diabol-Setana dâwt thute ṭanchhana rinna leh hnam dânte phuarin an awm a ni. Pathian chhiahhlawhte chu chûng zînga eng mahin a tibuai ve lo.

Pathian Jehova chu Setana aiin nasa takin thil a tithei zâwk a. A rawng i bâwl a nih chuan, chûng ramhuaite lakah a vênghim ang che. (Jakoba 4:7) Dawithiamnain i chungah thil a tithei lo vang. Entîr nân, khawpui chhuahsan duh lotu Jehova Thuhretu pakhat chu Nigeria rama dawi lama thiltithei tak pathumte chuan dawi hlum an tum a. Chu an dawithiamna chu a hlawhchham avângin, chûng dawithiamte chuan a hlauh ta hle a, Thuhretu hnênah kalin ngaihdam an dîl a ni.

Ramhuaite’n an zarbuai che a nih chuan Pathian Jehova hming lam la, a humhim ang che. (Thufingte 18:10) Mahse, Pathian vênhim i nih theih nân ramhuaite leh ramhuai biakna nêna inkûngkaih thiltih eng pawh lakah i inthiar filîm tûr a ni. Hmân laia Ephesi khuaa Pathian betute pawhin chutiang chuan an ti a. Dawithiamna nêna inkûngkaih an lehkhabu neih zawng zawng chu la khâwmin an hâl vek a. (Tirhkohte 19:19, 20) Tûn laia Pathian chhiahhlawhte pawhin chutiang bawk chuan an ti tûr a ni. Aien te, ramhuai laka invênna thil te, “inhumhimna atâna hman” hrui te, leh ramhuai thiltih nêna inzawmna nei thil eng pawh chu nangmah ngeiin i tiral tûr a ni.

Pathian tihlâwm i duh chuan, biakna dik lo chhuahsan a, thil ṭha lo tihte bânsan chu a tâwk mai lo. Biakna thianghlim chu phur taka i vawn tlat a ngai a ni. Bible chuan tih tûra min phûtte chu a târ lang a ni:

Setana leh chûng ramhuaite chuan leiah hian thil ṭha lote ti a, zirtîr ṭhîn mite an nei a. Mahse, Jehova pawhin mite a nei bawk. Anni chu Jehova Thuhretute an ni. (Isaia 43:10) Khawvêl pumah Thuhretute chu mi nuat riat aia tam an awm a. An vai chuan theih tâwp chhuahin thil ṭha tih an tum a, mite chu thutak an zirtîr a ni. Ram tam takah chuan anni chu Kingdom Hall-ah i hmu thei a, chumi hmunah chuan lâwm takin an lo hmuak ang che.

An hna thawh chu Pathian rawngbâwl tûra mi dangte ṭanpui hi a ni a. Anni chuan i inah Bible an zirpui ang che a, kawng dik taka Jehova biak dân hre tûrin an ṭanpui ang che. Chumi atâna i pêk a ngai lo. Thuhretute chuan mite an hmangaihna leh Pathian Jehova an hmangaihna avânga thutak zirtîr chu nuam an ti hle a ni.