Setana leh a ramhuaite chuan mihringte rei tak an bum tawh lo vang. Jehova chuan anni chu vân aṭangin a paih thla tawh a. (Thu Puan 12:9) Kan hma lawkah hian, Pathianin Setana leh a ramhuaite chungah ro a rêl tawh ang. Pathian hnên aṭanga inlârnaah tirhkoh Johana chuan: “Vântirhkoh leilâwt chabi leh khaidiat lian pui kengin vân ata lo chhuk ka hmu a. Tin, drakon, rûlpui tar chu (chu chu Diabola leh Setana a ni) a man a, kum sângkhat atân a phuar a,” tiin a sawi a. (Thu Puan 20:1-3) A hnuah, Diabola leh a ramhuaite chu chatuana tihboral an ni ang.—Thu Puan 20:10.

Leia mi suaksualte chu tihboralin an awm bawk ang.—Sâm 37:9, 10; Luka 13:5.

Setana leh a ramhuaite tihboral an nih hnu chuan Jehova chuan mihringte chu malsâwmna tam takin a vur ang a. Mitthite chu an nung tawh lo va, khawi hmunah mah an awm tawh lo tih i hria ang. Isua chuan thihna chu munmang nei lo khawpa tui taka muhîlna nên a khaikhin a. (Johana 11:11-14) Ani chuan thihnaa muhîlte an thawh leh hun tûr a thleng dâwn tih a hriat vâng a ni. Ani chuan: “Chutih hunah chuan thlâna awm zawng zawngin a aw an hria ang a, an chhuak vek ang,” tiin a sawi a ni.—Johana 5:28, 29; Tirhkohte 24:15 nên khaikhin rawh.

Anni chu leiah hian an rawn nung leh ang a. Mitthi an awm thu puanchhuah aiin, tho lehte chungchâng hlim takin kan sawi zâwk ang! Thlân aṭanga hmangaih tak tholehte hmuah chu a va hlimawm dâwn tak êm!