Thlaraute chu an awm ngei mai! Hmuh theih loh thlarau khawvêlah chuan thlarau ṭhate leh ṭha lote an awm a. Anni chu leia nunga thi tate an ni em?

Ni lo, an ni lo. Mi a thih hian, mi tam takte ngaih dân angin, ani chu thlarau khawvêlah a kal lo. Chu chu engtin nge kan hriat? Bible chuan chutianga a sawi loh vâng a ni. Bible hi Jehova hming pu, Pathian dik awm chhun hnên aṭanga lo kal thutak bu a ni a. Jehova chuan mihringte a siam a; an thih hunah an chunga thilthleng chu chiang takin a hria a ni.—Sâm 83:18; 2 Timothea 3:16.

Bible chuan Pathianin mihring hmasa ber Adama chu, “leia vaivutin” a siam tih a sawi a. (Genesis 2:7) Pathianin ani chu Eden huan, Paradis-ah a dah a ni. Adama chuan Jehova dân a zâwm a nih chuan, a thi lo vang a; ani chu vawiin nî thlengin a la dam ang. Mahse, Adama chuan Pathian dân a bawhchhiat luih khân, Pathianin a hnênah: “Lei aṭanga lâk chhuah i ni si a; vaivut i ni a, vaivutah i kîr leh tûr a ni,” tiin a hrilh a ni.—Genesis 3:19.

Chumi awmzia chu eng nge ni? Jehova’n vaivut aṭanga Adama a siam hma khân, ani chu khawiah nge a awm? Khawiah mah a awm lo. Vâna thlarau la piang rih lo lah a ni hek lo. Ani chu a awm lo rêng rêng a ni. Chuvângin, Jehova’n Adama hnênah “vaivutah i kîr leh tûr a ni,” tia a sawi khân, Adama chu a thi dâwn a tihna a ni. Ani chu thlarau khawvêlah a insawn lo. A thih chuan, Adama chu nunna nei lo, khawiah mah a awm tawh lo a ni. Thihna chu nunna awm lohna hi a ni.

A nih chuan, mi dang thi tate chungchâng hi eng nge ni ve? Anni pawh khawiah mah an awm tawh lo em ni? Bible chuan hetiang hian a chhâng a ni:

• “An zain [mihringte leh rante chu] hmun khatah an kal vek a; an zain vaivuta mi an ni vek a, an zain vaivutah an chang leh vek a ni.”—Thuhriltu 3:20.

• “Mitthi erawh chuan eng mah an hre lo.”—Thuhriltu 9:5.

• “An hmangaihna te, an huatna te, an îtsîkna te a boral daih tawh a ni.”—Thuhriltu 9:6.

• “Thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo.”—Thuhriltu 9:10.

• “A thawin a chhuahsan a, ani [mihring] chu a leilungah a kîr leh a.”—Sâm 146:4.

Chûng Bible châng sawite chu pawm harsat i ti em? I ti a nih chuan, hei hi han ngaihtuah teh: Chhûngkaw tam takah chuan, pa ber chuan a chhûngkaw châwm nân sum a zawng a. A thih chuan, a chhûngkua chuan harsatna a tâwk tlângpui ṭhîn. A châng phei chuan, a nupui leh fanaute chuan ei tûr leina tûr sum an nei lo pawh a ni thei a. Boral ta chhûngkaw lû bera hmêlmate chuan la dama awm a nupui fanaute chu ṭha lo takin an cheibâwl pawh a ni thei. Tûnah, heti hian han inzâwt teh: ‘Chu chhûngkaw lû bera chu thlarau khawvêla a la nung a nih chuan, engvângin nge a chhûngkua chu a rawn ṭanpui zawm zêl loh? Engvângin nge a chhûngte chu mi sual lakah a vênhim loh?’ tiin. A chhân chu Bible sawi a dik vâng a ni. Chu chhûngkaw lû bera chu a thi tawh a, eng mah a ti thei tawh lo a ni.—Sâm 115:17.

Chu chu mitthite chu an nung leh tawh ngai lo vang tihna a ni em? Ni lo ve. Nakinah thawhlehna chungchânga kan sawi ang. Mahse, mitthite chuan tûna kan thiltih mêkte chu engmah an hre lo a ni. An hmu thei lo va, an hre thei lo va, min be thei hek lo. Anni chu kan hlauh a ngai lo. Anni chuan min ṭanpui thei lo va, min tina thei hek lo.—Thuhriltu 9:4; Isaia 26:14.