Jehova thlarau thil siam zawng zawng chu an ṭha vek a. A hnuah, an zînga pakhat chuan thil sual a ti a. Ani chu Diabol-Setana a ni. Setana chuan leia mihringte chu Jehova ni lovin, amah be tûrin a duh a. Thil thlen dân chu hetiang hi a ni:

Eden huanah chuan thei rah tuihnai tak taka khat thingkûng tam tak a awm a. Jehova chuan Adama leh Evi hnênah chûngte chu zalên takin an ei theih thu a hrilh a. Mahse, Pathianin ei lo tûra a hrilh thingkûng pakhat a awm a. An ei a nih chuan, an thi ngei ngei ang tih a hrilh a ni.—Genesis 2:9, 16, 17.

Ni khat chu, Evi amah chauhva a awm laiin rûlin a rawn bia a. Rûl tak takin a rawn bia a ni lo; rûl ṭawng anga lantîrtu chu Diabol-Setana a ni. Setana chuan Evi hnênah ei phal loh thei rah a ei a nih chuan Pathian ang a ni dâwn tih a hrilh a. Chu bâkah, a thi lo vang tih pawh a hrilh bawk. Chûng a thusawite chu dâwt vek a ni. Nimahsela, Evi chuan Setana thusawi chu âwihin, theirah chu a ei ta a. A hnuah, Adama pawh a pe a, ani pawhin a ei a ni.—Genesis 3:1-6.

Chu thilthleng aṭang chuan Setana chu hel hmang leh dawthei a ni tih kan hria a. Ani chuan Evi chu Pathian thu a âwih loh chuan a thi lo vang tih a hrilh bawk. Chu chu dâwt a ni. Evi chu a thi a, Adama pawh a thi a ni. Setana chuan thil sual a tih avângin ani chu a tâwpah tihboral ni dâwn mah se, tûnah rih chuan tih boral a la ni lo va. Tihborala a awm hmain, ani chuan mihringte chu kawng dik lovah a la hruai zêl a ni. Ani chu dawthei a la ni zawm zêl a, mihringte chu Pathian dânte bawhchhiattîr a la tum zêl a ni.—Johana 8:44.

A hnuah, vântirhkoh dangte pawhin thil sual an ti a. Chûng vântirhkohte chuan leia hmeichhe hmêl ṭha tak takte chu enin, anmahni nêna mipat hmeichhiatna hman an duh a. Chuvângin, leiah lo kalin, mipa taksa puin an insiam a. Tichuan, chûng hmeichhiate chu nupuiahte an nei ta hlawm a. Chu chu Pathian thiltum nêna inkalh a ni.—Genesis 6:1, 2; Juda 6.

Chu chuan mihringte tân buaina tam tak a thlen bawk. Chûng vântirhkoh nupuite chuan fate an hring a; mahse, naupang pângngai an ni lo. Anni chu mi lian, nunrâwng takte an ni. A tâwpah chuan, lei chu nunrâwngnaa a khat tâk avângin, Jehova chuan mi suaksualte chu tuilêta tihboral a tum ta a. Tuilêta dam khawchhuak awm chhun chu Nova leh a chhûngte chauh an ni.—Genesis 6:4, 11; 7:23.

Mahse, chûng vântirhkoh suaksualte chu thlarau khawvêlah an kîr leh a; an thi ve lo. Mahse, anni chu hremin an awm a. Pathian chhûngkua, vântirhkoh felte zînga an awm chu phal a ni tawh lo. Chu bâkah, Jehova chuan anni chu mihring taksaa awm a phal tawh lo bawk. A tâwpah, rorêlna niah chuan tihboral an ni ang.—2 Petera 2:4; Juda 6.

Kan kum zabi tîr lamah chuan, vânah indona a awm a. Bible-a Thu Puan bu chuan chu thilthleng chu heti hian a târ lang a ni: “Tin, vânah chuan indona a lo awm a; Mikaela [tholeh Isua Krista] leh a vântirhkoh [ṭha] te chuan drakon [Setana] chu an do va; drakon leh a tirhkohte pawh chuan an do ve a; nimahsela an hneh ta lo va, an hmun chu vânah a awm ta bawk hek lo. Tin, drakon lian pui, rûlpui tar Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a,” tiin.

A rah chhuah chu eng nge ni? Heti hian kan chhiar zawm a ni: “Chuvângin aw, vânte leh a chhûnga awmte u, lâwm rawh u!” tiin. Setana leh a tirhkohte chu vâna an lawm tawh loh avângin, vântirhkoh ṭhate chu an lâwm thei ta. A nih leh, leia mite chungchâng hi eng nge ni ve? Bible chuan: “Lei leh tuifinriat chung a pik e! Diabola chuan hun tlêm tê chauh a nei tih a inhriat avânga thinur êm êma in hnêna a lo chhuk tâk avângin,” tiin a sawi a ni.—Thu Puan 12:7-9, 12.

Ni e, Setana leh a tihkohte chuan leia mite chu hruai kawiin, an chungah chhiatna nasa tak an thlen a. Chûng thlarau sualte chu ramhuaite tia koh a ni a. Anni chu Pathian hmêlmate an ni. An zain an sual vek a ni.