ZAWHNA 9
Chanchhâwnna Ka Ring Tûr A Ni Em?
ENG NGE I TIH ANG?
He thilthleng hi han mitthla teh: Alex-a chuan a ngaihna a hre lo. Pathian a ringin, thilte hi ama siam a ni tih a ring reng ṭhîn a. Mahse, vawiin hian an biology zirtîrtu chuan science lama zir chianna chiang tak ṭanchhanin, chanchhâwnna hi thil dik a nih thu a sawi ta tlat mai a. Alex-a chuan mi â anga lan chu a duh lo va. ‘Tihah chuan, scientist-te mahin chanchhâwnna chu a dik nia an hriat chuan rinhlelhna siam tûrin tu nge maw ka nih le?’ tiin a inngaihtuah a ni.
Alex-a ni ta la, zirlaibuin thil dik tak anga a târ lan avâng maiin chanchhâwnna chu i pawm ang em?
INNGAIHTUAH CHIANG RAWH!
He mi chungchânga inhnialnaah lehlam lehlama mite chuan an thil rinte an rin nachhan hre chiang si lova sawi chhuah an hmanhmawh ṭhîn.
-
Mi ṭhenkhatin thilte hi Pathian siam a ni tih an rin nachhan chu kohhrana zirtîrna an dawn vâng a ni.
-
Mi ṭhenkhatin chanchhâwnna an rin nachhan chu school-a zirtîrna an dawn vâng a ni.
NGAIHTUAH TUR ZAWHNA PARUK
Bible chuan: “Chhûngkaw tin hi tu din emaw an ni vek a; engkim dintu chu Pathian a ni,” tiin a sawi. (Hebrai 3:4, C.L. Re-edited) Hei hi a rin tlâk em?
Nun hian Siamtu a nei lo tia sawi chu, he in hian satu a nei lo tia sawi ang a ni
SAWI DAN: Lei leh vâna thil awm rêng rêng hi nasa taka thil puak keh palh vânga lo awm a ni.
1. Tuin nge, a nih loh leh engin nge chu thil puak keh nasa tak chu thlentîr?
2. Eng nge pawm awm zâwk—thil engkim hi engmah lo aṭanga lo awm nge ni a, tuemaw hnên aṭanga lo awm zâwk?
SAWI DAN: Mihring hi ramsate aṭanga lo changchhâwng a ni.
3. Mihring hi ramsate aṭanga—entîr nân, zâwng lian chi aṭanga—lo changchhâwng a nih chuan engvângin nge finna lamah an inthlauh êm êm?
4. Nunna nei lo robot pakhat siam tûr pawhin finna neih a ngaih chuan, mihring sawi loh nunna nei cell pakhat tê pawh siam tûrin eng nge ngai ta ang?
SAWI DAN: Chanchhâwnna chuan a dikzia finfiahna a nei.
5. Chutianga sawitu chuan mahni ngeiin a finfiahnate chu a zir chiang tawh em?
6. Chanchhâwnna chu mifing zawng zawngin an ring tia hrilh an nih vânga ring mi eng zât nge awm?
“Ram hnuaia i kal laiin in mawi tak pakhat hmu ta la: ‘A va’n mak tak! Thingkûngte a hun tak leh kawng dik taka a tlûk avângin he in a lo piang a nih hi,’ tiin i ngaihtuah ang em? Ngaihtuah lo vang! Chu chu thil ni thei a ni si lo! Chuvângin, lei leh vâna thil engkim hi amaha lo awm mai a ni, an tih chu engvângin nge kan rin ang?”—Julia-i.
“Mi tuemaw chuan lehkha chhutna hmunpui hi a puak a, chutah bangah leh ceilling-a lehkhatui kai chiai chuaite chuan dictionary lian leh kim taka thute a siam ta a ni, tiin hrilh ta che se la. I âwih ang em?”—Gwen-i.
ENGAH NGE PATHIAN I RIN ANG?
Bible chuan “ngaihruat thiamna” hmang tûrin min fuih a. (Thufingte 3:21) Chuvângin, Pathian i rinna hi hêngah hian a innghat mai tûr a ni lo
-
RILRU VEI ZAWNG (Thiltihtheihna sâng zâwk a awm ka ring)
-
MI DANGTE THU NUNNA (Sakhaw mi takte vêngah ka chêng)
-
NAWRNA (Ka nu leh pate’n Pathian ring tûrin mi zirtîr—thlan tûr ka nei lo)
Chu aimah chuan, i rinna chuan chhan ṭha tak a nei tûr a ni.
“Class-ah zirtîrtuin kan taksa hna thawh dân a sawi ka ngaihthlâk chuan, ka rilruah Pathian a awm tih hi rinhlelhna chhe tê pawh ka nei lo. Taksa pêng tinte chuan chipchiar takin hnathawh an nei vek a, an hnathawh ṭhenkhat phei chu kan hriat lohvin an thawk a ni. Mihring taksa chu a va mak ropui êm!”—Teresa-i.
“In chhawng sâng tak te, lawng changkâng tak te, leh car-te ka han hmuh hian, ‘Hêng hi tu siam nge ni?’ tiin ka inzâwt ṭhîn. Entîr nân, car hi mi fingte siam a ni, a chhan chu tlân thei tûr chuan a part tê tak tê tête chuan hna an thawhho vek a ngai si a. Car hian siamtu a neih a ngaih chuan, keini mihringte pawhin siamtu kan nei tûr a ni.”—Richard-a.
“Science lam kan zir tam poh leh, chanchhâwnna hi a âwihawm lo telh telh a. . . . Ka tân chuan, Siamtu rin aia chanchhâwnna ring tûrin ‘rinna’ neih a ngai zâwk a ni.”—Anthony-a.
NGAIHTUAH TEH
Scientist-te chuan kum sâwmbi tam tak chhûng zir chianna an nei tawh chung pawhin, an vaia an pawm theih tûr chanchhâwnna hrilhfiahna an la nei thei lo. Mi thiam tak ni tûra kan ngaih scientist-te mah chanchhâwnna chungchânga an la inlungrual thei lo a nih chuan, chu thurin i ringhlel chu a sual dâwn em ni?
