He thilthleng hi han mitthla teh: Julia-i chu dârthlalanga a inen chuan, thau a inti hle a. A chhûngte leh a ṭhiante chuan a “chêr lutuk” tih an hrilh chung pawhin—“Ka intihchêr a ngai,” a ti tlat a ni.

Tûn hnaiah, Julia-i chuan “pound nga leka” a chêr belh nân a lutuka thil tih a tum a. A tih tûr chu ni engemaw ti chhûng chaw nghei a ni . . .

Julia-i ang i nih chuan, eng nge i tih ang?

I lan dân ngaih pawimawh chu thil sual a ni lo. Bible pawhin ahmei apate lan dân chungchâng a sawi a, chutah chuan Sari te, Rakili te, Abigaili te, Josefa te, leh Davida te an tel a ni. Bible chuan Abisagi chu “a hmêl a ṭha hle” tih a sawi.—1 Lalte 1:4.

Mahse, ṭhalai tam tak chuan an lan dân an âtchilh a. Chu chaun buaina lian tak a thlen thei a ni. Ngaihtuah teh:

• Zir chîkna pakhat chuan, hmeichhia zaa 58 vêlin thau lutuk niin an inhria a, mahse a thau tak tak chu zaa 17 chauh an nih thu a sawi.

• Zir chîkna dang leh chuan, rih dân pangngai aia rit lo hmeichhia zaa 45-te chu thau lutuk niin an inhria tih a târ lang!

• Chêr dân tûr an zawnna lamah ṭhalai ṭhenkhat chuan anorexia an tih mahni intihṭâmna tluka nunna atâna hlauhawm thei chaw ei mumal lohna an vei a ni.

 Anorexia leh chaw ei mumal lohna dang i nei nia a lan chuan ṭanpuina zawng rawh. Nu leh pate, a nih loh leh i mi rin puitling dang hnênah hrilhin ṭan ang che. Bible chuan: “Ṭhian chuan englai pawhin a hmangaih reng a, mangan nî atâna unauva piang a ni,” tiin a sawi.—Thufingte 17:17.

Dik tak chuan, mi duhawm tak kan nih leh nih loh chu kan chhûng lama kan nihnaah a innghat a ni. Lal  Davida fapa Absaloma hi han ngaihtuah teh. Bible chuan heti hian a sawi:

“Absaloma ang rênga hmêl ṭhata fak kai tumah an awm lo va. . . . Sawisêlna rêng rêng a awm lo va.”—2 Samuela 14:25.

Mahse, he tleirâwl hi chapona, tumsânna, leh rinawm lohnain a khat tlat mai! Chuvângin, Bible chuan Absaloma chu a sawimawi lo hle a, mi rinawm lo tak leh tualthah duhna thinlunga khat niin a sawi a ni.

Chhan ṭha tak neiin, Bible chuan hêng thurâwmte hi min pe a ni:

‘Mihring thar chuan inthuam rawh u.’—Kolossa 3:10.

‘In incheina chu pawn lam incheina ni lovin, thinlunga mihring thurûk chuan inthuam zâwk rawh u.’—1 Petera 3:3, 4.

Nalh duhna neih hi thil sual a nih loh rualin, i lan dân aia pawimawh zâwk chu i mizia hi a ni. Khua reiah chuan, fak tlâk miziate neihna chuan body sek emaw, pian nalh tak emawte aia duhawm zâwkah a siam ang che! Phylicia-i chuan: “Hmêlṭhatna chuan mite mit la nghâl mah se, chhûng lama nihna leh mize ṭha chu mite’n an hre reng zâwk ṭhîn,” tiin a sawi.

I lan dânah i lungawi lo fo ṭhîn em?

I ṭhat lohna lai siam ṭhat nâna inzai emaw, a lutuka in diet emaw chu i rilrûk ngai em?

I lan dân hi tidanglam thei ta la, eng nge i tihdanglam ang? (I chhânna rîn bial rawh.)

• SAN LAM

• RIH LAM

• SAM

• PIAN

• HMEL

• VUN RAWNG

A hmasa ber zawhna pahnihte “Aw” tia i chhân a, zawhna pathumna atâna pathum aia tam i rîn bial a nih chuan, hei hi ngaihtuah rawh: Mahni i inhmuh ṭhat loh angin, mi dangte’n an hmu kher lo vang che, tih hi. A lutuka mahni lan dân lungkham chu a awlsam hle a ni. —1 Samuela 16:7.