He thilthleng hi han mitthla teh: Tim-a chuan a ṭhiante nêna an infiamnaah ball-in ṭhenawmte tukverh a vawm keh a.

Tim-a ni ta la, eng nge i tih ang?

DUH THLAN TUR PATHUM I NEI:

1. Tlân chhiat.

2. Mi dang mawhpuh.

3. Ṭhenawmte chu thil awm dân hrilh a, a man chawisak tum.

Duh Thlan Tûr A thlan chu i duh mai thei. Mahse, tukverh tihkeh emaw, thil dang tihchhiat emaw pawh ni se, i thil tihsual inpuan chu a ṭha ber fo a ni.

1. Inpuan hi tih tûr dik tak a ni.

   Bible chuan: “Rinawmna ṭha zawng zawng tilang . . . rawh,” tiin a sawi.—Tita 2:9, 10.

2. Mite chuan mahni thil tihsual inpuangte an ngaidam duh zâwk ṭhîn.

   Bible chuan: “Bawhchhiatna zêptute chu an hmuingîl lo vang a, zêp lova inpuanga hawisantute chuan zahngaihna an hmu ang,” tiin a sawi.—Thufingte 28:13.

3. A pawimawh berah chuan Pathian a tilâwm a ni.

   Bible chuan: “Mi kawhmawh chu LALPA ngaihin tenawm an ni si a; mi ṭha famkim erawh chu a ṭhian an ni,” tiin a sawi.—Thufingte 3:32.

Kum 20 mi Karina-i chuan motor a khalh chak tih hriattîrna lehkha a dawn thu a pa lakah a thup tlat a. Mahse, kumkhuain a thup thei lo. Karina-i chuan heti hian a sawi zawm a ni: “Kum khat vêl a liam hnu chuan, ka pa chuan ka hminga hriattîrna lehkha ka dawn chu a hre ta a. Buaina ka tâwk chiang ngei mai!” tiin.

Eng nge a zir? Karina-i chuan: “Thil tihsual thupna chuan dinhmun a tichhe zual mai mai. A hnuah kan tuar leh tho ṭhîn!” tiin a sawi.

Bible chuan: “Kan zain thil tam tak kan tisual fo ṭhîn,” tiin a sawi a. (Jakoba 3:2) Kan hriat tawh angin, i thil tihsual inpuan nghâl chu inngaihtlâwmna leh puitlinna târ langtu a ni.

A dawt chu, i thil tihsual aṭanga inzir hi a ni a. Vera-i chuan: “Ka thil tihsualte chu inzirna thiltawn anga thlîr ka tum a, chu chu mi ṭha zâwk ni tûr leh dinhmun dang ka tawh leh huna kawng ṭha zâwka chingfel thei tûra min ṭanpuitu ka nihtîr a ni,” tiin a sawi. Chutianga i tih theih dân tûr chu i lo en ang u.

I pa bike i hawh a, i tihchhiatsak a. Eng nge i tih tâk ang?

• Engmah sawi lova awmin, i pa paw’n a hriat loh i beisei ang.

• I pa hnênah thil thlen dân dik tak i hrilh ang.

• I pa hnênah thil thlen dân chu i hrilh ang a; mahse, mi dang i mawhpuh ang.

Lehkha i zir ṭhat loh avângin exam-ah i fail a. Eng nge i tih tâk ang?

• Zawhnate a khirh lutuk vâng niin i sawi ang.

• I fail chhan chu i thiam loh vâng tih i pawm ang.

• Zirtîrtuin i chunga lungnih lohna a neih vâng niin i sawi ang.

 Tûnah, thilthleng hmasate kha han ngaihtuah leh la, (1) i pa angah leh (2) zirtîrtu angah han inchan teh. I thil tihsual i inpuan nghâl chuan i pa leh zirtîrtu chuan engtin nge an ngaih ang che? I thup erawh chuan engtin nge an ngaih ang che?

Tûnah chuan, ni kum chhûnga i thil tihsual pakhat ngaihtuah lêtin hêng zawhnate hi chhâng rawh.

Eng nge i tihsual? Chu chu engtin nge i chinfel?

• Ka thup bo.

• Mi dang ka mawhpuh.

• Ka inpuang nghâl.

I thil tihsual i inpuang lo a nih chuan, a hnuah engtin nge i awm?

• A ṭha lutuk—Ka fihlîm ta!

• Ka inthiam lo—thu dik hrilh tûr ka ni asin le.

Engtin nge chu dinhmun chu ṭha lehzuala i chinfel theih ang?

I thil tihsualte aṭangin eng nge i zir chhuah?

Engvângin nge mi ṭhenkhat chuan an thil tihsualte chu an zêp tlat?

I thil tihsualte thup zêl i tum chuan mite’n engtin nge an ngaih ang che a, mahse i inpuan erawh chuan engtin nge an ngaih ang che?—Luka 16:10.