ZAWHNA 8
Pâwngsual Chungchângah Eng Nge Ka Hriat Ngai?
ENG NGE I TIH ANG?
Annette-i chuan thil awm dân a hriat hmain, amah rawn khawihtu chuan leiah a nam thlû der tawh a. Heti hian a sawi a ni: “Theih tâwp chhuahin ka bei lêt a. Au chhuah vak ka’n tum a; mahse, ka aw a chhuak thei lo. Ka nam a, ka pêt a, ka chûm vak vak a, ka ham chiam bawk a. Chutih lai tak chuan, chemin min vit a, ka zawi thla ta der a ni,” tiin.
He dihmun ang hi tâwk ve ta la, engtin nge i tih ang?
INNGAIHTUAH CHIANG RAWH!
Zâna i kal chhuah huna harhvâng taka awmin i inrâlring pawh a ni thei a; mahse, thil ṭha lote chu a thleng thei tho a ni. Bible chuan: “Mi chak chu a hlawhling chuang lo va, . . . mi themthiamin duhsak an hlawh chuang hek lo, mi zawng zawng chungah hun leh khawrêl ang angin a thleng mai zâwk tih ka hmu a,” tiin a sawi.—Thuhriltu 9:11.
Ṭhalai ṭhenkhatte chuan Annette-i angin hmêlhriat ngai lohte pâwngsual an tâwk a. Mi dangte chu an mi hriat chian emaw, an chhûngkaw zînga mite emawin an sual hial a ni. Kum sâwm mi lêk Natalie-i chu an ṭhenawma awm tleirâwl pakhat chuan sex lamah a khawih chingpen a. Heti hian a sawi: “Ka hlauh lutuk leh ka zah êm avângin atîrah chuan tumah ka hrilh ngam lo,” tiin.
DEM RUAL I NI LO
Annette-i chuan a chunga thilthleng avângin inthiam lohna a la nei reng a. Heti hian a sawi a ni: “Kha mi zâna thilthleng kha theih nghilh ka tum pawhin ka theih nghilh thei lo. Kha ai khân lo bei lêt nasa ila aw, te ka ti ṭhîn. Chema min vih hnu chuan ka hlauh lutuk vângin ka zawi tlat a. Eng mah ka ti thei tawh lo; mahse, lo ti lêt tûr ka ni asin le, ka ti vawng vawng ṭhîn,” tiin.
Natalie-i pawhin chutiang inthiam lohna chu a nei reng a. Heti hian a sawi a ni: “Lo ring lutuk tûr ka ni lo asin. Ka nu leh pate chuan pâwna kan infiam hian, ka u nêna awm dûn reng tûrin min ti a; mahse, an thu ka âwih lo. Chuvângin ka ṭhen awmpa chu min tina tûrin hun ṭha ka pe hi a ni ringawt mai. Chu thilthleng avângin ka chhûngte rilru a na hle a, an rilru tinatu niin ka inhre tlat. Chu chu ka tuar ber a ni,” tiin.
Annette-i leh Natalie-i te anga inthiam lohna nei i nih chuan, pâwngsual tâwktu chu duhrêng vânga nungchang bawlhhlawhnaa tel a ni lo tih hi hre reng rawh. Mi ṭhenkhat chuan pâwlsual chungchâng chu sawi nêpin, mipate tih ṭhin dân pângngai a ni a, a hmeichhiate rem tihna vânga thleng angah an sawi hial a ni. Mahse, phu rêng vânga pâwngsualna râpthlâk tak tâwk tumah an awm lo. Chutiang thil râpthlâk tak i tâwk a nih chuan, dem rual i ni lo!
Mahse, “dem rual i ni lo,” tih sawi chu a awl a; rin thlap erawh a harsa mai thei. Ṭhenkhat chuan an chunga thilthleng chu hre rengin, mahni inthiam lohna leh rilru natna thil dangte chu an nei reng a. Mahse, ngawih reng chu tuin nge ṭhatpui ber ang—nangmah nge, pâwngsualtu zâwkin? Duh thlan tûr dang ngaihtuah chu i phû a ni.
I THILTAWN CHU SAWI CHHUAK RAWH
Bible chuan mi fel Joba’n hrehawm tâwp khâwk a tawrh laiin: “Rilru na êm êm chungin ka ṭawng dâwn hi,” tia a sawi thu min hrilh a. (Joba 10:1) Chutianga i sawi chhuah chu i hlâwkpui ve ngei a rinawm. I mi rin tak hnêna i thiltawn chungchâng hrilhna chuan thil awm dân pawm thiam tûr leh i rilru pik lutuk chhâwk tûrin a ṭanpui thei che a ni.
Tawrh theih loh khawpin i rilru a hah pawh a ni thei a. Chu mi chungchâng chu tuemaw sawipuiin, engah nge ṭanpuina i lâk loh vang?
Annette-i chuan chu mi dikzia a hria a. Heti hian a sawi a ni: “Ka ṭhian kawmngeih tak hnênah ka hrilh a, anni chuan kan kohhrana Kristian upate hrilh tûrin min fuih a. Ka hrilh ta chu ka lâwm khawp mai. Vawi tam tak min ṭhutpuiin, ka hriat ngai tak thu chu min hrilh a ni—he thilthlengah hian thiam lohna pakhat mah ka nei lo, tih hi,” tiin.
Natalie-i chuan a nu leh pate hnênah a thiltawn chu a hrilh a. Heti hian a sawi: “Anni chuan min ṭanpui nasa hle a. Chu mi chungchâng sawi chhuak tûrin min fuih a; chutianga sawi chhuahna chuan lungngai lutuk lo tûr leh thinur lutuk lo tûrin min ṭanpui a ni,” tiin.
Natalie-i chuan ṭawngṭaina aṭangin thlamuanna a hmu bawk. Ani chuan heti hian a sawi: “Tu hnênah mah ka sawi ngam loh hunahte chuan Pathian hnêna hrilhna chuan min ṭanpui a ni,” tiin. Ka ṭawngṭai hian, zêp nei lovin ka sawi thei a. Chu chuan rilrua thlamuanna dik tak min pe a ni.”
Nang paw’n “tihdam hun” a awm tih i hria ang. (Thuhriltu 3:3) I tisa lam leh rilru lamah inenkawl ṭha la. A ṭûl angin châwl hahdam rawh. A pawimawh ber chu, thlamuanna zawng zawng Pathian, Jehova rinchhan hi a ni.—2 Korinth 1:3, 4.
NAGIH ZAWNG NEI RUAL I NIH CHUAN
Nula i nih a, nungchang thianhlim lohna thil ti tûra nâwr i nih chuan, “Heti hian min ti suh!” a nih loh leh, “I kut la sawn nghâl rawh!” tia khauh taka sawi chu a ṭha a ni. I bialpa chân i hlauh avângin sawi lovin awm suh. Hetiang thil avânga a ṭhen che a nih chuan, neih reng tlâk a ni lo tihna a ni mai! I taksa leh i nunpui tehnate zahsaktu che mipa tak neih chu i phû a ni.
SEX LAMA INZAR BUAINA CHUNGCHANGA ZAWHNA
“Middle school ka kalin, mipate chuan ka bra hnung lam min pawhsak pahin hmuhsitna thu ṭha lo tak tak an sawi ṭhîn a—chutianga min tih aiin vawi khat sex hmanpui ka thlang zâwk fê.”—Coretta-i.
Engtin nge i ngaih? Hêng mipate hian . . .
-
An fiam
-
An chhai der
-
Sex lamah an zar buai
“Bus ka chuan laiin, mipa pakhain mi rawn vuan thutin thu tenawm tak tak a rawn sawi a. A kut ka phihthlâksak a, kal sawn tûrin ka hrilh a. Mi a enin min la en zui lehnghâl.”—Candice-i.
Candice-i chunga chu pa thiltih chu engtin nge i ngaih?
-
A fiam
-
A chhai der
-
Sex lamah a zar buai
“Ni kum khân, mipa pakhat chuan ka duh loh thu ka hrilh reng chung pawhin, mi duh thu leh inkawp a duh thu min hrilh châmchî a. A châng chuan, ka bân a rawn zût a. Ti lo tûra ka sawi pawhin a theih loh. Chutah, ka pheikhawk hrui ka suih laiin, ka mawngtamah a rawn bêng a.”—Bethany-i.
I ngaih dânah, he mipa hian eng nge a tih?
-
A fiam
-
A chhai der
-
Sex lamah a zar buai
A pathum hian a chhânna dik chu C hi a ni.
Sex lama inzar buaina chu fiamna leh chhai derna lakah engtin nge a danglam?
Sex lama inzar buaina chu lehlam rem tihna tel lo a ni a. Ti tawh lo tûra hrilh a ni chung pawhin a ti reng tho a ni.
Hetiang inzar buaina hi thil pawi tak a ni a. Pâwngsualna a thlen thei a ni.