Inneihnaa thawhhona a awm hian, nupate chu thlawhna pakhata a khalhtu leh a ṭanpuitu ang an ni a. Harsatnate a lo awm hunah pawh nupate chuan “ka” tih aiah “kan” tih ṭawngkamte an hmang a ni.

BIBLE THU BUL: “Pahnih an ni tawh lo va, tisa pum khat an ni tawh zâwk a ni.”—Matthaia 19:6.

“Inneihna hi mi pakhat chauhva hma lâk theih a ni lo. Inneihna hlawhtling tûr chuan nupaa an thawh dun a ngai.”—Christopher-a.

Inhmuh thiam lohna a lo awm hian thawhhona nei lo nupate chuan an buaina chinfel tum aiin, a thiam lo zâwkah an inpuh tawn ṭhîn a. Buaina ho tê chu buaina lian tak a rawn ni ta ṭhîn a ni.

“Inneihnaah chuan thawhhona hi a pawimawh hle a. Ka pasal nên hian thawhhona nei lo ila chuan, nupa ang ni lovin, thu tlûkna pawimawh siam a ngaih huna thu inhmu thei lo, mi hrang in khata chêng ang kan ni ang.”—Alexandra-i.

MAHNI INFIAH RAWH

• Ka sum thawh chhuahte chu “ka ta bîk” angin ka ngai em?

• Ka kawppui bula ka awm loh hian hahdam zâwk niin ka inhria em?

• Ka kawppui leh a chhûngte chu inpawh tak an nih laiin, kei chuan ka nêl vak lo vem?

I KAWPPUI NEN SAWI DUN RAWH U

• Eng kawngahte hian nge nupa anga thawhhona ṭha kan neih?

• Eng kawngahte hian nge hma sâwn kan ngaih?

• Thawhho duhna nei lehzual tûrin engte nge kan tih theih?

THURAWNTE

• I kawppui chu infiamnaa i khingpui anga thlîr lovin, team khata in ṭan dun theih nâna i tih theih thil pawimawhte chu ngaihtuah zâwk rawh.

• ‘Engtin nge ka chak theih ang?’ tia ngaihtuah lovin, ‘Engtin nge kan chak theih ang?’ tiin ngaihtuah zâwk rawh.

“A tidiktu leh tidik lotu chu a pawimawh ber lo. A pawimawh zâwk chu in inneihnaa remna leh inpumkhatna a awm hi a ni.”—Ethan-a.

BIBLE THU BUL: “Mahni ta ta mai en lovin, mi dang ta pawh en ṭheuh zâwk rawh u.”—Philippi 2:3, 4.