ZIRLAI 1
Insûmtheihna Hlâwknate
INSUMTHEIHNA CHU ENG NGE NI?
Insûmtheihnaah chuan hêng mize ṭhate a tel a ni
nghah dân thiamna
rilru hmanhmawh thununna
thil tih tûr nuam lo tak hlenchhuahna
mi dangte ngaih pawimawh zâwkna
ENGVANGIN NGE INSUMTHEIHNA HI A PAWIMAWH?
Insûmtheihna nei naupangte chuan thlêmna te, do hneh harsa khawp thlêmnate pawh a hnâwl thei a ni. Chumi nêna inkalhin, insûmtheihna tlachham naupangte chu hetiang hi an ni duh zâwk mah ṭhîn.
thinrim hma tak an ni ṭhîn
lunghnual hma tak an ni ṭhîn
meizial, zû leh ruihhlo hmang an ni ṭhîn
ei theih hrisêl lo takte an ei ṭhîn
Zir chianna pakhat chuan insûmtheihna nei naupangte chu an lo upat chhohvin hrisêl lohna leh sum leh pai harsatnate an nei tlêm zâwkin, dân zâwmtute an ni tlângpui tih a târ lang. Chu zir chianna avângin, University of Pennsylvania-a Professor Angela Duckworth-a chuan hetiang hian thu tâwp a siam a ni: “‘A lutuka insûmtheihna’ tih a awm thei ngai lo,” tiin.
INSUMTHEIHNA NEI TURA ZIRTIR DAN
Hnâwl dân thiam tûrin zir rawh.
BIBLE THU BUL: “In thu sawi chu ‘a ni’ chu ni, ‘ni lo’ chu ni lo ngawt rawh se.”—Matthaia 5:37.
Naupangte chuan mi dangte hmaah sual thawhin an nu leh pate rilru chu an chhin mai thei a. Nu leh pate an tlâwm mai chuan, naupang chuan thil engemaw a duh hunah, chutiang chuan sual an chhuah ṭhîn ang.
Kawng leh lamah chuan, nu leh pate’n an hnâwl a, an pawm duh loh tlat chuan, naupang chuan nunna thu dik bulpui chu an zir a ni ang, chu chu kan thil duh apiang kan nei reng thei lo, tih chu. Dr. David Walsh-a chuan: “A nihna takah chuan, insûmtheihna neite chu mi hlim thei takte an ni zâwk a. “Naupangte chu an duh ang apiang nei reng thei nia inngaihna neia enkawl seilen chu a finthlâk loh hle,” tiin a ziak a ni. a
I fate thil ngen apiang tihhlawhtlinsak lohna chuan nakin hnu zêlah pawh anmahniah insûmtheihna—entîr nân, ruihhlo tihchhin te, inneih hmaa mipat hmeichhiatna hman te, a nih loh leh chîn dân ṭha lo thil engemaw tihna lama thlêmna an tawh hunah insumtheihna nei tûrin a ṭanpui ang.
I fate chu a sawhkhâwkte, a ṭha leh ṭha lote hre thiam tûrin ṭanpui rawh.
BIBLE THU BUL: “Miin a theh apiang, chu mi vêk chu a seng bawk dâwn si a.”—Galatia 6:7.
I fate chuan thiltihin sawhkhâwkte a neih avângin, insûmtheih lohnain sawhkhâwk ṭha lo tak a nei tih an hriatthiam a ngai a. Entîr nân, i fa chu a lungnih loh huna a thinûr nghâl mai a nih chuan, mi dangte chuan an kâwm duh lo thei a. Kawng leh lamah chuan, tihthinrima a awm hun pawha insûmtheihna a lantîr a nih chuan,—a nih loh leh, inrawlh mai lo va, dawhthei taka a nghâk a nih chuan—mite chuan a bula awm nuam an ti lehzual ang. I fa chu insûmtheihna a lantîr a nih chuan rah ṭhate a seng ngei a rinawm thu hre thiam tûrin ṭanpui rawh.
Thil pawimawh zâwkte hre thiam tûrin i fate chu zirtîr rawh.
BIBLE THU BUL: “Thil pawimawh zâwkte chu fian ṭhîn rawh u.”—Philippi 1:10, New World Translation.
Insûmtheihna chu thil sual tih lohna mai a ni lo; chu aiin, chutah chuan thil tih nuam lo tak pawh nise, tih ngai a nih huna tihna a tel a ni. I fate tân thil pawimawh zâwkte dah hmasak leh tih hmasak dân zir chu a pawimawh hle. I fate chuan thil pawimawhte chu an ti hmasa ṭhîn em. Entîr nân, intihhlimna aiin homework tih hmasak ang chi chu.
Entawn tûr ṭha ni rawh.
BIBLE THU BUL: “In chunga ka tih ang hian nangni pawhin in tih vena tûrin ka tihhmuh che u a ni si a.”—Johana 13:15.
I fate chuan dinhmun dinhmun duhawm lo tak emaw, ṭha lo tak emaw i chhân lêt dân chu an hmu ang a. Insûmtheihna chuan rah ṭha zâwk a chhuah ṭhîn tih i entawn tûr siamin lantîr rawh. Entîr nân, i fate’n dawhtheihna i neih leh neih loh an fiah che hunah, thinrim takin i chhâng lêt nge ni a, zaidam takin?
a No: Why Kids—of All Ages—Need to Hear It and Ways Parents Can Say It, tih lehkhabu aṭanga lâk chhuak a ni.