ZIRLAI 5
Puitlingte Kaihruaina Pêk Hlutna
PUITLINGTE KAIHHRUAINAAH CHUAN ENGTE NGE TEL?
Naupangte chuan nuna kaihhruaina leh thurâwn pe theitu puitlingte an mamawh a. Nu leh pa in nih angin, in fate tân kaihhruaina leh thurâwn petu ṭha ber in ni a. Mahse, puitling dangte pawhin in fate chu kaihruaina leh thurâwnte pein an ṭanpui thei a ni.
ENGVANGIN NGE PUITLINGTE KAIHHRUAINA CHU A PAWIMAWH?
Ram tam takah ṭhalaite chuan puitlingte nêna inzawm tawnna an nei mang meuh tawh lo. Hei hi han ngaihtuah teh:
Naupangte chuan nî tin hian an nun chu school-ah a hmang tam zâwk a, chutah chuan zirtîrtute aiin school naupang an tam zâwk a ni.
Naupang ṭhenkhat chu school bâna ina an hawn hian an nu leh pate chu hna an thawh avângin inah an awm lo a ni.
Zir chianna pakhat chuan Unite States-ah chuan kum 8 aṭanga kum 12 inkâr naupangte chuan nî tin chawhrualin, media hmanga intihhlimnaah dârkâr ruk vêl an hmang tih a sawi. a
Hold On to Your Kids tih lehkhabu chuan “Ṭhalaite chuan kaihruaina te, thununnate chu nu leh pate, zirtîrtute leh mi dang mawhphurhna la thei puitlingte hnên aṭangin an la duh lo va, . . . An rualpui ṭhiante hnên aṭangin a la a ni,” tiin a sawi.
KAIHHRUAINA PEK DAN
I fate nên hun hmang rawh.
BIBLE THU BUL: “Naupang chu a kalna âwm kawngah chuan zirtîr ula, a upat hun pawhin a thlah lo vang.”—Thufingte 22:6.
Naupangte chuan an nu leh pate kaihruaina pêk chu an duh tlângpui a. Dik tak chuan, mi thiamte chuan naupangte chu an rawn tleirâwl chhoh hian rualpuite aiin nu leh pate thurâwn pêk chu an ngai hlu zâwk a. “Nu leh pate chuan an fate tleirâwl chhuah ṭan hunah leh puitling ṭan huna an rilru put hmang leh chêt dân chu an la thunun reng thei tih an hre reng tûr a ni,” tiin Dr. Laurence Steinberg chuan You and Your Adolescent tih lehkhabuah a ziak a. Ani chuan: “An rawn tleirâwl chhuah hian i thusawite an pawm duh ṭhîn lo a nih pawhin, i ngaih dân leh i thusawite ngaihthlâk chu an duh ṭhîn,” tiin a sawi belh bawk.
I fate chuan i kaihhruai a duh avângin chu chu hmang ṭangkai ang che. Anni chu hun hmanpui la, i thil thlîr dân te, i thil ngaihhlut zâwng te, leh i thiltawnte chu hrilh ang che.
Zirtîrtu ṭha tak ngaihtuahsak rawh.
BIBLE THU BUL: “Mi fing pâwl la, i lo fing ang.”—Thufingte 13:20.
I fa tleirâwlte tân ṭha taka anmahni thunun theitu puitling pakhat i naihtuahsak thei em? Engvângin nge chu pa emaw, nu emaw nêna hun hmang dûn tûra i ruahman lo vang? Chu chu mi dangin i fa tân mawhphurhna a la ang tihna a ni lo. Mahse, rinchhan tlâk puitling nia i mi hriatte hnên aṭanga fuihna chuan i fa chu tichhe lo vang a, i zirtîrnaah a ṭanpui zâwk ang. Bible-ah chuan, Timothea’n a puitling hnu khân, tirhkoh Paula nêna an inkawmna chu nasa takin a hlâwkpui a, Paula pawhin chu an inkhawmna chu a hlâwkpui a ni.—Philippi 2:20, 22.
Kum zabi kalta chhûng khân, chhûngkaw tam tak chu an pi leh pu te, an nî te, an chhûngkat lainate nên awm khâwm thei tawh lovin, khawvêl hmun dang daihah an awm a. Chutiang dinhmuna i awm a nih chuan, i fa tleirâwlte neih tûr atâna i duh nungchang neitu puitlingte hnên aṭanga inzirna hun remchâng nei tûrin i fate chu ruahmanna siamsak ang che.
a Tleirâwlte chuan media hmanga intihhlimnaah chawlhrualin ni khatah dârkâr kua dâwn lai hun an hmang tih hmuh a ni. Chumi hun chhûng chuan ṭhalai leh tleirâwlte’n school-a online an hmanna hunte leh homework an tihna hunte a tel lo a ni.