“Sophia-i * nêna kum 39 chuang kan inneihna hnu chuan rei tak dam lovin min borâlsan a. Ṭhiante hnên aṭangin ṭanpuina tam tak ka dawng a, hun awl nei lovin ka insiam a. Mahse, kum khat chhûng chu ka sûn hle a ni. Ka rilru hi a inthlâk reng a, thunun theih châng leh theih loh châng ka nei a. Tûnah, a thihna kum thum dâwn lai ni tawh mah se, rilruah na tih hle châng ka nei leh thut ṭhîn.”—Kostas-a.

Thihnaah hmangaih tak i chân ngai tawh em? Chutiang a nih chuan Kostas-a angin i tuar ve thei a ni. Kawppuite, chhûngte, a nih loh leh ṭhiante thihna anga rilru nat leh tawrh hrehawm hi a awm thei meuh lo. Lusûn tawrh hrehawm dân chungchâng zir chîk mite pawhin lusûn hrehawmzia chu an pawm a. The American Journal of Psychiatry-a thuziak pakhat chuan “thihna chu chânna tâwp khâwk leh râpawm ber a ni,” tiin a sawi. Chutiang chânna râpthlâk tak, lungngaihna hmachhawntu chuan: ‘Eng anga rei nge chutianga ka tawrh dâwn? Hlimna ka nei leh thei ngai ang em? Engtin nge hrehawm tawrhna hi ka tihziaawm theih?’ tiin a ngaihtuah mai thei.

Hêng zawhnate chhânna hi he Awake! thuziakah hian sawiho a ni ang a. A dawta thuziakah chuan tûn hnai maia lusûn hlim i nih chuan i beisei theihte sawiho a ni bawk ang. He thuziak inzawmte chuan i lungngaihna tihnêp theih dân kawngte a târ lang ang.

Lusûn avânga hrehawm tuar apiangte tân thlamuanna leh ṭanpuina ṭangkai tak a nih kan beisei tak zet.