Ṭanpuitu Zawng Rawh
Ṭanpuitu Zawng Rawh
“Amah maia awm kha chu miin hneh thei mah sela, pahnih chuan an lo dodâl zo dâwn a ni.”—Thuhriltu 4:12.
KAN hmêlma chu tu pawh ni se, a nih loh leh khawi hmunah pawh hmêlma chu do mah ila, mi dangte ṭanpuina kan dawn chuan hlawhtlin theihna hun remchâng ṭha tak kan nei a ni. Chuvângin, zial nghei i duh chuan i chhûngte leh ṭhiante ṭanpuina, a nih loh leh ṭanpui tak zettu tûr che leh dawhtheitu tûr che tu emaw zawn chu a finthlâk thei a ni.
Mahnia zial zûk bânsan theitute chu hriat tum la, anni chuan an khawngaih lehzual thei che mai bâkah, an ṭanpui thei bawk che a ni. Denmark rama Kristian pakhat Torben-a chuan “Mi dangte ṭanpuina chu ka tân hlu tak a ni,” tiin a sawi. India rama Abraham-a chuan: “Ka chhûngte leh Kristian unaute lantîr hmangaihna dik tak chuan zial nghei tûrin min ṭanpui a ni,” tiin a ziak a. Mahse, a châng chuan chhûngte leh ṭhiante ṭanpuina chu a tâwk ṭhîn lo.
Bhagwandas-a chuan “Meizial ka zûkna chu kum 27 lai a ni tawh a; mahse, Bible-in thil chîn thianghlim lote chungchâng a sawite ka hriat avângin zial nghei ka tum ta a. Zûk tlêm ka tum a. Ka ṭhian kawmte ka thlâk a. Mi puitlingte min fuihna pawh ka pawm a. Mahse, ka nghei thei chuang lo. A tâwpah, zan khat chu Pathian Jehova hnênah ka thinlung leihbuain, zial nghei thei tûra min ṭanpui tûrin ka ṭawngṭai a. A hnuah ka hlawhtling thei ta!” tiin a sawi.
Thil pawimawh dang tih tûr chu i hmachawn tûr harsatnate chinfel nân inbuatsaih rawh. Chûngte chu eng nge ni? A dawta thuziak chuan a târ lang ang.
[Bâwm]
DAMDAWI I HMANG ANG EM?
Nicotine ai awha siam damdawi ang chi, meizial zûk bânsan duhte ṭanpuitu damdawite siam chhuahna chu dollar maktaduai tam tak sênga din a ni a. Damdawi hman i tum a nih chuan i hman hmain a hnuaia zawhnate hi ngaihtuah ang che:
A hlâwknate chu eng nge ni? Inenkawl dân tam tak chu zial nghei vânga lo chhuak natnate a tihtlêm avângin zûk bânsan theihna chhan a tam nia sawi a ni. Mahse, chûng damdawite chuan rei a daih leh daih loh chungchângah inhnialna ṭhenkhat a awm a ni.
A hlauhawmnate chu eng nge ni? Damdawi ṭhenkhat chuan luak chhuahna te, lunghnualna te, leh mahni intihhlum duhnate ang chi nghawng ṭha lo tak a nei a. Nicotine ai awha enkawlnate chu ruihlo danga thlâk mai a nih vângin hrisêlna atân a hlauhawm hle tih hria ang che. Dik tak chuan, chûng damdawi hmangtute chu ruihlo ngaiin an la awm reng a ni.
Eng duhthlan tûr dang nge awm? Enchhinna pakhatah chuan hlawhtling taka zial zûk bânsantu zaa 88 chu damdawi inenkawlna awm lovin, rei lo te chhûngin an bânsan thei tih a sawi a ni.