Duhna Nei Lehzual Rawh
Duhna Nei Lehzual Rawh
“Meizial zûk bânsan tûra intiamna nghet tak neih chu hlawhtling taka zial zûk bânsantute mizia pawimawh tak zînga pakhat a ni.”—“Tûnah Zial Zûk Bânsan Rawh!”
AWLSAM zâwnga sawi chuan, meizial zûk bânsan i duh chuan, a lo berah bânsan duhna i neih nasat hle a ngai a. Engtin nge nasa lehzuala bânsan duhna i neih theih? Pakhatnaah, meizial zûk i bânsan avânga i tâna a ṭhat dânte chu ngaihtuah ang che.
Pawisa i khâwl thei ang. Ni khatah meizial bâwm khat zu ṭhîn tân chuan kum khat chhûngin chêng sâng tam tak a ral thei a. “Vaihlo man atâna ka hman ral zât hi ka hre ngai lo.”—Gyanu-i, Nepal.
Nunah i hlim lehzual ang. “Meizial zûk ka bânsan chuan nun dân thar ṭan ang mai niin, ka ṭha chhoh telh telh a.” (Regina-i, South Africa) Mite chuan meizial zûk an bânsan hian, tui an hriat theihna te, rim an hriat theihnate chu nasa takin hma a sâwn a, tha leh zung an nei lehzualin, an hmêl lan dân pawh a ṭha lehzual a ni.
I hrisêlnain hma a sâwn thei a ni. “Meizial zûk bânsanna chu hmeichhia leh mipa, a pui a pangte chuan hrisêlna lamah nasa takin an hlâwkpui a ni.”—The U.S. Centers for Disease Control and Prevention.
Inrintâwkna i nei chhoh vang. “Vaihlovin min thunun ka duh loh avângin zial ka nghei a. Mahni taksa thununtu nih ka duh ka ni.”—Henning-a, Denmark.
I chhûngte leh ṭhiante’n an hlâwkpui ang. “Zial zûkna chuan . . . i bul hnaia awmte hrisêlna a khawih pawi thei a. . . . Zir chîk mite chuan kum tina cancer natna leh chuap natna avânga boral, mi sâng tam tak chu zial zu ve si lo va, mi pak khu chhuah hîpte an ni tih an târ lang a ni.”—American Cancer Society.
Siamtu i tilâwm ang. “Duh takte u, . . . tisa leh thlarau bawlhhlawhna zawng zawngah i intifai ang u.” (2 Korinth 7:1) ‘Thianghlim leh Pathian lawm tlâk ni tûrin in taksa chu hlân rawh u.’—Rom 12:1.
“Pathianin taksa tibawlhhlawhtu thilte a pawm lo tih ka hriat chuan zial zûk bânsan ka tum ta a ni.”—Sylvia-i, Spain.
Mahse, duhna neih mai chu a tâwk lo fo ṭhîn. Chhûngte leh ṭhiante pawh telin, mi dangte ṭanpuina kan mamawh bawk. Anni chuan eng nge an tih theih?