I ṭobul min hrilh thei ang em?

Kum 1979-ah United States-ah ka piang a. Kum thum mi ka nihin ka nu leh pa chu an inṭhen a. Ka nu chuan Juda hnam dân anga mi enkawl seilianin, yeshivas tia koh Juda school-ah min dah a. Kum sarih mi ka nih chuan Israel ramah insawnin, kum khat kan awm a, kibbutz tia koh Juda vântlâng school-ah ka kal a. A hnuah ka nu nên chuan Mexico-ah kan insawn leh a ni.

Kan awmna chhehvêlah chuan inkhâwmna in awm lo mah se, Juda hnam nun phung chu ka la vawng tlat a. Sabbath nîah mombati ka chhi a, Torah Bible ka chhiar a, siddur, a nih loh leh ṭawngṭai lehkhabu chu enin ka ṭawngṭai a. Ka school kalpuite hnênah ka sakhua chu sakhaw lo chhuak hmasa ber a nih thu ka hrilh ṭhîn a. Isua rawngbâwlna leh zirtîrna chungchâng ziak bîkna Thuthlung Thar tia koh ṭhin hi ka chhiar ngai lo va. Dik tak chuan, ka nu chuan a chhûnga thu inziakte leh zirtîrnate chuan ka rinna a tihbuai a hlauh avângin chhiar a phal lo a ni.

Engvângin nge Thuthlung Thar chhiar chu i tum tâk?

Kum 17 mi ka nih chuan, ka zirna chhunzawm tûrin United States-ah ka kîr leh a. Chutah chuan, Kristian nia inchhâl ka hmêl hriat pakhat chuan Isua tel lo chuan ka nun hi a famkim loh tûr thu min hrilh a.

“Isua ringtute chu kawng bo an ni,” tiin ka chhâng a.

Ani chuan “Thuthung Thar hi i chhiar tawh ngai em?” tiin min zâwt a.

“Chhiar ngai lo,” tiin ka chhâng a.

Ani chuan, “Chutianga i la hriat miah loh chungchânga ngaih dân sawi chhuah mai chu a dik dâwn em ni?” min ti a.

Hriat ngai loh thil eng emaw chungchânga ngaih dân sawi ngawt chu thil âtthlâk nia ngai ṭhîntu ka nih avângin, a thusawi chuan ka rilru a hneh hle a. Inthiam lo tak hian a Bible chu inah ka hâwn a, Thuthlung Thar chu ka chhiar ṭan ta a ni.

Engtin nge i thu chhiarte chuan a nghawng che?

Thuthlung Thar ziaktute chu Juda mi an ni tih ka hriat chuan mak ka ti hle a. Chu bâkah, ka chhiar tam poh leh Isua ngilneihnate, mite tihchhiat aia ṭanpui duhtu Juda inngaitlâwm tak a nihziate ka hre tam lehzual a ni. Library-ah ka kalin, a chungchâng ziahna lehkhabute chu hawhin ka chhiar a. Mahse, chûng lehkhabute zîngah chuan Isua chu Messia a ni tih rinna min neihtîrtu pakhat mah ka hmu lo. Ṭhenkhat phei chuan Pathian niin an sawi hial a—chu chu ka tân awmze nei lo a ni. A thu hrimah, Isua chu tu hnênah nge a ṭawngṭai—mahni hnênah maw? Chu bâkah, Isua chu a thi a. Mahse, Bible chuan Pathian chungchângah: “I thi ngai lo,” tiin a sawi bawk si a. *

Engtin nge chûng zawhnate chhânna chu i hmuh?

Thutak chu a inkalh lo; chuvângin, thutak hmuh chu ka tum tlat a. Tichuan, tih tak zet leh ṭap zawih zawih chungin Pathian hnênah ka ṭawngṭai a, chu chu ṭawngṭaina lehkhabu tel lova ka ṭawngṭai hmasak ber ṭum a ni. Ka ṭawngṭai zawh hnu lawk chuan Jehova Thuhretu pahnih hian ka kawngka an rawn kik a. Anni chuan Bible zirna ṭanpuitu lehkhabu pakhat min pe a. A hnuah, chu lehkhabu hmang chuan Thuhretute nên sawihona kan nei a, an thurinte chuan Bible a ṭanchhan tih ka ring ta a. Entîr nân, Thuhretute chuan Isua chu Trinity zînga mi ni lovin, Pathian Fapa * leh “Pathian thil siam bula” * a ni tih an hria a ni.

A hnu lawkah, Mexico-ah ka kîr leh a, chutah chuan Thuhretute nên Messia chungchânga hrilh lâwknate ka zir zawm leh a. Hrilh lâwkna tam tak a awm tih ka hmuh chuan mak ka ti hle! Chuti chung pawhin, rinhlelhna ka la nei ta cheu va. Tichuan: ‘Isua chungah chauh em ni a thlen famkim?’ ‘Ani chuan chu chanvo chu a chang chawp mai lo ni ta se, engtin nge ni ang?’ tiin a ka ngaihtuah a ni.

Engin nge i ngaihtuahna chu thlâk danglam?

Thuhretute chuan mi dangte chan chawp theih loh hrilh lâwknate chu min hmuh a. Entîr nân, zâwlnei Mika chuan Messia chungchângah a pian hma kum 700 aia tamah Judai ram Bethlehema * a pian tûr thu a lo sawi a. Tuin nge a pianna hmun tûr thlang thei ang? Isaia chuan Messia chu mi sual ber anga tihhlum a ni ang a; mahse, mi hausa anga phûm a nih tûr thu a ziak bawk *. Chûng zawng zawng chu Isua chungah a thleng famkim a ni.

Thilthleng langsâr tak pakhat chu Isua thlahtute chhui chhuah theihna hi a ni a. Bible chuan Messia chu Lal Davida thlah a nih tûr thu a sawi a. Hmân lai Juda mite chuan vântlâng mipuite leh thlahtute chanchin chhinchhiahna chu an vawn ṭhat avângin, Isua chu Davida chhûngkua aṭanga lo piang a nih loh chuan, a hmêlmate chuan a nih lohzia an tlângaupui ngei ang! Mahse, anni chuan Isua chu Davida thlah a ni tih an hnial lo. Mipuiho pawhin, “Davida Fapa,” * tiin an ko a ni.

Isua thih hnu kum 37, C.E. 70-a Rom sipaite’n Jerusalem an tihchhiat khân, thlahtute chhinchhiahna chu tihchhiat a ni a. Chuvângin, thlahtute aṭanga hriat theih tûrin Messia chu C.E. 70 hma ngeia a lan a ngai a ni.

Engtin nge chumi hriatthiamna chuan a nghawng che?

Deuteronomy 18:18, 19-ah chuan Pathianin Mosia ang zâwlnei pakhat chu Israel hnamah a lo chhuak ang tih a sawi lâwk a. Pathian vêkin, “Ka hminga ka thu a sawi pawm lo apiang chu ka ngaihtuah ang,” tiin a sawi. Bible bu pum pui ngun taka ka zir hnu chuan, chu zâwlnei chu Nazareth Isua a ni tih ka ring nghet ta a ni.