BIBLE THLIR DAN
Pawisa Khelhna
Mi ṭhenkhatin pawisa khelhna chu sualna a awm lo tia an thlîr laiin mi dangte chuan sual lian tak niin an sawi thung.
Pawisa khelh hi thil sual a ni em?
MITE SAWI DAN
Mi tam tak chuan pawisa khelhna chu dânin a khap loh phawt chuan chhiatna thlen thei lo tûr angin an ngai a. Mipuite tâna chhiah man phuhhrûk theih nâna dân khap loh pawisa khelhna ṭhenkhat sawrkâr buatsaih lotterry-te a awm a.
BIBLE SAWITE
Bible-ah hian pawisa khelhna chungchâng târ lanna chiang tak a awm lo va. Mahse, pawisa khelh chungchânga Pathian ngaih dân târ langtu khaihhruaina thu bul tam tak târ lan a ni.
Pawisa khelhna bul ber chu mi dangte pawisa hman lai lâksak duhna a ni a, chu rilru put hmang chungchângah Bible chuan “awhna rêng rêng lakah chuan invêng rawh u,” tiin min vaukhân a ni. (Luka 12:15) Dik tak chuan, pawisa khelhna chuan duhâmna min neihtîr a. Pawisa khêl ṭhînte chuan vawi leh khata sum tam tak neih an duh tih pawisa inkhelhna hmuna hotute’n an hriat avângin a khêltute chu hneh dâwn lo anga an lan chuan pawisa inchawi tûr tam tak dahkhamin minte an hîp ṭhîn a. Pawisa khelhna chuan mi chu duhâmna laka vên ahnêkin, awlsam taka pawisa neih duhna a neihtîr a ni.
Pawisa khelhna chu mi dang a khingpui chân tâk pawisate neihsak a, mahni hmasialna thiltihah a innghat a. Mahse, Bible chuan, “mahni ṭhatna tûr zawng lovin, mi dang ṭhatna tûr zawng zâwk” tûrin min fuih a ni. (1 Korinth 10:24) Thu Sâwm pêk zînga pakhat chuan: “I vêngte ta rêng rêng chu eng mah i awt tûr a ni lo,” tiin a sawi a. (Exodus 20:17) Pawisa khêltuin thinlunga hneh duhna a neih hian, ani chuan a ham ṭhat nân mi dang a khingpui chu pawisa chân se tih a beisei a ni.
Bible chuan thlarau thiltihtheihnain malsâwmna a pêk anga an ngaih vânneihna ang chi chu a dem hle a. Hmân lai Israel mite zîngah, Pathian chunga rinna nei lo ṭhenkhat an awm a, ‘Vânneihna Siamtua tân dawhkân an buatsaih a ni.’ Chutiang “Vânneihna Siamtua” biak chu Pathian Jehova’n a pawm em? Pawm lo, an hnênah: “Ka mit hmuha thil sual chu in tih zâwka, ka thil lawm loh zâwng chu in thlan avângin,” tiin a hrilh a ni.—Isaia 65:11, 12.
Ram ṭhenkhatah chuan, phalna nei pawisa khelhna aṭanga an hmuh sumte chu zirna atân te, sumdâwnna hmasâwn nân te, leh thil dang vântlâng thiltih atânte hman a ni a. Mahse, chûng sumte an hmanna chuan an hmuh dân chu a thlâk danglam lo—chu chuan duhâmna te, mahni hmasialna te, leh engmah thawhrimna awm lova thil neih tumnate a neihtîr a ni.
“I vêngte ta rêng rêng chu eng mah i awt tûr a ni lo.”—Exodus 20:17.
Pawisaa inkelhnain a khêltu chungah nghawng ṭha lo eng nge a thlen theih?
BIBLE SAWI DAN CHUAN
Bible chuan “hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn,” tiin min vaukhân a. (1 Timothea 6:9) Pawisa inkhelhna lo chhuahna bul ber chu duhâmna a ni a, chuvângin, Bible chuan “duhâmna” rilru put hmang lantîrna nungchang ṭhenkhat chu pumpelh tûrin min vaukhân a ni.—Ephesi 5:3.
Pawisa khelhna chuan awlsam taka sum tam tak neih duhna neiin, sum leh pai ngainatna min neihtîr a, Bible chuan, “tangka sum ngainat hi sual tinrêng bul,” tiin a târ lang a ni. Sum leh pai awhna chuan mi chu a nunah awlsam takin a thunun a, lungkhamnain a khat a, Pathian rinna pawh a neihtîr lo thei a ni. Tangka sum ngainatna thanga âwkte chu Bible chuan ‘mahni leh mahni lungngaihna tam taka inchhun tlang chuk,’ angin a târ lang a ni.—1 Timothea 6:10.
Mi duhâm chuan lungnih lohna a pai reng a, an sum leh pai neihah duh tâwk a nei lova, a hlimna neih pawh a ru bo thei a ni. “Tangka sum ngainatu chuan tangka sumah duh tâwk a hmu lo vang a, hausak ngainatu chuan duh tâwk a hlêp hek lo vang.”—Thuhriltu 5:10.
Pawisa khlêl tûra thlêma awm mi maktaduai tam tak chu pawisa khelh chînna thangah an âwk a. Chu buaina chu a darh nasa hle a, United States ramah chauh pawh pawisa khelh chîngte chu mi maktaduai tam tak an awm nia chhût a ni.
Thufing pakhat chuan: “Sum hi a tîrah deh chhuah thuai theih mah sela, a tâwpah malsâwm a ni kher lo vang,” tiin a sawi a. (Thufingte 20:21) Pawisa khelh chîngte hmachhawn buainate chu leiba neih te, tlâkchhiatna te, leh hna chânna te, nupa inṭhenna te, leh ṭhiante chânna pawh a thlen thei a. Bible kaihruaina thu bulte nunpuina chuan mi chu nun tichhe theitu pawisa khelh pumpelh tûr leh hlimna nei tûrin a ṭanpui thei a ni.
“Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn.”—1 Timothea 6:9.
