1-3. Eng thilthlengte’n nge Pentikost nî chu nî pawimawh tak nihtîr a, chûng thilthlengte chuan engtin nge Bible sawi lâwkte a tihfamkim? (A thupui chunga milem en rawh.)

JERUSALEMA Chawlhni tûk a ni a. Ni pawimawh leh phûrawm tak a ni. Mite chuan buh seng ṭan tirh laiin kût thianghlim Pentikost an hmang a. Chu mi tûk chuan puithiam lalber chuan a tih ṭhin dân pângngai angin biak inah inthawina a hlân a ni. Ani chuan, dâr kua vêlah buh thar hmasak ber, a nih loh leh rah hmasa bera siam chhang hlâwm dawidim telh pahnih chu a hlân a. Puithiam lalber chuan sîr lehlam lehlamah thênin Jehova hmaah a hlân a. Chu mi nî chu C.E. 33 Pentikost nî a ni.—Leviticus 23:15-20.

² Kum za tam tak chhûng chu kum tin hian puithiam lalberin he thên thilhlan hi a hlân ṭhîn a. Chu thilhlan chu C.E. 33 Pentikost nîa thilthleng pawimawh tak nên inzawmna a nei a ni. Chu chu Jerusalem pindan chungnunga Isua zirtîr 120-te an ṭawngṭai laiin a thleng a. (Tirhkohte 1:13-15) Chu mi chungchâng chu a hma kum zariat vêl khân, zâwlnei Joela’n a lo ziak tawh a ni. (Joela 2:28-32; Tirhkohte 2:16-21) Chuta thleng thil pawimawh tak chu eng nge ni?

 ³ Tirhkohte 2:2-4 chhiar rawh. C.E. 33 Pentikost nî chuan Pathianin Kristiante chu a thlarau thianghlim pein hriak a thih a. (Tirhkohte 1:8) Tichuan, mipuite chuan an rawn hual ṭan a, zirtîrte chuan an thil hmuh leh hriat thil ropui takte chu an sawi ṭan ta a. Tirhkoh Petera chuan chuta thilthleng leh a pawimawh êm êm chhan chu a sawi a. Mipuite hnênah: “Sim ula, in sual ngaihdam nân Isua Krista hmingin baptisma chang ṭheuh rawh u; tichuan thlarau thianghlim pêk hi in hmu ang,” tiin a hrilh a ni. Chu mi nî chuan mi 3,000 vêl chuan baptisma an chang a, thlarau thianghlim an dawng bawk a ni.—Tirhkohte 2:37, 38, 41.

4. (a) Engvângin nge Pentikost nîa thilthleng chu kan ngaihven ang? (b) A hma kum tam taka Pentikost nîahte chuan eng thil pawimawh dang nge thleng mai thei? (Endnote en rawh.)

⁴ Puithiam lalber leh Pentikost nî apianga a thilhlan chuan eng nge a entîr? Puithiam lalber chuan Isua a entîr a. Chhang hlâwm chuan Isua zirtîr hriak thihte a entîr a ni. Chûng zirtîrte chu sual nei mihringte zîng ata thlan an ni a, “hmahruaitu,” a nih loh leh rah hmasate tia koh an ni. (Jakoba 1:18) Pathian chuan chûng mite chu a fate anga pawmin, Pathian Ram zînga mi anga vâna Isua nêna rorêl tûrin a thlang a ni. (1 Petera 2:9) Jehova chuan a Lalram chu thuâwih mihring zawng zawngte malsâwm nân a hmang ang. Chuvângin, kan chênna tûr chu vânah Isua hnênah a ni emaw, lei paradis-ah a ni emaw pawh ni se, C.E. 33 Pentikost nî chu kan tân a pawimawh hle a ni. ^[1] (Endnote en rawh.)

5. Hriak thih zawng zawngte chu hriak thih an nih dân a inang vek kher lo tih engtin nge kan hriat?

⁵ Pindan chungnunga awm zirtîrte chuan chu mi nî chu an theihnghilh ngai hauh lo vang. An lu chungah chuan mei alh ang hi a awm ṭheuh va. Jehova chuan ṭawng danga thusawi theihna a pe a ni. Thlarau thianghlima hriak thih an ni tih chu an inringhlel lo. (Tirhkohte 2:6-12) Mahse, Kristiante hriak thih an nih hian hêng thilmak takte a thleng vek kher lo a ni. Entîr nân, Jerusalema chu mi nî vêka hriak thih a sâng têlte chungah mei alh ang a awm thu Bible chuan a sawi lang lo. Anni chu Baptisma an chan veleh hriak thih an ni a. (Tirhkohte 2:38) Mahse, hriak thih Kristian zawng zawng chu baptisma an chan veleh hriak thih an ni nghâl vek lo. Entîr nân, Samari mite chu baptisma an chan hnu daihah hriak thih an ni a. (Tirhkohte 8:14-17) Tin, thil mak tak mai pakhat chu, Kornelia leh a ina awmte chu baptisma an chan hmaa hriak thih an ni hi a ni.—Tirhkohte 10:44-48.

6. Hriak thih zawng zawngte chuan eng nge an dawn a, engtin nge chu chuan anni chu a nghawng?

⁶ Kristiante chuan hriak thih an nihzia an inhriat dân a inang lo tih a chiang hle. Mi ṭhenkhat chuan Jehova’n hriak a thih tih an hre nghâl mai thei a. Mi dangte chuan hun engemawti chhûng a liam hnuah an hria a ni. Mahse, tirhkoh Paula chuan an vaia chunga thilthleng chu a hrilhfiah a. Ani chuan: “In rin hnuin, amahah chuan thlarau thianghlim tiam chuan chhinchhiahin in awm kha. Chu chu . . . kan roluahna tûra zakhamna a ni,” tiin a sawi. (Ephesi 1:13, 14) Chuvângin, Jehova chuan a thlarau thianghlim hmangin chûng Kristiante hnênah vâna kal tûrin a thlang tih inhriatna rinhlelh rual loh chu a pe a ni. Hetiang hian, thlarau thianghlim chu “zakhamna,” a nih loh leh nakinah leiah ni lo, vânah chatuanin an nung dâwn tih nemnghehna a lo ni.—2 Korinth 1:21, 22; 5:5 chhiar rawh.

7. Hriak thih Kristian tinte chuan vâna lâwmman dawng tûrin eng nge an tih ngai?

⁷ Kristian pakhat hriak thih a nih hian, a lâwmman chu a dawng ngei ngei dâwn tihna a  ni em? Ni lo. Vâna kal tûra sâwm a ni tih chu a chiang a. Mahse, Jehova chunga a rinawm chauhvin lâwmman chu a dawng ang. Petera chuan heti hian a hrilhfiah a ni: “Chuvângin unaute u, a kohna leh a thlanna che u chu tinghet tûrin taihmâk chhuah lehzual rawh u; chûng chu in tih [zêl] zawngin engtikah mah in tlu lo vang; chutichuan Isua Krista kan Lalpa leh Chhandamtu chatuan rama luh theihna chu a pe ngei dâwn si che u a,” tiin. (2 Petera 1:10, 11) Chuvângin, hriak thih Kristian tinte tân eng thil avâng maha Jehova rawngbâwlna an bânsan loh chu a pawimawh hle. Vâna kal tûra sâwm emaw, koh emaw pawh ni mah se, a rinawm reng loh chuan lâwmman chu a dawng lo vang.—Hebrai 3:1; Thu Puan 2:10.

8, 9. (a) Engvângin nge mi tam zâwkte tân tuemaw hriak thih a nih huna thil awm dân chu hriatthiam a harsat? (b) Engtin nge mi chuan vâna kal tûra sâwm a ni tih a inhriat?

⁸ Tûn laia Pathian chhiahhlawh a tam zâwkte chuan Pathianin tuemaw hriak a thih huna thil awm dân chu hriatthiam harsa an ti mai thei a. Hriak thih an nih loh avângin an hre thiam lo pawh chu thil pângngai tak a ni. Pathianin mihringte chu vânah ni lovin, leia chatuana nung tûrin a siam a. (Genesis 1:28; Sâm 37:29) Mahse, Jehova chuan vâna lal leh puithiam ni tûrin mi ṭhenkhat chu a thlang a ni. Chuvângin, Pathianin hriak a thih hian, an beiseite, an ngaihtuah dânte chu a inthlâkthleng a; chuvângin, vâna awm chu an châk ta a ni.—Ephesi 1:18 chhiar rawh.

⁹ Mahse, engtin nge mi chuan vâna kal tûra sâwm a ni tih a inhriat? Rom khuaa hriak thih “mi thianghlima awm tûra kohte” hnêna Paula thusawi hi chhinchhiah rawh: “Hlauva awm leh tûrin bâwih nihna thlarau in hmu a ni si lo va; fa nihna thlarau in hmu a ni zâwk e, chu thlarau avâng chuan ‘Abba! (Ka Pa!)’ tiin kan au ṭhin hi. Thlarau ngei chuan keimahni thlarau nên Pathian fate kan ni tih min hriattîr ṭhîn,” tih hi. (Rom 1:7; 8:15, 16) Pathian chuan a thlarau thianghlim hmangin, tuemaw chu vâna rorêl tûra sâwm a nih leh nih loh chiang takin a hriattîr a ni.—1 Thessalonika 2:12.

10. Johana thawn khat 2:27-a hriak thih Kristian chuan tuma zirtîr an ngai lo tih awmzia chu eng nge ni?

¹⁰ Pathian hnên aṭanga he sâwmna dawngtute hian hriak thih an nih thu hrilh hriat an ngai lo. Jehova’n rin nghehna a neihtîr a ni. Tirhkoh Johana chuan hriak thih Kristiante hnênah: “Mi thianghlim hnên ata hriak thihna in dawng a, chu chu in zain in hria e,” tiin a hrilh a ni. Heti hian a sawi belh bawk: “Nangni zawng ama hnên ata hriak thihna in hmuh kha nangmahniah a awm reng a, tuma zirtîr in ngai lo ve; ama hriak thihna chuan thil zawng zawng thu a zirtîr zâwk che u avâng leh dik tak a ni a, dâwt pawh a nih loh avângin, chu mi chuan a zirtîr che u ang khân amahah awm reng rawh u,” tiin. (1 Johana 2:20, 27) Hriak thih Kristiante chuan mi dangte ang bawkin Jehova zirtîrna an mamawh a. Mahse, hriak thih an ni tih tuma nemngheh an ngai lo. Jehova chuan hriak thih an nihzia rinhlelhna chhe tê pawh awm lova tihchian nân chakna thiltithei ber, a thlarau thianghlim a hmang a ni!

11, 12. Hriak thih Kristian chuan eng nge a ngaihtuah mai theih a; mahse, eng nge a rinhlelh ngai loh?

¹¹ Kristiante chu thlarau thianghlima hriak thih an nih hian, nasa takin an inthlâkthleng a. Isua chuan, anni chu ‘piang thar,’ a nih loh leh “chunglam aṭanga piang” an nih thu a sawi a. (Johana 3:3, 5, footnote C.L. Re-edited) Heti hian a hrilhfiah a ni: “I piang thar tûr ka tih che hi mak ti suh. Thli khawiah pawh a duh duhin a tleh ṭhîn, a ri i hria e, nimahsela khawi aṭanga lo kal nge, khawiah nge a kal dâwn tih  pawh i hre si lo; tupawh thlarauva piang chu chutiangin an awm,” tiin. (Johana 3:7, 8) Hriak thih ni lo hnênah hriak thih nih awm dân chiah chu hrilhfiah theih a ni lo tih a chiang hle. ^[2]—Endnote en rawh.

¹² Hriak thih tuemaw chuan: ‘Engvângin nge Jehova’n mi dang thlang lova kei min thlan?’ tiin a ngaihtuah mai thei. A mawhphurhna atâna tling tâwk lo niin a inngai hial thei bawk. Mahse, Jehova’n a thlang tih a inringhlel lo. Chutiang thilpêk avâng chuan nasa taka hlimin a lâwm hle zâwk mah a ni. Hriak thihte chuan Petera’n: “Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin, mitthi zîng ata Isua Krista thawhlehna avângin beiseina nung hmu tûrin min hring leh a, rochan chhe thei lo, bawlhhlawh kai lo, chuai thei lo, vâna in tâna khêk chu hmuhna tûrin,” tia a sawi ang hian an ti ve a ni. (1 Petera 1:3, 4) Hriak tihte’n hêng thute an chhiar hian, an Pa chuan anmahni a bia tih rinhlelhna chhe tê pawh an nei lo.

13. Mi chu thlarau thianghlima hriak thih a nih hian engtin nge a ngaihtuah dân a inthlâk a, he inthlâkthlengna hi engvânga lo awm nge ni?

¹³ Jehova’n vâna kal tûra hêng Kristiante a sâwm hma hian, anni chuan leia chatuana nun beiseina an nei a. Pathian Jehova’n lei hi paradis-a a siam hun leh mi suaksual zawng zawng a tihboral hun chu an nghâkhlel hle a ni. An chhûngte, a nih loh leh an ṭhian thi tawhte rawn tho lehte hmuah chu an suangtuah mai thei a. In sak a, chuta awm emaw, thingte phun a, a rahte ei emaw chu an nghâkhlel hle a ni. (Isaia 65:21-23) Engvângin nge an ngaihtuah dân chu a inthlâk danglam ṭan? An beidawn emaw, nasa taka hrehawm an tawrh emaw vânga inthlâk danglam a ni em? Leia chatuana nun chu a ninawmin, an hlim dâwn loh avânga chutiang thu tlûkna siam thut an ni em? A nih loh leh, vâna nun chu eng ang nge a nih hriat an duh vâng zâwk? Ni lo ve. He mi chungchânga an tâna thu tlûkna siamtu chu Pathian a ni a. Anni a sâwm hunah, a thlarau thianghlim hmangin an ngaihtuah dân leh an beiseina a thlâk danglamsak a ni.

14. Engtin nge hriak thihte chuan he leia nun chu an ngaih?

¹⁴ Chu mi awmzia chu hriak thihte chuan thih an duh tihna a ni em? Paula chuan hriak thihte awm dân a sawi a. Mihring taksa chu “puan in” nêna khaikhinin, heti hian a sawi a ni: “Keini he awmnaa awmte hi rit phurin kan rûm tak zet si a, sin lova awm kan duh vâng a ni lo va, sin thuaha awm kan duh vâng a ni zâwk, thi thei hi nunna lem zawhin a awm theih nân,” tiin. (2 Korinth 5:4) Hêng Kristiante hian thih an duh lo va. An chhûngte leh an ṭhiante nêna nî tina Jehova rawngbâwl chu an duh a ni. An thiltih chu eng pawh ni se, nakin hun atâna Pathian thutiam chu an hre reng a ni.—1 Korinth 15:53; 2 Petera 1:4; 1 Johana 3:2, 3; Thu Puan 20:6.

15. Engin nge mi chu thlarau thianghlima hriak thih a ni tih finfiah lo?

¹⁵ Jehova’n vâna kal tûrin min sâwm em aw, tih i ngaihtuah pawh a ni thei. A sâwm che nia i inhriat chuan hêng zawhna pawimawh takte hi ngaihtuah ang che: Thu hrilh rawngbâwlnaah ṭhahnemngai zual bîk niin i inhria em? Bible zirna leh “Pathian thu ril” zirna chu nuam i ti hle em? (1 Korinth 2:10) Jehova’n thu hrilh rawngbâwlnaah hlawhtlinna nasa tak a pe che niin i inhria em? Thil dang zawng aiin Jehova duhzâwng tih chu i duh em? Mi dangte chunga hmangaihna nasa tak i neiin, Jehova rawngbâwl tûra anmahni ṭanpui chu i mawhphurhna niin i hria em? I nunah kawng tam takin Jehova’n a ṭanpui che tih finfiahna i hmu em? Hêng zawng zawng hi nangmahah a thleng a nih  chuan, vâna kal tûrin sâwmna i dawng tihna a ni em? Ni lo. Engvângin nge? Hriak thih an ni emaw, ni lo emaw pawh ni se, Pathian chhiahhlawh zawng zawngte chungah chutiang thil a thlen vek theih vâng a ni. An lâwmman dawn tûr chu eng pawh ni se, a thlarau thianghlim hmangin Jehova chuan a chhiahhlawh tupawh chu chakna thuhmun a pe thei a ni. Dik takin, vâna i kal dâwn leh dâwn loh i inhriat chian loh chuan, sâwmna i dawng lo tihna a ni. Jehova thlante chuan he mi chungchângah hian buaina an nei lo! An inhre chiang hle zâwk si a!

16. Engtin nge Pathian thlarau dawngtu zawng zawngte chu vâna kal tûra sâwm an ni vek lo tih kan hriat?

¹⁶ Bible-ah chuan, vâna kal si lova Pathian Jehova thlarau thianghlim dawng mi rinawm tam tak an awm a. Entîrna pakhat chu baptistu Johana a ni. Isua chuan Johana aia ropui zâwk an awm lo tih a sawi a; mahse, vânah ro a rêl dâwn lo tih a sawi bawk. (Matthaia 11:10, 11) Davida pawh thlarau thianghlimin a kaihruai a. (1 Samuela 16:13) Thlarau thianghlim chuan Jehova chungchânga thu rilte hre thiam tûrin a ṭanpui a, Bible-a bu ṭhenkhat ziak tûrin a kaihruai bawk a ni. (Marka 12:36) Chuti chung pawhin, tirhkoh Petera chuan Davida chu “vânah a lâwn chho lo a ni,” tih a sawi. (Tirhkohte 2:34) Jehova chuan hêng mite hnênah thil ropui takte an tihtheih nân a thlarau thianghlim hmangin chakna a pe a; mahse, vâna nung tûra sâwm nân a hmang lo. Chu mi awmzia chu vâna rorêl tûrin an rinawm tâwk lo, a nih loh leh an tling lo tihna a ni em? Ni lo. Jehova’n lei Paradis-a nung tûrin a kai tho leh dâwn tihna mai a ni.—Johana 5:28, 29; Tirhkohte 24:15.

17, 18. (a) Eng lâwmman nge tûn laia Pathian chhiahhlawh a tam zâwkte chuan an beisei? (b) A dawta thuziakah eng zawhnate nge kan sawiho vang?

¹⁷ Tûn laia Pathian chhiahhlawh a tam zâwkte chu vânah an kal lo vang a. Abrahama te, Davida te, Baptistu Johana te, leh Bible hun laia a hmei a pate chuan Pathian sawrkârnain leia ro a rêl huna nun chu an beisei a ni. (Hebrai 11:10) Vâna Isua nêna rorêl tûr chu mi 1,44,000 an ni a. Mahse, Bible chuan he tâwpna huna leia hriak thih ‘a la bângte’ chungchâng a sawi a. (Thu Puan 12:17) Chuvângin, mi 1,44,000-te zînga a tam zâwk chu an thi tawhin, vânah an awm tawh a ni.

¹⁸ Mahse, tuemawin hriak thih a nih thu sawi ta se, lei lam beiseina neite chuan engtin nge an chhân lêt ang? In kohhrana tuemawin Hriatrengna chhang leh uain a kîl ṭan chuan engtin nge ani chu i cheibâwl ang? Hriak thih nia insawite chu pung tulh tulh ta se, engtin nge ni ang? I lo buai a ngai em? A dawta thuziakah hêng zawhnate hi chhân a ni ang. (ws16.01-E)