1. Jehova chu Chungnungbera a ni chung pawhin, mi dangte chu eng ti tûrin nge a sâwm?

JEHOVA chu Chungnungbera a ni a. Ani chuan engkim a siam a, a finna leh a thiltihtheihna chuan tiam chin a nei lo. He thu hre thiam tûra Joba a ṭanpui hnuah, Joba chuan Pathian hnênah: “Engkim i ti thei tih ka hria e, i tum dâl rual engmah a awm lo,” tiin a sawi. (Joba 42:2) Jehova chuan ti tûra thu tlûkna a siam apiang chu tuma ṭanpuina tel lovin a ti thei a. Mahse, a hmangaihna avângin a thiltumte tihhlawhtling tûra thawhpui tûrin mi dangte a sâwm a ni.

2. Jehova’n Isua chu eng hna pawimawh tak thawhpui tûrin nge a sâwm?

² Pathian chuan engmah a siam hmain a Fapa Isua chu a siam a. Tichuan, thil dang zawng zawng a siamnaah a Fapa chu thawhpui tûrin a sâwm a ni. (Johana 1:1-3, 18) Tirhkoh Paula’n Isua chungchângah heti hian a ziak a: “Amahah chuan engkim siam a ni a, vâna awmte, leia awmte nên, hmuh theihte, hmuh theih lohte nên, lalṭhutphahte pawh, rorêlnate pawh, lalnate pawh, thuneihnate  pawh; engkim ama siam a ni, ama ta tûr bawka siam a ni,” tiin. (Kolossa 1:15-17) Chuvângin, Jehova chuan a Fapa hnênah hna pawimawh tak a pe mai ni lovin, a pêk thu mi dangte hnênah a hrilh bawk a ni. Chawimawina a va ni tak êm!

3. Jehova chuan Adama chu eng ti tûrin nge a sâwm a, engvângin nge?

³ Jehova chuan amah thawhpui tûrin mihringte pawh a sâwm bawk a. Entîr nân, Adama chu ramsate hming a vuahtîr a ni. (Genesis 2:19, 20) Adama’n he a hnathawh a hlimpui dân tûr chu han mitthla teh! Ani chuan ramsate lan dân leh chêt dânte ngun taka zirin, an hming a vuah a. Jehova chuan ramsa zawng zawngte chu a siam avângin, an hming a vuah thei reng a. Mahse, Adama chu ramsate hming vuahtîrin, Adama a hmangaihzia a târ lang a ni. Pathian chuan Adama chu lei pumpui hi paradis-a siam tûrin hnathawh tûr a pe bawk a. (Genesis 1:27, 28) Mahse, Adama chuan Pathian a thawhpuina chu a titâwp a, chu chuan amah leh a thlah zawng zawngte chungah hrehawm tawrhna nasa tak a thlentîr a ni.—Genesis 3:17-19, 23.

4. Engtin nge mi dangte chuan Pathian duhzâwng tihlawhtling tûra an thawhpui?

⁴ A hnuah chuan, Pathianin amah thawhpui tûrin mi dang a sâwm a. Nova chuan amah leh a chhûngte Tuilêta an him theih nân lawng a tuk a. Mosia chuan Israel hnamte chu Aigupta aṭangin a chhan chhuak a. Josua chuan Ram Tiamah Israelte chu a hruai lût a. Solomona chuan Jerusalemah biak in a sa a. Mari chu Isua nu a lo ni a. Hêng mi rinawm zawng zawngte leh mi dang tam takte chuan Jehova duhzâwng tihlawhtling tûrin an thawhpui a ni.

5. Eng hnathawhnaah nge kan tel theih a, Jehova chuan he hnathawhnaah hian kan thawhpuina a mamawh em? (A thupui chunga milem en rawh.)

⁵ Tûn laiah, Jehova chuan a Lalram thlâwp tûra kan tih theih apiang ti tûrin min sâwm a. Kawng tam takin Pathian rawng kan bâwl thei a ni. Kan vai hian a rawng kan bâwl theih dân kawng chu inang lo mah se, Lalram chanchin ṭha chu kan hril ṭheuh thei a ni. Jehova chuan he hna hi thawhpui ngai lovin a thawk thei reng a. Vân aṭangin leia mite chu a be thei a ni. Isua chuan, Jehova’n A Lalrama Lalber chungchâng mi dangte hnêna hril tûrin lungtê pawh a hmang thei tih a sawi. (Luka 19:37-40) Mahse, Jehova chuan a “hnathawhpuite” kan nih a phal a ni. (1 Korinth 3:9) Tirhkoh Paula chuan: “Pathian khawngaihna chu sâwtpui lova in hmuh lohna tûrin, amah thawhpuiin kan ngên chiam a che u,” tiin a ziak a. (2 Korinth 6:1) Pathian hnathawhpui ni tûra sâwm kan ni chu châwimawina ropui tak a ni. Hei hian hlimna nasa tak min thlen theih chhan ṭhenkhat i lo en ang u.

6. Pathian Fapa piang hmasa ber chuan a Pa kianga hnathawh chungchângah eng nge a sawi?

⁶ Pathian kan thawhpuina chuan Jehova chhiahhlawhte chu a tihlim reng ṭhîn a. Leia a rawn kal hma khân, Pathian Fapa piang hmasa ber chuan: “LALPA chuan a thil siam bul berah min din a, . . . mi themthiam angin a kiangah ka awm a; ni tin a lâwmna ka ni a. A bulah ka hlim êm êm bawk ṭhîn,” tiin a sawi a ni. (Thufingte 8:22, 30) Isua’n a Pa a thawhpui hian, thil tam tak a tihzawh avâng leh Jehova’n a hmangaih tih a hriatna avângin a hlim hle a ni. Chutiang chu kan ni ve em?

7. Engvângin nge thu hrilh rawngbâwlna chuan hlimna min pêk?

⁷ Isua chuan kan pêk hunah leh kan dawn hunah kan hlim ve ve tih a sawi a. (Tirhkohte 20:35) Thutak kan dawn hian hlimna min thlen a; mahse, engvângin nge mi dangte hnêna thutak kan hrilh pawh hian hlimna kan  neih? Bible zirtîrnate an hriatthiam a, Pathian nêna inlaichînna an neih ṭan hian an hlim tak zet tih kan hmuh vâng a ni. An ngaihtuahna leh an nun kawngte an thlâk danglam tih kan hmuh hian kan phûr hle a. Thu hrilh rawngbâwlna hi kan thawh theihte zînga pawimawh ber leh lungâwithlâk ber a ni a. Chu chuan Pathian ṭhian rawn ni chhote chu chatuan nunna a neihtîr thei a ni.—2 Korinth 5:20.

8. Mi ṭhenkhatin Jehova an thawhpuinaa an hlim dân chungchângah eng nge an sawi?

⁸ Mi dangte chu Pathian chungchâng hre tûra kan ṭanpui hian, Jehova kan tilâwm tih leh a rawngbâwlnaa theih tâwp kan chhuahna chu a hlut tih kan hria a. Chu chuan hlimna min pe bawk a ni. (1 Korinth 15:58 chhiar rawh.) Italy rama Marco-a chuan: “Ka thil neih ṭha ber chu theihnghilh nghâl mai tûr tuemaw hnênah ni lovin, Jehova hnênah ka pe tih ka hriat avângin ka hlim hle,” tiin a sawi a. Chutiang bawkin, Italy rama rawngbâwl tho Franco-a chuan: “Jehova chuan a Thu leh thlarau lama min châwmnate hmangin min hmangaihzia leh a rawngbâwlnaa kan thiltih chu kan tân engmah tham ni lo mah se, a tân chuan a pawimawh hle tih nî tin min hriattîr a ni. Chuvângin, Pathian ka thawhpuina chuan hlimna leh nun awmze nei tak min pe a ni,” tiin a sawi bawk.

9. Jehova leh Isua inkârah eng inlaichînna nge awm a, engvângin nge?

⁹ Kan hmangaihte nêna hna kan thawhho hian, anni chu kan hnaih lehzual a. An mizia leh ṭhatnate kan hre chiang lehzual a. An thiltumte leh, hlen an tum dânte chu kan hria a ni. Isua chuan Jehova chu kum tlûklehdingâwn tam tak ni hial thei chhûng hna a thawhpui a. An inhmangaihna leh an inngainatna chu a lo nghet ta hle a, an inlaichînna chu engmahin a tichhe thei lo a ni. Isua chuan, chu inlaichînna ngheh dân chu: “Kei leh Pa chu pumkhat kan ni,” tia sawiin a hrilhfiah a. (Johana 10:30) An inpumkhat tak zetin, an thawh dunnaah an inthlâwp ṭha hle a ni.

10. Engvângin nge thu hrilhna chuan Pathian leh mi dangte min hnaihtîr?

¹⁰ Isua chuan Jehova hnênah a zirtîrte vênghim tûrin a dîl a. Engvângin nge? Anmahni ang bawka “pumkhat an nih theih nân” a ni. (Johana 17:11) Pathian tehnate kan nunpui a, thu hrilh rawngbâwlnaa kan tel hian, a mize ropui takte kan hre thiam lehzual a. Amah rinchhan leh a kaihhruaina zawm a finthlâk chhan kan hria a. Tichuan, Pathian kan hnaih hian ani pawhin min hnaih a ni. (Jakoba 4:8 chhiar rawh.) Tum thuhmun kan neih avâng leh buaina leh hlimna inang kan tawn avângin kan unaute chu kan hnaih bawk a. Kan thawkho va, kan hlimho va, kan tuar ho bawk a ni. Britain-a awm Octavia-i chuan: “Jehova thawhpuina chuan mi dangte min hnaihtîr a ni,” tiin a sawi a. An inṭhianna chuan “tum thuhmun leh pan lam thuhmun” a ṭanchhan tawh vâng niin a  sawi. Keini pawhin chutiang chuan kan ngai ve a. Kan unaute’n Jehova tihlâwm tuma theih tâwp an chhuah kan hmuh hian, chu chuan anmahni min hnaihtîr lehzual a ni.

11. Engvângin nge khawvêl tharah chuan Jehova leh kan unaute chu kan hnaih lehzual ang?

¹¹ Pathian leh unaute kan hmangaihna chu a nghet a; mahse, khawvêl tharah chuan a nghet lehzual ang. Nakin huna kan thawh tûr hna phûrawm takte chu han ngaihtuah teh! Tho lehte chu kan lo hmuak ang a, Jehova chungchâng kan zirtîr ang. Lei hi paradis-a chantîr tûrin kan thawk bawk ang. Hna thawhhona leh Krista rorêlna hnuaia zawi zawia ṭhat famkim lam pan chu a hlimawm hle ang. Mi zawng zawngte chu an inhnaih tawn lehzual ang a, ‘thil nung zawng zawng châkna tihrehsaktu,’ a nih loh leh phuhrûksaktu Pathian Jehova chu an hnaih lehzual bawk ang.—Sâm 145:16.

12. Engtin nge thu hrilhna chuan min vênhim?

¹² Jehova nêna kan inlaichînna chu kan vênhim a ngai a. Setana khawvêlah kan awm vâng leh kan ṭhat famkim loh avângin, khawvêl mite anga thil ngaihtuah leh tih chu a awlsam hle. Chu chu tui kan hleuh laia kan kal duh lohna lama tuiin min lên ang hi a ni. Chuvângin, a kalhzâwnga hleuh tûr chuan kan chakna zawng zawng kan hman a ngai a ni. Chutiang bawkin, Setana khawvêlin min thunun loh nân theih tâwp kan chhuah a ngai a. Chuti chu, engtin nge thu hrilhna chuan min vênhim? Jehova leh Bible chungchâng kan sawi hian, kan rinna tichak lo thei thilte ni lovin, thil pawimawh leh ṭhate chu kan ngaihtuah tlat a. (Philippi 4:8) Thu hrilhna chuan Pathian thutiamte leh a tehna duhawm takte min hriatnawntîr avângin kan rinna a tinghet a ni. Setana leh a khawvêl laka invênghim tûra kan mamawh miziate nei reng tûrin min ṭanpui bawk.—Ephesi 6:14-17 chhiar rawh.

13. Engtin nge Australia rama Thuhretu pakhat chuan thu hrilhna chu a ngaih?

¹³ Thu hrilhna te, zirtîrna te, leh kohhrana mi dangte tâna thiltihnaahte kan buai reng hian, kan harsatnate lungkham lutukna tûr hun kan neih loh avângin vênhim kan ni a. Australia rama awm Joel-a chuan: “Thu hrilhna chuan a tak rama chêng tûrin min ṭanpui a. Mite tawn harsatnate bâkah, Bible thu bulte nunpuina ka hlâwkpui dân min hriattîr a ni. Thu hrilhna chuan inngaitlâwm reng tûrin min ṭanpui a; chu chuan Jehova leh ka unaute rinchhan theihna hun remchâng min pe a ni,” tiin a sawi.

14. Engvângin nge thu hrilhnaa kan chhelna chuan Pathian thlarauvin min awmpui tih a târ lan?

¹⁴ Thu hrilhna chuan Pathian thlarauvin min awmpui tih min rintîr lehzual bawk. Entîr nân: In vêngchhûnga mite hnênah chhang sem hna thawk angin han inmitthla teh. He hna thawk tûr hian, hlawh pêk i ni lova, mahni i intum a ngai a ni. Mi a tam zâwkte chuan i chhang pêk chu an duh lo va, ṭhenkhat chuan chu chhang i pêk avângin an haw hial che a ni. Chutiang hna chu eng chen nge i thawh zêl theih ang? Rei lo têah i lunghnual ang a, i bânsan mai ang. Mahse, kan zînga tam tak chuan hun leh sumte sêngin, mite nuihzat leh thinur an tâwk chung pawhin, a kum a kumin thu an hrilh chhunzawm zêl a. Chu chuan Pathian thlarauvin min ṭanpui tih a tichiang hle.

15. Engtin nge chanchin ṭha hrilhna chu mihringte tâna Pathian thiltum nên a inzawm?

¹⁵ Engtin nge thu hrilh rawngbâwlna chu mihringte tâna Jehova thiltum nên a inzawm? Pathian thiltum chu mihringte chatuana an nun hi a ni a, Adama’n thil sual a tih khân chu  a thiltum chu a inthlâk lo. (Isaia 55:11) Ani chuan sual leh thihna ata zalên tûrin ruahmanna min siamsak a ni. Engtin nge? Isua chu leiah lo kalin a nun a hlân a. Mahse, chu mi hlâwkpui tûr chuan mihringte’n Pathian thu an zawm a ngai a ni. Chuvângin, Isua chuan mite chu Pathian thil phûtte a zirtîr a, a zirtîrte chu chutianga ti ve tûrin thu a pe a ni. Tûn laiah thu kan hrilh a, mite chu Pathian ṭhian ni tûra kan ṭanpui hian, sual leh thihna ata mihringte chhan chhuak tûra hmangaih taka a ruahmanna siamah Pathian kan thawhpui tihna a ni.

16. Engtin nge kan thu hrilhna chu Pathian thupêk ropui ber nên a inzawm tlat?

¹⁶ Chatuan nunna hmu tûra mi dangte kan ṭanpui hian, anmahni leh Jehova kan hmangaihna kan târ lang a. “Ani chuan mi zawng zawng chhandama awmah leh thutak hriaah a duh a ni.” (1 Timothea 2:4) Pharisai pakhatin Isua hnêna Pathian thupêk ropui ber a zawh khân, Isua chuan: “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni, tih hi. Chu chu thu pêk ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’” tiin a hrilh a. (Matthaia 22:37-39) Chanchin ṭha hrilin hêng thupêkte hi kan zâwm a ni.—Tirhkohte 10:42 chhiar rawh.

17. Chanchin ṭha hrilh theihna chu engtin nge i ngaih?

¹⁷ Malsâwm kan va ni tak êm! Jehova chuan amah leh kan unaute min hnaih lehzualtîra amah nêna kan inlaichînna vênghimtu hlimna min neihtîr thei hnathawh tûr pakhat min pe a. Chu chuan Pathian leh mi dangte kan hmangaihna lantîr theihna hun remchâng min pe bawk. Jehova chuan khawvêl pumah chhiahhlawh maktaduai tam tak a nei a, an dinhmun chu a inang lo hle a. Mahse, kan naupang emaw, kan upa emaw, kan hausa emaw, kan rethei emaw, a nih loh leh kan chak emaw, chak lo emaw pawh ni se, kan vai hian mi dangte hnênah kan rinna hrilh tûrin theihtâwp kan chhuah a ni. France rama Chantel-i angin kan ngaihtuah thei a, ani chuan: “Lei leh vâna Thiltitheiber, thil engkim Siamtu, Pathian hlim chuan: ‘Kal la! Kan tân sawi rawh! I thinlung aṭangin sawi rawh. Ka chakna, ka Thu Bible, vân lam ṭanpuina, lei lam ṭhiante, zirtîrna kal zêl, leh a hun taka kaihhruaina ṭha tak ka pe a che,’ min ti a. Pathian Jehova’n thil min phûtte tihsak leh amah kan thawhpui thei hi chanvo ropui a va ni tak êm!” tiin a sawi a ni. (ws16.01-E)