1, 2. (a) Pathian ‘thilpêk sawi hleih theih lovah’ chuan eng nge tel? (b) He thuziakah hian eng zawhnate nge kan ngaihtuah ang?

JEHOVA’N a fapa duh tak Isua leia a rawn tirh khân, hmangaihna thilpêk ropui ber min pe a! (Johana 3:16; 1 Johana 4:9, 10) Chu thilpêk chu tirhkoh Paula chuan “thilpêk sawi hleih theih loh” tiin a sawi a ni. (2 Korinth 9:15) Engvângin nge Paula’n chu ṭawngkam chu a hman?

² Paula chuan Isua inthawina chu Pathian thutiam ropui takte a thleng famkim ngei dâwn tih tiamkamna a ni tih a hria a. (2 Korinth 1:20 chhiar rawh.) Chu mi awmzia chu, Pathian ‘thilpêk sawi hleih theih lovah’ chuan Isua inthawina leh Pathian Jehova’n kan chunga a lantîr ṭhatna zawng zawng leh hmangaihna rinawm a tel a. Chutiang thilpêk hlu tak chu hriatthiam vek theih tûr khawpa sawifiah theih a ni lo. He thilpêk hlu tak hian engtin nge min awmtîr ang? Engtin nge he thilpêk  hian March 23, 2016, Nilainia neih tûr Krista thih Hriatrengna atâna inbuatsaih tûrin min chêttîr ang?

3, 4. (a) Thilpêk i dawn hian engtin nge i awm? (b) Engtin nge thilpêk ropui tak chuan i nun a thlâk theih?

³ Thilpêk kan dawn hian kan lâwm ṭhîn a. Mahse, thilpêk ṭhenkhat chuan awmzia a neih êm a, a ropui êm avângin kan nun a thlâkthleng thei a ni. Entîr nân, dân bawhchhiatnaa tel ve angin han inchan teh. A hremna chu thihna a ni a. Mahse, i hriat loh tuemaw chuan hremna i tawrh ai tuar tûrin a rawn inpe ta thut a. I aia thih a inhuam a ni. Engtin nge chutiang thilpêk hlu tak chu i ngaih ang?

⁴ Chutiang hmangaihna leh thilpêk ropui tak chuan i nunah inthlâkthlengna a thlentîr ngei ang. Mi dangte laka thilphal lehzual tûr leh anmahni hmangaihna nei lehzual tûra chêttîra i awm bâkah, i chunga ngilneihna nei lote ngaidam tûra chêttîrin i awm ngei bawk ang a. I dam chhûngin, chu inpêkna avânga i lâwmzia târ lan chu i duh ngei bawk ang.

5. Pathian min pêk tlanna chu thilpêk dang zawng aiin eng angin nge a ropui zâwk?

⁵ Pathian min pêk tlanna chu entîrnaa kan sawi thilpêk aiin a ropui zâwk a. (1 Petera 3:18) Hei hi han ngaihtuah teh: Kan vai hian Adama hnên aṭangin sual kan rochun a, sual man chu thihna a ni. (Rom 5:12) Hmangaihna chuan mihring zawng zawng tâna thi tûr leh ‘thihna chu mi tin tân temsak’ tûra Isua rawn tîr tûrin Jehova chu a chêttîr a. (Hebrai 2:9) Mahse, Isua inthawina chuan chu aia tam a ti dâwn! Thihna chu chatuanin a nuai bo dâwn a ni. (Isaia 25:7, 8; 1 Korinth 15:22, 26) Isua ringtu zawng zawngte chu thlamuang taka nungin chatuanin an hlim ang; a ṭhen chu Krista nên vâna lal tûr an ni ang a, a dangte chu leia Pathian Ram khua leh tuite an ni ang. (Rom 6:23; Thu Puan 5:9, 10) Jehova thilpêkah chuan eng malsâwmna dangte nge la awm?

6. (a) Pathian Jehova thilpêk zînga eng malsâwmnate nge i nghahhlelh? (b) Pathian thilpêkin ti tûra min chêttîr thil pathumte chu sawi rawh.

⁶ Pathian thilpêk zînga mi a nih angin lei hi paradis a ni ang a, dam lote tihdam an niin, mitthite pawh kaihthawh an ni ang. (Isaia 33:24; 35:5, 6; Johana 5:28, 29) He “thilpêk sawi hleih theih loh” avângin Pathian Jehova leh a Fapa duh tak chu kan hmangaih a ni. Chu thilpêk chuan eng ti tûrin nge min chêttîr ang? Chu chuan (1) Isua Krista entawn tlat tûrin, (2) kan unaute hmangaih tûrin, leh (3) thinlung taka mi dangte ngaidam tûrin min chêttîr ang.

7, 8. Engtin nge Krista hmangaihna chu kan ngaih ang a, chu chuan eng ti tûrin nge min chêttîr ang?

⁷ A hmasa berin, kan nun chu Isua chawimawi nân kan hmang tûr a ni a. Tirhkoh Paula chuan: “Krista hmangaihna chuan min tîr lui a ni,” tiin a sawi. (2 Korinth 5:14, 15 chhiar rawh.) Ani chuan Isua hmangaihna nasa tak kan pawm chuan, Isua hmangaih a, chawimawi tûrin min tîr lui emaw, min chêttîr emaw ang tih a hria a ni. Ni e, kan tâna Jehova thiltihte kan hriatthiam vek chuan, a hmangaihna chuan Isua chawimawi tûr zâwnga nung tûrin min chêttîr ang. Engtin nge Isua kan chawimawi theih?

⁸ Jehova kan hmangaihna chuan Isua entawn a, a hniaka zui tûrin min chêttîr ang. (1 Petera 2:21; 1 Johana 2:6) Pathian leh Krista thu kan âwih hian anmahni kan hmangaihna kan târ lang a. Isua chuan: “Tupawh ka thupêkte neia zâwm chu mi hmangaihtu  a ni; tupawh mi hmangaih chu ka Pain a hmangaih ang, kei pawhin ani chu ka hmangaih ang a, a hnênah ka inlâr ang,” tiin a sawi a ni.—Johana 14:21; 1 Johana 5:3.

9. Eng duhna nge kan neih theih?

⁹ He Hriatrengna hun chhûng hian, kan nun kan hman dân chhût chu a ṭha a ni. Chuvângin heti hian inzâwt rawh: ‘Eng kawngahte nge Isua ka entawn tawh? Eng kawngahte nge hma sâwn ka la ngaih?’ tiin. Khawvêl chuan an nun dân anga nung tûra min duh avângin, hêng zawhnate inzawh a pawimawh a ni. (Rom 12:2) Kan fîmkhur loh chuan khawvêla zirtîrtu te, mi lâr te, leh infiam mite entawn duhnain min nawr thei a. (Kolossa 2:8; 1 Johana 2:15-17) Engtin nge chutiang nawrna chu kan do theih?

10. He Hriatrengna hun chhûng hian eng zawhnate nge kan inzawh theih a, a chhânnate chuan eng ti tûrin nge min chêttîr theih? (A thupui chunga milem en rawh.)

¹⁰ Hriatrengna hun chhûng hian kan thawmhnaw te, film te, leh rimawi te bâkah, kan computer te, cell phone te, a nih loh leh tablet tea thil awmte enfiah chu a ṭha a ni. Heti hian inzâwt rawh: ‘Isua chu hetah awmin ka thawmhnaw hâk hi hmu ta se, ka zak ang em?’ (1 Timothea 2:9, 10 chhiar rawh.) ‘Ka thawmhnaw hâk hian Krista hnungzui ka ni tih a târ lang em? Ka film en hi Isua’n a en duh ang em? Ka rimawi ngaihthlâkte hi a ngaithla ang em? Isua’n ka cell phone, a nih loh leh tablet chu hawh ta se, a thil hmuhte avângin ka zak ang em? Ka video game khelh nuam ka tih chhan Isua hnêna hrilhfiah chu harsa ka ti ang em?’ tiin. Jehova kan hmangaihna chuan, a man chu eng zât pawh ni se, Kristian tâna inâwm lo thil engpawh paih bo tûrin min chêttîr tûr a ni. (Tirhkohte 19:19, 20) Jehova hnêna kan inpumpêk hian, Krista chawimawi nâna kan nun hmang tûrin kan intiam a. Chuvângin, Isua kan entawnna tûr tiharsa thei thil engmah kan kawl tûr a ni lo.—Matthaia 5:29, 30; Philippi 4:8.

11. (a) Engtin nge Jehova leh Isua kan hmangaihna chuan thu hrilh rawngbâwlnaah min chêttîr? (b) Engtin nge kan hmangaihna chuan kohhrana mi dangte ṭanpui tûra min chêttîr theih?

¹¹ Isua kan hmangaihna chuan ṭhahnemngai taka thu hril tûr leh zirtîr tûrin min chêttîr a. (Matthaia 28:19, 20; Luka 4:43) Hriatrengna hun chhûng hian thu hrilh rawngbâwlnaah dârkâr 30 emaw, dârkâr 50 emaw hmua auxiliary pioneer i thawh theih nân i nî tin nun chu i siamrem thei ang em? Kum 84-a upa nupui sûn tawh pa pakhat chuan a kum upat vâng leh a hrisêlna ṭhat loh avângin pioneer thawk thei lo tûrah a inngai a. Mahse, a awmna biala pioneer-te chuan amah ṭanpui chu an duh a. Anni chuan kalna tûr an ruahmansakin, thu hrilhna tûr hmun remchâng an thlansak a. Chuvângin, unaupa chuan a tum dârkâr 30 chu a hmu thei ta a ni. In kohhrana tuemaw chu March thla emaw, April thla emawa auxiliary pioneer thawk tûrin i ṭanpui thei ang em? Mi zawng zawngin pioneer an thawk thei vek kher lo tih chu a dik ngei mai; mahse, kan hun leh kan chaknate hi Jehova rawngbâwlnaa inhman lehzual nân kan hmang thei a ni. Chutianga kan tih chuan Paula angin, Isua hmangaihna avânga chêttîrin kan awm tih kan târ lang ang. Pathian hmangaihna chuan thil dang engte nge ti tûra min chêttîr ang?

12. Pathian hmangaihna chuan eng ti tûrin nge min chêttîr?

¹² A pahnihnaah chuan, Pathian hmangaihna chuan kan unaute hmangaih tûrin min chêttîr tûr a ni. Tirhkoh Johana chuan: “Duh takte u, Pathianin chuti kauva min hmangaih chuan keini pawh kan inhmangaih tawn  ṭheuh tûr a ni,” tiin a ziak a. (1 Johana 4:7-11) Chuvângin, Pathian hmangaihna kan pawm chuan kan unaute kan hmangaih a ngai a ni. (1 Johana 3:16) Engtin nge anni chu kan hmangaih tih kan lantîr theih?

13. Mi dangte hmangaihnaah Isua’n entawn tûr eng nge a siam?

¹³ Isua entawn tûr siam chuan mi dangte kan hmangaih theih dân min kawhhmuh a. Leia a awm lai khân, mite a ṭanpui a, a bîk takin mi inngaitlâwmte chu a ṭanpui a ni. Dam lote, kebai te, mitdel te, bengngawng te, leh ṭawngtheilote chu a tidam a. (Matthaia 11:4, 5) Sakhaw hruaitute ang lo takin, Isua chuan Pathian chanchin hre duhte chu lâwm takin a zirtîr a ni. (Johana 7:49) Chûng mi inngaitlâwmte chu a hmangaih a, anmahni ṭanpui tûrin a thawkrim hle bawk.—Matthaia 20:28.

14. I unaute chunga hmangaihna lantîr tûrin eng nge i tih theih?

¹⁴ Hriatrengna hun chu in kohhrana unaute, a bîk takin kum upate i ṭanpui theih dân ngaihtuah nâna hun ṭha tak a ni bawk. Hêng unau duh takte hi i tlawh thei ang em? Anni chu chawhmehte suahin, in lam hnate thawhpuiin, leh inkhâwmahte hruaiin i ṭanpui thei ang em? Rawngbâwlnaa thawhpui tûr chein i sâwm thei ang em? (Luka 14:12-14 chhiar rawh.) Pathian hmangaihna chuan i unaute chunga hmangaihna lantîr tûrin chêttîr che rawh se!

15. Eng nge kan hriat ngai?

¹⁵ A pathumnaah chuan, Jehova hmangaihna chuan kan unaute ngaidam tûrin min chêttîr a. Kan vai hian Adama hnên aṭangin sual leh thihna kan rochun a, chuvângin, “tlanna ka mamawh lo” tia sawi thei tumah kan awm lo. Pathian chhiahhlawh rinawm ber pawhin tlanna thilpêk chu a mamawh a. Bâ tam tak kan neih chu ngaihdamsak kan ni ṭheuh va! Engvângin nge chu chu kan hriat a pawimawh? A chhânna chu Isua tehkhin thute zînga pakhatah kan hmu thei a ni.

16, 17. (a) Lal leh bâwihte chungchânga Isua tehkhin thu aṭangin eng nge kan zir ang? (b) Isua tehkhin thu i chhût hnu chuan eng nge tih i tum tlat?

¹⁶ Isua chuan, duli 60,000,000 bâ a bâwih ngaidamtu lal pakhat chungchâng tehkhin thu a sawi a. Mahse, a hnuah chu bâwih chuan a laka duli 100 chauh bâ a bâwihpui chu a ngaidam duh lo va. Lal khawngaihna chuan bâwih chu a bâwihpui ngaidam tûrin a chêttîr tûr a ni nâa le. A bâwihin chutianga leibâ tlêm tê a ngaidam lo tih a han hriat chuan lal chu a thinur hle a. A hnênah: “Bawi sual, mi dîl chiam avâng khân i bat zawng zawng kha ka ngaidam che a ni a; ka khawngaih che ang khân nang pawhin i bawipui chu i khawngaih ve tûr a ni lâwm ni?” tiin a hrilh a ni. (Matthaia 18:23-35) Chu lal ang bawkin, Jehova chuan kan bâ tam tak min ngaidam a. Jehova hmangaihna leh khawngaihna chuan eng ti tûrin nge min chêttîr ang?

¹⁷ Hriatrengna atâna kan inbuatsaih hian,  heti hian kan inzâwt thei a ni: ‘Unau tuemawin ka rilru a tina tawh ngai em? Ani chu ngaihdam harsa ka ti em?’ tiin. Kan ti a nih chuan, tûn hi ‘ngaihdam inpeih reng,’ Jehova entawnna hun ṭha tak a ni. (Nehemia 9:17; Sâm 86:5) Jehova khawngaihna nasa tak chu kan hlut chuan, mi dangte chungah khawngaihna kan lantîr ang a, anni chu thinlung aṭangin kan ngaidam ang. Kan unaute kan hmangaih lohva, kan ngaihdam loh chuan Jehova min hmangaihna leh min ngaihdamna chu kan beisei thei lo. (Matthaia 6:14, 15) Mi dangte kan ngaihdam hian, chu chuan kan rilru an tihnatna chu a thlâk lo va; mahse, hun hlimawm zâwk nei tûrin min ṭanpui dâwn a ni.

18. Engtin nge Pathian hmangaihna chuan unaunu pakhatin unaunu dang ṭhat famkim lohna dawh tûra a ṭanpui?

¹⁸ Kan unaute ṭhat famkim lohna dawh chu a harsa hle thei a. (Ephesi 4:32; Kolossa 3:13, 14 chhiar rawh.) Unaunu Lily-i chuan chutiang chuan a dawh a ni. ^[1] (Endnote en rawh.) Ani chuan hmeithai Carol-i chu a ṭanpui a. Entîr nân, Carol-i kal duhna apiangah a hruai a, a thil lei ngaite chu a leisak a, thil dang tam tak a tihsak bawk a ni. Chuti chung pawhin, Carol-i chuan a sawisêl reng a, a châng chuan amah ṭanpui chu a awlsam lo hle. Mahse, Lily-i chuan Carol-i mize ṭha laite chu a en tlat a, Carol-i thih hma loh zawng kum rei tak chhûng a ṭanpui a ni. Lily-i tân Carol-i ṭanpui chu a harsa hle chung pawhin, ani chuan: “Thawhlehnaah Carol-i hmuh hlân ka nghâkhlel hle a. A ṭhat famkim hun hriat chu ka châk a ni,” tiin a sawi. Pathian hmangaihna chuan kan unaute chunga dawhthei tûr leh mihringte ṭhat famkim lohna a bo hlen hun beisei tûrin min chêttîr thei a ni tih a chiang hle.

19. Engtin nge Pathian “thilpêk sawi hleih theih loh” chuan a chêttîr che?

¹⁹ Jehova chuan “thilpêk sawi hleih theih loh” min pe tih a chiang hle a. Chu chu i ngaihlu reng ang u! Hriatrengna hun chu Jehova leh Isua’n kan tâna an thiltih zawng zawngte chhûtna hun ṭha tak a ni. An hmangaihna chuan Isua entawn tlat tûr leh kan unaute chunga hmangaihna lantîr a, thinlung aṭanga ngaidam tûrin min chêttîr reng rawh se. (ws16.01-E)