He thu hi i pawm em? Samantha-i ang bawkin, engtik hunah emaw chuan dinhmun khirh tak kan hmachhawn ṭheuh va. Rinawm lo tûra min thlêmtu dinhmunte kan hmachhawn dân chuan eng thu bul nge kan ngainat tih a târ lang thei a ni. Entîr nân, hming chhiatna tûr laka inhumhim kan ngaih pawimawh ber chuan, rinawm loh chu thil ṭûl leh neih ngai niin kan ngai thei ang. Mahse, thu dik a lo lan chhuah hunah chuan rinawm lohna chuan nghawng ṭha lo a nei fo a ni. A hnuaia thute hi han ngaihtuah teh.

Inlaichînna chu inrin tawnna hmanga neih chhoh a ni a. Mi pahnih an inrin tawn hian him hle nia inhriatna an nei a ni. Mahse, inrin tawnna chu vawi lehkhata neih theih a ni lo. Mite chuan an inkawm a, thu dik tak inhrilh bawk a, hmasial lo taka thil an tih hunah inrin tawnna an nei a. Mahse, inrin tawnna chu rinawm lohna thiltih pakhat têin a tichhe thei a. Inrin tawnna a chhiat tawh chuan siam ṭhat leh chu a harsa hle thei a ni.

Ṭhian ṭha anga i ngaih tuemaw chuan a bum tawh ngai che em? Chutiang a nih chuan engtin nge i awm? Phatsan nia inhriain, i rilru a na hle ngei ang. Chu chu hriatthiam awm tak a ni. Rinawm lohna chuan inlaichînna lungphûm nghet tak chu a tichhe thei tih rinhlelh tûr a ni lo.

California University-a mi thiam Robert Innes-a chuan “rinawm lohna hi inkaichhâwn theih a ni,” tih a hmu chhuak a. Chuvângin, rinawm lohna chu natna hrik ang a ni a—mi bum hmang tuemaw i kawm tam poh leh, rinawm lohna “hri vei ve” chu i tân a hlauhawm lehzual a ni.

Engtin nge rinawm lohna thang chu i pumpelh theih? Bible-in a ṭanpui thei che a. Khawngaihin Bible thu bul ṭhenkhat ngaihtuah ang che. (wp16.01-E)