Bible-a atîra ziak Grik thu mal ‘rinawm’ tia lehlin hi a nihna takah chuan “kawng engkima ṭha vêl vek” sawina a ni a. Nungchang mawi leh ṭha sawina a ni thei bawk.

Kristiante chuan thlarauva thâwk khum tirhkoh Paula thu: “Rinawmna ṭha zawng zawng tilang . . . tûrin fuih rawh,” tih hi an la thutak hle a. Chutah chuan eng nge tel?

Mi a tam zâwk chu tûk tin an kal chhuah hmain dârthlalangah an inen ṭhîn a. Engvângin nge? A ṭha thei ang bera lan an duh vâng a ni. Mahse, sam tan dân emaw, thawmhnaw tûn lai tak hâk emaw aia thil pawimawh zâwk a awm a. A nihna takah chuan, chhûng lama kan nihna chuan kan mawina a belhchhah theiin, a tihmêlhem thei bawk a ni.

Pathian thu chuan thil sual tih duhna kan nei tih a sawi a. Genesis 8:21 chuan: “Mihring rilru ngaihtuahnate chu an naupan têt ata a sual,” tih a sawi. Chuvângin, rinawm tûr chuan, kan pianpui thil sual tih duhnate chu kan do a ngai a ni. Tirhkoh Paula chuan sual a do dân chungchângah: “Ka rilru tak takin Pathian dân chungah ka lâwm si ṭhîn a; nimahsela ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn,” tiin chiang takin a sawi a ni.—Rom 7:22, 23.

Entîr nân, kan thinlungin thil sual ti tûr leh rinawm lo tûra min tur et et hian, kan thinlung sal kan nih kher a ngai lo. He mi chungchângah hian duhthlan theihna kan la nei a. Ngaihtuahna ṭha lo kan hnâwl chuan, rinawm lohnain min hual vêl chung pawhin rinawmna kan vawng reng thei a ni.

Rinawm tûr chuan, nungchang lama mize nghet tak kan neih a ngai a. Mahse, lungchhiatthlâk takin, mi tam tak chuan an mi mal nungchang mawi leh ṭha ngaihtuah aiin an ‘thawmhnaw’ hâk tûr ngaihtuah nân hun an hmang tam zâwk a. Chuvângin, an dinhmun mil zêlin rinawm lohna thiltih engemaw chen chu an inthiam chawp ṭhîn a ni. Rinawm lohna chungchâng ziakna lehkhabu, The (Honest) Truth About Dishonesty tih chuan heti hian a sawi: “A nihna takah chuan, rinawm nia inhriatna min hlohtîr lo tâwkin mite kan bum ṭhîn,” tiin. Mahse, rinawm lohna pawm theih chin awm a nih ngai chuan, eng chen nge ni ang tih chungchângah tehna rin tlâk a awm em? A awm avângin kan lâwm hle.

Khawvêla mi maktaduai tam tak chuan Bible chu tehna rin tlâk a ni tih an pawm a. Bible chuan tehkhin rual loh nungchang mawi leh ṭha tehna a nei a. (Sâm 19:7) Chu chuan chhûngkaw nun, hnathawh chungchâng, nungchang lam, leh thlarau lam tâna kaihhruaina rin tlâk tak a pe a ni. Chu kaihhruainate chuan fiah a dâwl a. Chûng dânte leh thu bulte chu hnam tin te, chi tin te, leh mi tinte tân a ni a. Bible thute chhiar a, ngun taka ngaihtuahna leh a thurâwnte zawmna hmangin rinawm tûr leh dik taka awm tûrin kan thinlung kan sawizawi thei a ni.

 Chutichung pawhin, rinawm lohna do hneh thei tûr chuan Bible hriatna dik neih aia tam a ngai a. A chhan chu, a tehna mila nung tûra min tur reng nungchang ṭhat lohna khawvêla kan awm vâng a ni. Chuvângin, Pathian ṭanpuina kan dîl a ngai a. (Philippi 4:6, 7, 13) Chutianga kan tih chuan, thil dik atâna ding nghet tûr leh thil engkima rinawm tûrin huaisenna kan nei thei a ni.

Thuziak hmasa bera kan sawi tâk Hitoshi-a chuan hnathawktu rinawm a nihna chu a hlâwkpui a. Tûna a thawhna pu chuan a rinawmna chu a ngaihlu hle a ni. Ani chuan: “Chhia leh ṭha hriatna thiang tak min vawntîr thei hna ka hmuh avângin ka lâwm hle,” tiin a sawi.

Mi dangte pawhin rinawm hi a manhla tih an hria a. “Rinawmna ṭha zawng zawng tilang” tûra fuihna Bible thu bul hlâwkpuitute entîrna ṭhenkhat chu ngaihtuah ang che.

• Chhia leh Ṭha Hriatna Thiang

  “Kum 13 mi ka nihin rûkhmangte thawhpui tûrin school ka chawlhsan a. Chuvângin, ka sum lâk luh zaa 95 chu rinawm lohna hmanga ka neih a ni. A hnuah, pasal ka nei a, ka pasal nên chuan Jehova Thuhretute nên Bible kan zir ṭan ta a. Pathian Jehova’n * rinawm lohna thiltihte chu a hua tih kan zir a, tichuan kan nun dân thlâk kan tum ta a ni. Kum 1990-ah Jehova hnênah inpumpêkin, Jehova Thuhretute zînga mi niin baptisma kan chang ta a ni.”—Thufingte 6:16-19.

  “Tûn hmain, ka in chu thil rûk hlîrin a khat a; mahse, chutiang thil a awm tawh lo; chu chuan chhia leh ṭha hriatna thiang tak min neihtîr a ni. Kum tam tak chhûnga ka rinawm lohna chungchâng ka ngaihtuah lêt hian, Jehova zahngaihna nasa tak avângin a chungah ka lâwm hle. Tûnah chuan Jehova chu ka chungah a lâwm tawh tih hriatna nêna zan tina han mut chu a lungawithlâk hle.”—Cheryl-i, Ireland.

  “Ka hnathawhna pu chuan thamna ka la duh lo tih a hriat chuan, heti hian min hrilh a ni: ‘I Pathian hian mi rinawm takah a siam che a nih hi! Kan company-a i thawk chu kan tân malsâwmna a ni tak zet a ni,’ tiin. Thil engkima rinawmna chuan Pathian Jehova hmaah chhia leh ṭha hriatna thiang tak min neihtîr a. Chu chuan ka chhûngte leh mi dangte chu rinawm ve tûra ṭanpui theihna hun remchâng min pe bawk a ni.”—Sonny-a, Hong Kong.

• Rilru Thlamuanna

  “International bank pakhatah dinhmun sâng tak ka chelh a. He sumdâwnnaah hian, rinawmna aiin hausakna chu a pawimawh zâwk a. Thlîr dân lâr tak chu, ‘Hausakna a chawisân a, sumdâwnna a ṭhanchhohtîr dâwn phawt chuan chhe têa rinawm loh hi eng nge a pawina?’ tih hi a ni. Mahse, rinawmna avângin rilru thlamuanna ka nei a. A rah chhuah tûr eng pawh hmachhawn dâwn mah ila, rinawm reng chu ka tum tlat a. Ka hnathawhna pute chuan anmahni ka bum lo vang a, an tân mi ka bum hek lo vang tih an hria a ni.”—Tom-a, United States.

• Zahawmna

  “Ka hnathawhna hmuna kan hotupa chuan thil bo ṭhenkhat chungchânga dâwt sawi tûrin min fuih a, mahse ka sawi duh lo. A tâwpah rûkrute hmuh chhuah an nih chuan ka rinawmna avângin, ka pu chu ka chungah a lâwm hle. Rinawm lohna khawvêla rinawm tûr chuan huaisenna neih a ngai a. Mahse, a tâwpah chuan, rin kan hlawh theiin mi dangte zah kan kai thei a ni.”—Kaori-i, Japan.

Chhia leh ṭha hriatna thiang tak, rilru thlamuanna, leh zahawmna—hetiang malsâwmnate hian rinawmna lantîr chu a manhla tak zet tih a târ lang. Chu chu i pawm dâwn lâwm ni? ▪ (wp16.01-E)