1, 2. (a) Eng vaukhânnain nge mi tam takte nun chhanhim? (A thupui chunga milem en rawh.) (b) Pathian mite chuan an nun chhanhim thei eng kaihhruaina nge an neih?

“DING LA, EN LA, NGAITHLA RAWH.” Hêng thute hi North America rama rêl kawng kânna tûrah kum 100 chuang langsâr taka târ chhuah a ni tawh a. Engvângin nge? Motor-in rêl kawng a kân laia rêlin a sut loh nân a ni. Hêng vaukhânna târ chhuahte hian a ngaihsaktu mi tam takte nun a chhanhim a ni.

² Jehova chuan hriattîrna thu târ chhuah mai aia ṭha zâwk min pe a. A mite chu chatuana nunna an hmuh theih nân leh thil hlauhawm an pumpelh nân a kaihhruai a ni. Jehova chu a berâmte’n thil hlauhawm an pumpelh theih nâna kaihruaitu leh vaukhântu berâmpu duhawm tak ang a ni.—Isaia 30:20, 21 chhiar rawh.

3. Engtin nge mihring zawng zawng chuan thihna kawng an zawh tâk?

³ Mihring chanchin inṭantirh aṭangin, Jehova chuan an hnênah zirtîrna leh kaihhruaina chiang tak a pe a. Entîr nân, Eden huanah mihringte chu chatuana nung a, hlim taka an awm theih nân kaihhruaina chiang tak a pe a ni. (Genesis 2:15-17) Mahse, Adama  leh Evi-te chuan anmahni hmangaihtu an Pa kaihhruaina chu an hnâwl a. Evi chuan rûl hnên aṭanga lo kal niâwm taka lang thurâwn chu a âwih a; tichuan, Adama pawhin a nupui thusawi chu a âwih ta a ni. Eng nge a rah chhuah? An pahnih chuan hrehawm an tuar a, beisei tûr nei lovin an thi a ni. Thu an âwih lohna avângin, mihring zawng zawngte chuan thihna kawng chu an zawh ta a ni.

4. (a) Engvângin nge Tuilêt hnuah kaihhruaina mamawh belh a nih? (b) Engtin nge dinhmun tharte chuan Pathian ngaih dân a târ lan?

⁴ Pathian chuan Nova hnênah nun chhanhimtu kaihhruainate a pe a. Tuilêt hnuah, Jehova chuan thisen ei lo tûr, a nih loh leh in lo tûrin thu a pe a ni. Engvângin nge? Mihringte hnênah sa ei phalna a pêk tawh dâwn vâng a ni. Hêng dinhmun tharte avâng hian, kaihhruaina thar: “Sa a nunna (a thisen) chawpin in ei tûr a ni lo,” tih hi an mamawh a. (Genesis 9:1-4) He thupêk aṭang hian nunna chungchânga Pathian ngaih dân chu kan hria a, chu nunna chu a ta a ni. Ani chu Siamtu leh nunna min petu a nih avângin, nunna chungchângah dân a zam thei a ni. Entîr nân, mihringte chu mi dangte nunna la lo tûrin thu a pe a. Pathian chuan nunna leh thisen chu thil hlu leh thianghlim takah a ngai a, a hmang dik lo apiang chu a hrem ang.—Genesis 9:5, 6.

5. Tûnah eng nge kan ngaihtuah ang a, engvângin nge?

⁵ Nova hun a liam hnuah, Pathianin a mite chu a kaihruai zawm zêl a. He thuziakah hian, a kaihhruai dân entîrna ṭhenkhat kan ngaihtuah ang a. Chu chuan khawvêl thara min hruaitu tûr Jehova kaihhruainate zawm kan tumna chu a tinghet sauh vang.

6. Engvângin nge Pathian mite tân Mosia hmanga a dân pêkte zawm chu a pawimawh a, Israel mite’n eng rilru put hmang nge an neih ngai?

⁶ Mosia hun lai chuan, Jehova’n a mite hnênah nungchang lam leh Pathian biakna lamah kaihhruaina chiang tak a pe a. Engvângin nge? Dinhmunte a inthlâkthleng leh vâng a ni. Israelte chu mitthite leh milemte bia a, Pathian chawimawi lo thil dang tam tak titu Aigupta mite salah kum zahnih aia rei an tâng a. Chu mi hmun ata chhuah zalên an nih chuan, Pathian mite chuan kaihhruaina thar an mamawh a ni. Anni chu Pathian Dân chauh zâwmtu hnam an lo ni ang. Lehkhabu ṭhenkhat chuan “dân” tia lehlin Hebrai thu mal hi “kawhhmuh, kaihruai, zirtîr,” tihna thu mal nên inkûngkaihna a nei tih a sawi a. Dân chuan Israel mite chu nungchang bawlhhlawhna leh an chhehvêl hnamte biakna dik lo lak ata a vênghim a ni. Israel mite’n Pathian thu an ngaihthlâk chuan, a malsâwmna an dawng ṭhîn a. An hawisan erawh chuan, a rah chhuah thil râpthlâk takte an seng ṭhîn a ni.—Deuteronomy 28:1, 2, 15 chhiar rawh.

7. (a) Jehova’n a mite hnêna kaihhruaina a pêk chhan hrilhfiah rawh. (b) Engtin nge Dân chu Israel mite tân kaihruaitu a nih?

⁷ Kaihhruaina thar pêk a ngaih chhan dang a awm leh a. Dân chuan Israel mite chu Jehova thiltuma thilthleng pawimawh tak, Messia, Isua Krista lo lan hun atâna a buatsaih bâkah, Israel mite chu an ṭha famkim lo tih a hriattîr a. Anni chu tlanna, an sualte tibo hlen thei inthawina ṭha famkim, an mamawh tih hre thiam tûrin a ṭanpui bawk. (Galatia 3:19; Hebrai 10:1-10) Chu bâkah, Dân chuan Messia chhûngkaw thlah kal zêl chu a vênghim a, Messia a lo lan huna amah hre thiam tûrin Israel mite chu a ṭanpui a ni. Ni e, Dân chu hun rei lo tê atâna Krista lama “kaihruaitu” a lo ni.—Galatia 3:23, 24.

8. Engvângin nge Mosia Dâna thu bulte chu kan inkaihhruaitîr ang?

⁸ Kristiante ni mah ila, Dân hmanga Jehova’n kaihhruaina a pêkte chu kan hlâwkpui ve  thei a ni. Eng kawngin nge? Ding a, Dân nghahchhan thu bulte enna hmangin. Chûng dânte hnuaiah awm tawh lo mah ila, chûng zînga tam tak chu kan nî tin nunah leh Jehova kan biaknaah min kaihruaitu angin kan la rinchhan thei a. Chûng dânte chu kan zir theih nân, a thu bulte’n min kaihhruai theih nân, leh Dân aia ropui zâwk Isua’n min zirtîr avânga kan lâwm theih nân Bible-ah a chhinchhiah a ni. Isua’n: “‘I uirê tûr a ni lo,’ an ti tih in hre tawh. Kei erawh chuan, tupawh ngaih châka hmeichhe melh apiang chu, a thinlungah a uirê tawh reng a ni tih ka hrilh a che u,” tia a sawi hi ngaithla ang che. Chuvângin, uirêna kan pumpelh a ngai chauh ni lovin, nungchang leh ngaihtuahna bawlhhlawhte chu kan hnâwl a ngai bawk a ni.—Matthaia 5:27, 28.

9. Eng dinhmun inthlâknain nge Pathian tân kaihhruaina thar pêk ngaihtîr?

⁹ Messia anga Isua a lo kal hnuah, Jehova chuan kaihhruaina thar pein, a thiltum chungchâng chipchiar lehzualin a târ lang a. Engvângin nge chutianga tih chu a ngaih? C.E. 33 khân, Jehova chuan Israel hnam chu hnâwlin, Kristian kohhran chu a mite ni tûra a thlan avângin. Chuvângin, Pathian mite dinhmun chu a inthlâk leh a ni.

10. Engvângin nge dân tharte chu Kristian kohhran hnêna pêk a nih a, chu chu Israel mite hnêna pêk lakah engtin nge a danglam?

¹⁰ Jehova chuan Israelte hnênah an nun dân tûr leh amah an biak dân tûr zirtîrtu Mosia Dân a pe a. Kum zabi khatna aṭang khân, Pathian mite chu hnam khat aṭang chauhva lo chhuak ni lovin, hnam hrang hrang leh ṭobul hrang hrang aṭanga lo chhuak an ni a, anni chu thlarau lam Israelte tia koh an ni. Kristian kohhrana din an niin, thuthlung thar hnuaiah an awm a ni. Jehova chuan an nun dân tûr leh amah an biak dân tûr chungchângah kaihhruaina thar, a nih loh leh belhchhahna chu a pe a. Dik tak chuan, “Pathianin mi duhsak bîk a nei lo . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn.” (Tirhkohte 10:34, 35) Anni chuan lung phêka ziak ni lo, an thinlung phêka ziak thu bula innghat reng, “Krista dân” chu an zui a. He dân hian Kristiante chu an awmna hmun apiangah a kaihruaiin an hlâwkpui a ni.—Galatia 6:2.

11. ‘Krista dânin’ a nghawng tûr Kristian nun pêng pahnih chu engte nge ni?

¹¹ Thlarau lam Israelte chuan Isua hmanga Jehova pêk kaihhruaina chu an hlâwkpui hle a. Isua chuan thuthlung thar a hmêlhriattîr hma lawkin thupêk pawimawh tak pahnih a pe a ni. Pakhat chu thu hrilh rawngbâwlna chungchângah a ni a. A dang chu Kristiante awm dân tûr leh an incheibâwl tawn dân tûr chungchângah a ni. Hêng thupêkte hi Kristian zawng zawngte tân a ni a, chuvângin, kan beiseina chu vân emaw, lei emawa chatuana nunna ni mah se, chu kaihhruaina chu kan zâwm ṭheuh a ni.

12. Thu hrilh rawngbâwlna chungchângah eng thil thar nge awm?

¹² Tûn hma chuan, hnam dangte chu Jehova rawngbâwl tûrin Israel ramah an kal a ngai ṭhîn a. (1 Lalte 8:41-43) Mahse, Isua thupêk chu Matthaia 28:19, 20-ah kan hmu a ni. (Chhiar rawh.) Ani chuan a zirtîrte chu mi zawng zawng hnêna “kal” tûrin a hrilh a. C.E. 33 Pentikost nîah, Jehova chuan khawvêl puma chanchin ṭha hrilh a duh tih a târ lang a ni. Chu mi nî chuan kohhran thara mi 120 vêlte chu thlarau thianghlimin an khat a, Juda mite leh saphunte chu ṭawng chi hrang hrangin an be ṭan ta a ni. (Tirhkohte 2:4-11) A hnuah, an thu hrilhna bial chuan Samari mite a huam tel a. Tichuan, C.E. 36-ah chuan an thu hrilhna bial chuan serh tan loh Jentailte a  huam tel leh a ni. Kristiante tân khawvêla mi tinte hnênah thu an hrilh a ngai tihna a nih chu!

13, 14. (a) Isua ‘thupêk tharah’ chuan eng nge tel? Isua entawn tûr siam aṭangin eng nge kan zir theih?

¹³ Isua chuan kan unaute kan cheibâwl dân tûr chungchângah “thupêk thar” min pe bawk a. (Johana 13:34, 35 chhiar rawh.) Nî tin anmahni kan hmangaih tih kan târ lang tûr a ni a, an tân kan nun pêk kan inhuam tûr a ni bawk. Chu chu Mosia Dânin a phût lo.—Matthaia 22:39; 1 Johana 3:16.

¹⁴ Isua chu mahni hma sial lo hmangaihna lantîrna kawnga entawn tûr ropui ber a ni. A zirtîrte chu a hmangaih êm avângin an tân inhuam takin a thi a. A hnungzui zawng zawngte chu chutianga ti ve tûrin a beisei a ni. Chuvângin, harsatnate chhel taka tawrh leh kan unaute tâna thih pawh kan inhuam tûr a ni.—1 Thessalonika 2:8.

15, 16. Eng dinhmun thar nge kan neih a, engtin nge Pathianin min kaihhruai?

¹⁵ Isua chuan ‘bâwih rinawm leh fing tak’ chu, a hnungzuite hnêna “a hun apianga” thlarau lam chaw pe tûrin a ruat a. (Matthaia 24:45-47) He chawah hian dinhmun a inthlâkthleng huna Pathian mite tâna kaihhruaina pawimawh takte a tel a ni. Engtin nge kan dinhmun chu a inthlâk?

¹⁶ “Ni hnuhnûngahte” kan nung a, nakin lawkah chuan tûn hmaa la awm ngai lo hrehawm nasa tak kan hmachhawn ang. (2 Timothea 3:1; Marka 13:19) Tin, Setana leh a ramhuaite chu vân aṭanga leia paih thlâk an ni tawh a, mihringte chungah hrehawmna tam tak an thlen a ni. (Thu Puan 12:9, 12) Chu bâkah, tûn hma zawng aia nasain khawvêl puma mi tam takte hnênah ṭawng chi hrang tam taka thu hrilin Isua thupêk chu kan zâwm mêk bawk!

17, 18. Engtin nge kaihhruaina kan dawn chu kan chhân lêt ang?

 ¹⁷ Pathian inawpna pâwl chuan thu hrilh rawngbâwlnaa min ṭanpuitu tûr hmanrua tam tak min pe a. Chûng chu i hmang em? Kan inkhâwmahte chuan hêng hmanruate a ṭha thei ang bera hman dân tûr chungchângah kaihhruaina kan dawng a ni. He kaihhruainate hi Pathian hnên aṭanga lo kal angin i thlîr em?

¹⁸ Pathian malsâwmna dawng tûr chuan Kristian kohhran hmanga kaihhruaina min pêk zawng zawngte chu kan ngaihsak a ngai a. Tûna thu kan âwih chuan Setana khawvêl zawng zawng tihboral a nih hun tûr “hrehawm nasa tak,” chhûnga kaihhruainate zawm chu a awlsam sawt ang. (Matthaia 24:21) Chu mi hnuah chuan, felna khawvêl thara nung tûrin kaihhruaina tharte kan mamawh ang a, chutah chuan Setana thu nunna a awm tawh lo vang.

19, 20. Eng lehkhabute nge hawn a nih dâwn a, eng nge a rah chhuah ang?

¹⁹ Mosia hun laiin, Israelte chuan kaihhruaina thar an mamawh avângin Pathianin Dân a pe a. A hnuah, Kristian kohhran chuan “Krista dân” an zui a ngai a ni. Chutiang bawkin, Bible chuan khawvêl tharah, kaihhruaina thar ziakna lehkhabute kan dawng ang tih min hrilh a. (Thu Puan 20:12 chhiar rawh.) Chûng lehkhabuahte chuan chutih huna mihringte tâna Jehova thil phûtte a chuan ngei a rinawm hle. Chu mi zirna chuan mitthi tho lehte pawh tiamin mi zawng zawng chuan an tâna Pathian duhzâwng chu an hre thei ang a. Jehova ngaihtuah dân nasa lehzuala zir tûrin min ṭanpui ang. Bible kan hriatthiam lehzual dâwn avângin, Paradis-ah chuan hmangaihna, inzahna, leh chawimawina nên kan incheibâwl tawn tawh ang. (Isaia 26:9) Lalber, Isua Krista kaihhruaina hnuaia thil kan zir hnem dân tûr leh mi dangte kan zirtîr dân tûr chu han mitthla teh!

²⁰ “Lehkhabutea ziak” kaihhruainate kan zawm a, fiahna hnuhnûng ber chhûnga Jehova chunga kan rinawm reng chuan, ‘nunna buah’ kan hming chu kumkhuain a chhinchhiah tawh ang a. Chatuana nunna kan chang thei ang! Chuvângin, Bible thute kan chhiar a, kan tâna awmzia a neihte kan hriat theih a, Pathian min pêk kaihhruainate kan zawm theih nân, DING A, EN A, NGAIHTHLAK chu a ngai a ni. Chûngte kan tih chuan, hrehawm nasa takah kan dam khawchhuak thei ang a, finna leh hmangaihna nei tak kan Pathian Jehova chanchin chu chatuanin kan zir zawm thei ang.—Thuhriltu 3:11; Rom 11:33. (ws16.03-E)