1. Atîr aṭanga Pathian hnathawhah eng thil nge lang?

JEHOVA chuan thil dang zawng zawng aiin Isua a siam hmasa ber a. Atîr tê aṭangin Isua nên an inpumkhat a ni. Chutah, Isua chuan Pathian thawhpuiin, “mi themthiam angin a kiangah” a awm a ni. (Thufingte 8:30) Jehova chhiahhlawhte pawhin an hnathawh tûrte chu an thawkho bawk. Entîr nân, Nova leh a chhûngte chuan lawng an tukho va. A hnuah, Israel mite chuan biak bûk saknaah te, phelh darhnaah te, leh hmun danga phurh sawnnaahte chuan an thawkho a ni. Biak inah pawh, hlate sain leh rimawi nalh tak takte remin Jehova an fakho va. Jehova mite’n chûng thil zawng zawngte an tih theih chhan chu thawhhona an neih vâng a ni.—Genesis 6:14-16, 22; Number 4:4-32; 1 Chronicles 25:1-8.

2. (a) Kristian kohhran hmasaa thil chhinchhiah tlâk tak chu eng nge ni? (b) Eng zawhnate nge kan sawiho vang?

² Kum zabi khatnaa Kristiante pawhin thawhhona an nei a. Tirhkoh Paula chuan an thiltihtheihnate leh an chanvote chu inang  lo mah se, an hruaitu, Isua Krista chu zuiin an inpumkhat tih a sawi a. Anni chu taksa pêng chi hrang hrang hna thawkho nên a khaikhin a ni. (1 Korinth 12:4-6, 12 chhiar rawh.) Tûn laiah kan thawkho ve em? Engtin nge thu hrilhnaah, kohhranah, leh chhûngkuaahte ka thawhho theih?

3. Tirhkoh Johana chuan eng inlârna nge a hmuh?

³ Kum zabi khatnaah, tirhkoh Johana chuan tawtawrâwt hâm vântirhkoh pasarih chu inlârnaah a hmu a. Vântirhkoh panganain a tawtawrâwt a ham chuan, Johana chuan “arsi vân aṭanga leia tla” chu a hmu a. Chu arsi chuan chabi-in leilâwt khuarkhurum chu a hawng a. A hmasa berin, khuarkhurum aṭang chuan meikhu chhah tak a lo chhuak a, meikhu aṭang chuan khau rual a lo thlâwk chhuak a ni. Thing leh thlaite tihchhiat aiin, chûng khaute chuan ‘an chala Pathian chhinchhiahna nei lote’ chu a bei a. (Thu Puan 9:1-4) Johana chuan khau rualte’n thil tam tak a tichhe thei tih Mosia hun laia Aigupta rama thilthleng aṭangin a hria a ni. (Exodus 10:12-15) Johana hmuh khau rual chuan sakhaw dik lo chunga thuchah khauh tak puang chhuaktu hriak thih Kristiante a entîr a. Leia nun beiseina nei mi maktaduai tam takte chuan anni chu an thawhpui a ni. He thu hrilh rawngbâwlnaah hian anni chu an inpumkhat a. He hna hian mi tam tak chu sakhaw dik lo aṭanga chhuak tûr leh Setana thununna lak ata zalên tûrin a ṭanpui a ni.

4. Pathian mite’n eng hna nge an thawh ngai a, an thawh theih dân kawng awmchhun chu eng nge ni?

⁴ Tâwpna a lo thlen hmaa khawvêl puma “chanchin ṭha” hril tûrin mawhphurhna kan nei a. Thlawhhma a va zau tak êm! (Matthaia 24:14; 28:19, 20) “Tuihâl” zawng zawngte chu “nunna tui” in tûrin kan sâwm tûr a ni a; Bible thutak hre thiam duh zawng zawngte chu kan zirtîr a ngai tihna a ni. (Thu Puan 22:17) Mahse, chu hna chu “rem taka inchuktuah” a, kohhrana mite nêna kan thawhho chauhvin kan thawk thei ang.—Ephesi 4:16.

5, 6. Chanchin ṭha kan hrilh hian, engtin nge kan inpumkhat?

⁵ Mi a tam thei ang berte hnêna chanchin ṭha kan hrilh theih nân, kan thu hrilh rawngbâwlnaah ṭha taka kan inruahman a ngai a. Chutiang ti tûr chuan kohhran aṭanga kan dawn kaihhruainate chuan min ṭanpui a ni. Thlawhhma rawngbâwlna atâna kan inhmuhkhâwm hnuah, mite hnêna Lalram chanchin ṭha hril tûrin kan kal chhuak a. Bible chungchânga thu leh hla chhuahte kan sem bawk. A nihna takah chuan, khawvêl pumah thu leh hla chhuah maktaduai tam tak kan sem tawh a ni. A châng chuan a bîk taka thu hrilhna campaign-a tel tûra tih kan ni a. He hna i thawh hian, khawvêl puma thuchah inang puang chhuaktu mi maktaduai tam takte nên in inpumkhat tihna a nih chu! Pathian mite chanchin ṭha hril tûra ṭanpuitu vântirhkohte i thawhpui tihna a ni bawk.—Thu Puan 14:6.

⁶ Khawvêl puma thu hrilhnain rah ṭha a chhuahte chungchâng Yearbook-a chhiar chu a va phûrawm tak êm! Inkhâwmpuia tel tûra mite kan sâwm hian khawvêl puma kan inpumkhat dân pawh han ngaihtuah teh. Chutah chuan, kan vaiin thusawi inang kan ngaithla vek a. Thusawi te, drama te, leh lemchante chuan Jehova hnêna kan neih ṭhat ber pe tûrin min fuih a ni. Kum tina Hriatrengna inkhâwma kan tel hian khawvêl puma kan unaute nên kan inpumkhat bawk. (1 Korinth 11:23-26) Kan tâna Jehova thiltihte chunga kan lâwmzia târ lang tûr leh Isua thupêk zâwm tûrin ni thuhmun, Nisan 14 ni tlâk hnuah kan inhmukhâwm a. Hriatrengna thlen hma chawlhkârahte chuan he  thilthleng pawimawh taka a tam thei ang ber lo tel tûra sâwmin kan thawkho a ni.

7. Kan thawhho hian eng nge kan tih theih?

⁷ Khau pakhat chuan amahin eng vak mah a tichhe thei lo va. Chutiang bawkin, mahniin mi zawng zawng hnênah thu kan hril thei lo. Mahse, kan thawhho avângin mi maktaduai tam takte chu Jehova chanchin kan hrilh thei a, mi ṭhenkhat chu amah fak leh chawimawi tûrin kan ṭanpui thei a ni.

8, 9. (a) Kristiante tâna inpumkhatna neih a pawimawhzia zirtîr nân, Paula chuan eng tehkhin thu nge a hman? (b) Engtin nge kohhranah kan thawhho theih?

⁸ Paula chuan Ephesi khuaa mite chu kohhran inrêlbâwl dân a hrilh a, kohhrana mi zawng zawngte chu ‘engkima an ṭhan len’ a ngai tih a hrilh a ni. (Ephesi 4:15, 16 chhiar rawh.) Paula chuan Kristiante’n kohhran chu inpumkhat tûr leh kohhran Hruaitu Isua zui tûrin an ṭanpui thei tih hrilhfiah nân mihring taksa chu entîrna atân a hmang a. Ani chuan taksa pêng tinte chuan “rem taka inchuktuah leh inzawm khâwmin” hna a thawk tih a sawi a ni. Chuvângin, kan naupang emaw, kan upa emaw, kan hrisêlna a ṭha emaw, ṭha lo emaw pawh ni se, kan zain eng nge kan tih ṭheuh vang?

⁹ Isua chuan kohhran kaihruai tûrin upate a ruat a, anni chu zah a, kaihhruaina min pêkte zâwm tûrin min duh a ni. (Hebrai 13:7, 17) Chutianga tih chu a awlsam reng lo. Mahse, Jehova ṭanpuina kan dîl thei a. A thlarau thianghlim chuan upate kaihhruaina min pêk engpawh zâwm tûrin min ṭanpui thei a ni. Inngaihtlâwmna nei a, upate kan thawhpui chuan, chu chuan kohhran a ṭanpui nasat dân tûr chu han ngaihtuah bawk teh. Kan kohhran chu kan inpumkhat ang a, kan inhmangaih tawnna chu a ṭhang chho bawk ang.

10. Engtin nge kohhranho rawngbâwltute chuan kohhrana inpumkhatna awm tûrin an ṭanpui?

¹⁰ Kohhranho rawngbâwltute pawhin kohhran inpumkhat tûrin an ṭanpui bawk a. Upate ṭanpuiin an thawkrim a, an thiltih zawng zawng avângin kan lâwm hle a ni. Entîr nân, kohhranho rawngbâwltute chuan rawngbâwlnaa hman tûr thu leh hla chhuah indaih tâwk kan nei a ni tih an chian a, kan inkhâwma lo telve te chu an lo lâwm a ni. Kingdom Hall thawm ṭha tûr leh vawng fai tûrin an thawkrim bawk. Hêng unaute nêna kan thawhho hian, kan inpumkhat a, inruahmanna fel tak neiin Jehova rawng kan bâwl a ni.—Tirhkohte 6:3-6 nên khaikhin rawh.

11. Kohhrana inpumkhatna awmtîr tûrin la naupang zâwkte chuan eng nge an tih theih?

¹¹ Upa ṭhenkhat chuan kohhran tân kum tam tak an thawkrim hle a. Mahse, an upat tawh avângin, tûn hma angin an inhmang thei tawh lo pawh a ni mai thei. Unaupa la naupang zâwkte chuan an ṭanpui thei a. Zirtîrna an dawn chuan kohhranah mawhphurhna tam zâwk an chelh thei ang. Kohhranho rawngbâwltute chuan hna an thawhrim chuan, nakinah upate an rawn ni chho thei ang. (1 Timothea 3:1, 10) Kohhran upa la naupang zâwkte chuan hma an sâwn lehzual thei a. Bial kantu anga rawngbâwlin, kohhran tam taka unaute chu an ṭanpui tawh a ni. La naupang zâwkte’n inhuam taka unaute rawng an bâwlsak hian kan lâwm tak meuh a ni.—Sâm 110:3; Thuhriltu 12:1 chhiar rawh.

12, 13. Engin nge chhûngkuaa mi tinte chu thawhhotîr thei?

¹² Engtin nge chhûngkaw zînga mite chu thawkho tûra kan ṭanpui theih? Chawlhkâr tina neih chhûngkuaa Pathian biakna chuan min ṭanpui thei a. Nu leh pate leh an fate’n Jehova chungchâng zira hun an hmanho  hian, an inhmangaihna chu a nghet chho a ni. Chu mi hunah chuan, rawngbâwlnaa an sawi tûrte tihchhinna an nei thei a, chu chuan inbuatsaih ṭha lehzual tûrin a ṭanpui a ni. Thutak chungchâng an sawite an inhriatsak tawn a, chhûngkuaa mi zawng zawngin Jehova an hmangaihin tihlâwm an duh ṭheuh tih an hriat hian, an inhnaih tawn zual sauh a ni.

¹³ Engtin nge nupate chuan thawhhona an neih theih? (Matthaia 19:6) Jehova an hmangaih a, a rawng an bâwl dun chuan an hlimin an inpumkhat ang. Abrahama leh Sari te, Isaaka leh Rabeki te, leh Elkanna leh Hani te angin inngainatna an inlantîr tawn tûr a ni. (Genesis 26:8; 1 Samuela 1:5, 8; 1 Petera 3:5, 6) Nupate’n hetianga an tih hian an inpumkhatin Jehova an hnaih zual a ni.—Thuhriltu 4:12 chhiar rawh.

14. I pasal emaw, i nupui emawin Jehova rawng bâwl lo ta se, in inneihna tinghet tûrin eng nge i tih theih?

¹⁴ Bible chuan Jehova rawngbâwl lotu chu nupui pasalah kan nei tûr a ni lo tih chiang takin a sawi a. (2 Korinth 6:14) Mahse, kan unaute zîngah hian Jehova Thuhretu ni lote nupui pasala nei an awm cheu va. Ṭhenkhat chuan nupui pasal an neih hnuah thutak an zir a, an kawppuite erawh Thuhretu an rawn ni lo va. Mi dangte chuan Jehova rawngbâwltu chu an nei a; mahse, an kawppuite chuan kohhran an chhuahsan pawh a ni thei. Hetiang dinhmunah hian, Kristiante chuan Bible fuihnate zawmna hmangin an inneihna vawng nghet tûrin theih tâwp an chhuah a. Chu chu a awlsam reng lo mai thei. Entîr nân, Mary leh a pasal David chuan Jehova rawng an bâwl dûn a. Chutah, David chu a inkhâwm duh tawh lo va. Mahse, Mary chuan nupui ṭha nih tum tlatin, Kristian miziate a lantîr reng a. A fa parukte chu Jehova chungchâng zirtîrin, inkhâwm leh inkhâwmpuiahte an tel zawm zêl bawk a ni. Kum tam tak a liam hnu, naupangte pawh an puitlin a, in an chhuahsan vek hnuah pawh, Mary chuan harsa hle mah se, Jehova rawng a bâwl zawm zêl a ni. Tichuan, Mary’n a chhiar atâna a hnutchhiah magazine-te chu David chuan a chhiar ṭan ta a. A hnuah, inkhâwm ṭhenkhatah a tel ṭan leh ta a ni. A tupa kum 6 mi chuan a ṭhutna tûr a lo hauhsak ṭhîn a, Divid a inkhâwm lohte hian a tupa chuan, “Ka pu, i rawn inkhâwm lova a  nuam lo,” a ti ṭhîn a. David chu kum 25 hnuah Jehova hnênah a kîr leh a, tûnah chuan a nupui nên hlim takin Jehova rawng an bâwl tawh a ni.

15. Engtin nge innei rei tawhte chuan la innei rei lote chu an ṭanpui theih?

¹⁵ Tûn laiah Setana chuan chhûngkuate chu a bei a. Chu chu Jehova rawngbâwltu nupate tân thawhhona ṭha an neih a ngaih chhan chu a ni. In inneihna chu eng anga rei pawh ni se, in inneihna tihngheh nâna i sawi tûr leh i tih tûrte chu ngaihtuah ang che. Kum rei tak innei tawh nupa in nih chuan, an inneihna la rei lo nupate tân entawn tûr ṭha in siam thei a. Anni chu chhûngkuaa Pathian biakna in neih huna tel ve tûrin in sâwm thei a ni. Anni chuan nupate chu eng anga innei rei tawh pawh ni se, inngainatna inlantîrin, an inpumkhat tûr a ni tih an hmu ang.—Tita 2:3-7.

16, 17. Pathian chhiahhlawh inpumkhat takte chuan eng nge an nghahhlelh?

¹⁶ Israel mite chu Jerusalema kût hmang tûra an kal hian, thawhhona ṭha an nei a. An zin kawng atâna an mamawh zawng zawng an inbuatsaih a ni. An zin hovin, an inṭanpui tawn a. Biak inah chuan Jehova an fak tlângin, an be tlâng vek a ni. (Luka 2:41-44) Tûn laiah, khawvêl thara nung tûra kan inbuatsaih hian, inpumkhat a, thawhhona ṭha nei tûrin theih tâwp kan chhuah a ngai a ni. Hei aia thawhho ṭhat lehzual theih dân kawng i ngaihtuah chhuak thei em?

¹⁷ He khawvêla mite hi thil tam tak chungchângah an inmil lovin an in do va. Mahse, Jehova’n remna nei tûr leh, thutak hre thiam tûra min ṭanpui avângin kan va lâwm tak êm! Khawvêl puma a mite chuan a duhzâwng angin an bia a. A bîk takin, he ni hnuhnûngahte hian Jehova mite chu an inpumkhat lehzual a ni. Isaia leh Mika hrilh lâwkna angin, “LALPA tlângah” a rualin kan chho tlâng a ni. (Isaia 2:2-4; Mika 4:2-4 chhiar rawh.) Nakin hunah leia mi zawng zawngte’n ‘rem taka inchuktuaha,’ Jehova be tûra thawhhona ṭha kan neih hun chuan kan va hlim dâwn êm! (ws16.03-E)